Home Gobierno Onderzoek riba maneho di ex-minister di infrastructura lo inicia dentro di poco

Onderzoek riba maneho di ex-minister di infrastructura lo inicia dentro di poco

558
0
SHARE
- Advertisement -

Lider di POR drs. Marisol Lopez-Tromp:

ORANJESTAD (AAN) – Parlamentario drs. Marisol Lopez-Tromp, Lider di fraccion di POR, a lesa y referi na un carta, pa mustra con importante ta pa tin e personanan adecua den e funcionnan adecua.

Cu e carta e Parlamentario kier a mustra mas bien con escogencia aki no mester ta. E carta tin di haber cu e Ley di ROP of Ley di zonificacion teritorial.

Ta un carta cu ex-minister di Infrastructura a firma na November 2014, pa un proyecto di hotel, cu ta un di e tantisimo caso cu a bay Corte y Hueznan mester bay cana na wetland y wak con grandi y na unda, y kico ta loke e ex-minister a viola di e ley pa dicta sentencia.

Den e carta aki e ex-minister a tuma decision cu un procedure robes. Ta trata di e proyecto di Isla di Oro, unda apart di duna su sosten na e proyecto aki, cu ta un bunita proyecto, a bisa cu e lugar unda esaki lo a wordo ubica mester pas cu e zonificacion, y como cu e sa cu nan kier a destine na un lugar cu ta proteha pa ley y a base di esaki a bin discusion pro y contra.

E dama parlamentario a menciona cu e ex-mandatario ta bisa den su carta cu e afdeling cu ta encarga cu e ley zonificacion, na e momento ey tabata bezig haciendo cambionan necesario den e ley, pa por ubica e proyecto pa e comerciante concerni.

“E ta mescos cu si mi bisa cu nos tin reglanan di trafico y cu e borchi ey ta verboden pa un y tur, no importa ken ni cual bario. Pero bo sa ‘pa bo mi ta kita e borchi ey of mi ta cambia su significado’ pasobra abo si mi kier pa pasa den e caya ey’. Boso por imagina e accidente cu esaki lo causa y tambe cu e ta contra ley”, e Parlamentario a indica pa ilustra e situacion cu e ley di ROP.

El a subraya cu un minister por sostene un proyecto pero e mester wak e caminda cu ta cuadra cu zonificacion.

E dama parlamentario a lesa e carta den cual e ex-minister ta skirbi “mi ta bay acomoda bo” kiermen facilite contra ley y pa hacie e tin cu cambia e ley pa e persona ey so.
El a agrega cu esaki ta e tipo di actonan cu no mester a tuma lugar y cu a conduci awe cu tin un cantidad di caso den Corte.

Y asina, drs. Lopez-Tromp a señala, tin cantidad di caso y el a uza esaki pa ilustra e forma di gobernacion cu Aruba no kier.

Mientras tanto, el a splica, e minister actual (Otmar Oduber) a bisa cu e ta bay adapta e ley di ROP, pero un adaptacion total. E expertonan cu ta bay haci esaki lo mester wak henter Aruba y teniendo cuenta cu e areanan pakico nan ta destina, si ta pa traha cas, pa proyectonan comercial, industrial, etc. Y no djis pa cambia ley pa un persona. Esey e mandatario a acentua, cu e tipo di maneho di Minister Sevinger a yega na su fin.

El a sigui bisa cu e onderzoek cu Parlamento a pidi y fraccion di POR a presenta un mocion pa investiga tur e casonan cu a bay robes den DIP, sea cu aprobacion of sin aprobacion di e departamento aki, pa por haya un bista total di cual ta e actonan cu no tabata corecto y kico nan ta nifica pa infrastructura di nos pais, lo ta iniciando dentro di poco.

- Advertisement -

DUNA COMENTARIO

Please enter your comment!
Please enter your name here