Home Gobierno Parlamentario Daphne Lejuez ta kere cu tin di mantene enfoke pa servicio...

Parlamentario Daphne Lejuez ta kere cu tin di mantene enfoke pa servicio di Fast Ferry bira realidad

41
0
SHARE
- Advertisement -

ORANJESTAD (AAN): Recientemente parlamentario di fraccion MEP, Daphne Lejuez a forma parti di un reunion hopi interesante na Hulanda relaciona cu e proceso di introduci Fast Ferry pa e islanan ABC.
Durante su ultimo bishita na Hulanda recientemente, señora Lejuez a sinta cu e consultant cu a skirbi e plan di Fast Ferry pa Aruba, Boneiro y Corsou na 2016. Parlamentario Setty Christiaans-Yarzagaray y señora Anamaria Pauletta di Corsou tambe a keda invita na e reunion aki. E intencion di e reunion interesante aki tabata pa nan por a haya un miho splicacion di e rekesitonan pa por activa e servicio aki na corto plaso.

Desaroyo economico pa San Nicolas

Segun parlamentario Lejuez, e intencion lo ta pa cuminsa servicio entre Aruba y Corsou, unda cu fuera di e forma practico di transporta persona, auto y container entre e islanan, e lo por tin un impacto economico tremendo pa ambos isla. “Den caso di Aruba, muy en particular pa locual ta regarda e area di San Nicolas, mirando cu e tereno awo ta disponibel pa crea e pier necesario pa e servicio aki na San Nicolas, e lo por sirbi como un catalisador pa actividad economico den e area aki”, segun e parlamentario.

Locual mester traha riba dje awor ta convenionan entre islanan, pero tambe na cada isla respectivamente, pa asina facilita y agilisa e proceso di boarding y disembarking y aki mester simplifica procesonan pa persona y autonan por traslada mas facil entre e dos islanan aki. “Pensa aki por ehempel na inmigracion, douane y SIAD. Nos a compronde cu e ministernan concerni na ambos di e islanan Aruba y Corsou ya ta den contacto over di e proyecto aki”, parlamentario Lejuez ta bisa. Conhuntamente cu señora Pauletta di Corsou y señora Christiaans-Yarzagaray hunto cu señora Daphne Lejuez di Aruba, a keda palabra di percura pa mantene e enfoke riba e servicio di Fast Ferry aki, pa asina e por bira realidad, y hunto cu esaki por trece e impulso economico necesario pa e islanan y duna contenido na nos relacion y colaboracion den Reino.

- Advertisement -

DUNA COMENTARIO

Please enter your comment!
Please enter your name here