Home Economia Parlamentarionan a reuni cu CAft pa discuti varios tema financiero

Parlamentarionan a reuni cu CAft pa discuti varios tema financiero

25
0
SHARE
- Advertisement -

ORANJESTAD (AAN): Den un conferencia di prensa extraordinario, lider di fraccion di MEP, Sr. Rocco Tjon a informa riba reunion cu nan tabatin ayera cu Colegio di Supervision Financiero Aruba (CAft), na unda e ta indica cu tabata un reunion caminda nan a toca tres tema, presupuesto 2018; presupuesto 2019 y maneho financiero en general.

E parlamentario a bisa cu e reunion a bay den un bon ambiente, pero skerpi si, caminda CAft a trece nan puntonan dilanti, pero nan como fraccion di MEP tambe a trece nan punto dilanti con nan wak, entre otro, e funcionamento di CAft, y el a indica cu dimes cu CAft ta opina diferente. Pero ta trata di discusionnan sano cu a tuma lugar, particularmente pa duna un ehempel, nan a puntra riba aspecto di entradanan di Refineria di Aruba (RdA)  y nan a splica nan di con nan mester ta cauteloso cu ponencianan cu nan ta haci, pasobra esaki por crea tambe disturbionan den nos comunidad. Pakico nan a trece esaki padilanti, y oposicion no a contraaresta nan tampoco, pasobra oposicion ta haciendo mal uso di informacionnan eroneo pa asina crea mal contento den pueblo.

Aworaki CAft a confirma cu entradanan di RdA ta realistico y pesey nan a bisa nan cu nan kier pa nan ta mas cauteloso, pasobra apesar di e situacion financiero, tambe tin situacion social pa enfrenta, y ta na bienestar di pais Aruba y di comunidad pa por tin trankilidad.

CAft a confirma cu entradanan presupuesta pa loke ta e 17.5 miyon florin di RdA ta realistico, door cu nan a ricibi evidencia cu ya un gran parti di e pago a drenta. Tjon a bisa cu esaki tabata e discusionnan cu nan a hiba cu CAft a permiti na 2017 pa uza proyeccionnan irealistico pa loke ta trata entradanan di RdA, sabiendo cu na 2016 e entrada no a drenta. Aworaki cu pagonan ta wordo haci, nan ta sali den un documento oficial pa bisa cu nan no ta haye realistico, pero awo a bin resulta cu si ta realistico!

Tjon a bisa cu nan a splica nan e situacion pa loke ta politica na Aruba tambe. Nan a adverti CAft for di Maart caba, kico oposicion lo bay haci, particularmente con Sr. Mike Eman lo trata di defende, apesar cu e no ta den gobernacion mas, e mal maneho cu el a hiba cu a conduci na e situacion actual y nan ta spera cu nan lo tene na cuenta e aspecto aki.

Tjon a probecha pa felicita Gabinete actual y tambe Parlamento cu a tuma un bon decision, den sentido di aproba presupuesto, pasobra CAft a duna nan di conoce cu e presupuesto ta realistico, e proyeccionnan ta realistico y nan ta premira cu no lo bin cambio den esaki. CAft ta contento cu pa luna di Augustus caba, Gobierno lo bin bek Parlamento pa splica con e desaroyo ta y nan ta kere cu esaki ta un medida positivo cu Parlamento number 10 ta asumi nan responsabilidad.

Pa loke ta trata presupuesto 2019, Tjon a indica cu CAft a splica cu den palabracion y reunionnan cu nan a tene cu diferente actor riba arena financiero, nan no ta premira cu esaki no lo wordo entrega na tempo y esaki tambe ta un mocion cu Parlamento a entrega y aproba, cu prome cu 1 di September nan kier e presupuesto pa nan por haci estudionan necesario.

Pa finaliza e parlamentario a bisa cu ta importante pa splica cu CAft a confirma cu e norma di 2017, kiermen di Gabinete anterior, no a wordo logra, nan a papia di un deficit di 3.1% y esaki ta mas halto cu e norma cu pa ley a wordo stipula. El a indica cu CAft ta hopi positivo pa loke ta trata economia, no solamente nan a papia cu Gobierno y cu Parlamento pero nan a papia tambe cu diferente otro instancianan, y e proyeccion pa economia ta positivo. CAft a papia cu diferente compania tanto local como internacional pa stimula inversion na Aruba. E ta kere cu esaki ta importante pa supervision financiero den futuro, kiermen mester bin cu un protocol nobo y tambe mester bin cu un ley nobo. E base cu CAft ta opera aworaki ta basa riba Aruba    Financiële Toezicht.

Presidente di Parlamento, Sr. Ady Thijzen a indica cu e ta sigur cu Aruba completo a sigui proceso aki di cerca, pasobra cu CAft ta un organo hopi importante, cu decisionnan tin hopi consecuencia pa loke ta trata desaroyo di e pais.

