Home Parlamento Parlamentario Richard Arends mirando cu Gobierno no a duna oido na recomendacionnan

Parlamentario Richard Arends mirando cu Gobierno no a duna oido na recomendacionnan

47
0
SHARE
- Advertisement -

ORANJESTAD (AAN): Fraccion di Partido AVP den Parlamento ta ricibiendo diferente feedback for di comunidad y esaki ta un confirmacion cu Gobierno a introduci un ley di medida, cual ta e ley di “coalitieheffing”, incluso cambionan fiscal cu repercusionan serio pa nos economia.

E ley aki a wrodo introduci sin ningun consulta, sin pidi conseho y sin ningun analisis riba efectonan macro economico y specialmente pa e sector financiero di Aruba. For di dia cu e Gobierno nobo a sinta nos ta nota un falta di pro-actividad y un falta di conocemento di materia financiero-economico. Esaki ta confirma door di e reaccion di e asociacion di banconan, como tambe actornan den sector financiero di Aruba.

Parlamentario di AVP, mr. drs. Richard Arends, a indica cu Fraccion di AVP a adverti p’e efectonan inflatorio di aumento di tarifa di BBO y BAZV, pero tambe ampliacion di e base. E servicionan cu antes tabata exonera di BBO y BAZV, aworaki lo conoce un aumento di tarifa di 0% pa 6%.

Principalmente lo tin su repercusionnan p’e mundo financiero di Aruba, pero tambe riba e tasa di inflacion como cu e gastonan di haci negoshi lo conoce un aumente substancial. Actividadnan bancario ta consisti di diferente servicio pa un transaccion. Pa cada un di e servicionan aki banconan ta cobra un “fee” cu hunto ta forma e ingresonan di un institucion financiero. Un pa un lo conoce un aumento di 6% pa asina por cumpli cu e impuesto cu Gobierno ta impone riba nan entrada. Institucionan bancario lo pasa e gasto adicional aki pa nan cliente y e consumidor lo ta pagando BBO y BAZV riba servicionan cu antes e no tabata paga p’e.

Esaki no ta conta solamente p’e banconan comercial, pero mester pensa riba FCCA, APFA y otro instancianan di credito cu ta duna hipoteca y e companianan di seguro. “Nan tur lo conoce un aumento drastico pa loke ta trata e transferencia y gastonan di nan servicio”, Parlamentario Arends a expresa. Esaki ta conta pa tur “fee” cu banco ta cobra manera ora di “swipe” bo carchi di ATM di un banco pa un otro banco, “credit card fee”, “late fee”, transaccion di transferencia internacional.

Esaki ta afecta specialmente den e top sectornan, startups di “young professionals”, como tambe tur empresa cu mester importa producto y servicionan. Gobierno no por pretende cu e gasto adicional aki ta bay a base di e margen di ganashi di empresanan aki. Aumento di BBO/BAZV lo afecta e competitividad di negoshinan, specialmente esunnan mediano y chikito. Hopi biaha nan no tin espacio pa pasa e gastonan adicional na nan consumidornan y asina lo keda afecta grandemente.

Na momento di tratamento di e ley, fraccion di AVP a trece e puntonan dilanti, pero un biaha mas Gobierno a silencia nan y no a tuma e recomendacionnan na serio. Exoneracion tabata t’ey pa no aumenta e costo di haci negoshi mas ainda riba e actividadnan comercial cu ta tuma luga den nos economia cual ya caba ta paga BBO y BAZV riba nan. Gobierno a opta deliberadamente pa amplia e base aki.

Fraccion di AVP ta vocifera e preocupacion- y comentarionan ricibi for di sector comercial y ciudadanonan. E instancianan cu a acerca fraccion AVP ta considera e aumento y expansion di e base di impuesto lo tin repercusion hopi mas grandi cu Gobierno ta premira y por te hasta causa un crisis economico.

AVP a adverti Gobierno riba e repercusionnan aki durante tratamento di presupuesto. Gobierno a opta pa no duna oido ni contesta, pero ta creando un “perfect storm” pa Aruba. Un aumento di BBO y BAZV, un ampliacion di e base di e impuestonan, aumento di prijsnan combustibel y zero-crecemento economico ta e mesun factornan cu a conduci na e tasa di inflacion riba 10 porciento 10 aña pasa ora a introduci BBO. Sector financiero di Aruba premira esaki un biaha mas, afectando poder di compra y tambe e competitivididad di negoshinan.

- Advertisement -

DUNA COMENTARIO

Please enter your comment!
Please enter your name here