Segun Sr. Thijzen, loke ta hopi importante cu a bin dilanti ta, cu no ta solamente mester tene na cuenta finanzas, pero tambe cu e parti economico di e pais, cu mester desaroya y tambe tene cuenta cu problemanan social cu ta pasando actualmente. Den e cuadro aki nan ta trahando duro riba dje. El a indica cu mester corda cu financiële toezicht di Aruba no ta manera esnan di Corsow of St. Maarten, esaki a bin di un forma cu tabatin mal maneho financiero, un  ‘onbehoorlijk financieel beheer’ y pesey na 2015, CAft a bin pa tres aña.

Thijzen a bin cu tabata bon pa tende cu ta bay bin un protocol  y tabatin ley di LAft di 2015 cu a wordo pasa den Parlamento, e bon noticia ta cu ta bay bin un protocol nobo y esaki ta bay bira e base legal, pa loke ta trata un ley nobo, dus un LAft nobo. Esaki ta bay cay den mannan di Parlamento, dimes Gobierno lo negocia y palabra cierto puntonan, pero nan mester bin Parlamento pa nan trat’e y vota riba dje. El a señala cu esaki ta algo positivo, mirando cu e Parlamento aki ta bay dicidi y pone piezanan pa garantiza cu Aruba lo cana den un bon caminda financiero, y esaki ta demostra cu Aruba lo mantene su autonomia financiero den e cuadro aki. Supervision ta bon, pero mester bay den bon manera y no manera esaki a pasa den 2015 a base di un protocol y un ley cu tabata corecto. Sr. Thijzen a bisa cu e tin tur confianza cu Parlamento lo haci un bon trabao den esaki.

 

 

Presidente Raymond Gradus: ”Aruba a cumpli suficientemente cu recomendacionnan di CAft pa presupuesto 2018; importante ta pa stipula a corto plaso un cuadro legal di norma nobo cu ta dirigi riba finansa publico sostenibel”

 

Oranjestad– Pa riba termino corto por subi riba e caminda cu ta conduci na finansa publico sostenibel, e Colegio di supervision financiero Aruba (CAft) a duna tres recomendacion. Durante di su bishita CAft a constata cu a cumpli suficientemente cu e recomendacionnan aki. Pa aworaki, esaki ta duna CAft suficiente confiansa. Mirando e situacion preocupante di e finansa publico, CAft a bolbe mustra riba e nesesidad pa yega mas pronto posibel na un cuadro legal di norma. Pa realisa mehoracion di finansa publico den forma sostenibel y reduccion di e posicion di debe, ta necesario pa yega mas lihe posibel na un surplus riba e presupuesto.

 

Cumplimento suficiente cu recomendacionnan

Den espera di palabracionnan entre Aruba y Hulanda tocante di un cuadro legal di norma pa 2018-2021, den juni CAft a duna tres recomendacion a base di e presupuesto aproba. Na prome luga a recomenda pa laga e deficit presupuestario di 2018 ta mas abou cu e deficit presupuestario di 2017. Den e ultimo simannan Aruba a entrega datonan cu ta indica cu e entradanan no procedente di impuesto pa un total di 17,5 miyon florin di Refineria di Aruba (RdA) ta suficientemente realistico. Den 2018 ya a transferi un montante di 9,9 miyon florin. Banda di esey a recomenda pa e gastonan di personal calcula pa mas aña mester demonstra cu nan tin  tendencia di ta bahando. Pa loke ta trata gastonan di personal, Aruba a presenta un plan di personal den cua ta aspira pa laga e gastonan di personal calcula pa mas aña baha nominalmente. Pa 2018 ta tuma medida cu ta reduci e gastonan di personal cu 12 miyon florin. Cu esaki ta cumpli tambe cu e recomendacion di CAft pa no permiti e gastonan di personal subi, den comparacion cu 2017. Si ta importante pa Parlamento mas pronto posibel aproba e presupuesto supletorio cu ta relaciona cu esaki. Finalmente CAft a recomenda pa no surpasa e cota di debe maximo di 90% di Producto Domestico Bruto (PDB/GDP). Aruba a haci e promesa cu den 2018 y 2019 e lo no haci mas fiansa (di termino corto) cu ta necesario, loke ta haci posibel pa efectivamente e cota di debe keda bou di 90% di PDB.

 

Cuadro nobo di norma

CAft ya a conclui cu e compensasion di deficit di 2017 no por keda realisa den 2018manera e Ordenansa di Aruba di supervision financiero temporal (LAft)ta prescribi y cu di e forma aki e norma di LAft di un surplus di 0,5% di PDB ta keda fuera di alcanse. Pa denter di un termino corto subi e caminda cu ta conduci na finansa publico sostenibel, ta necesario pa yega na un cuadro legal di norma nobo. E combersacionnan cu Aruba y Hulanda ta sostene tocante di e topico aki ta andando, pero CAft a bolbe enfatisa pa yega na un cuadro di norma legal pa 2018-2021 y tambe pa mas pronto posibel realisa un surplus riba presupuesto, ya por cuminsa pone paso riba e caminda pa yega na finansa publico sostenibel.

 

Ultimo bishita di miembronan di Colegio Sybilla Dekker y Robert Croes

Ademas di hiba combersacion tocante di e resultadonan di e prome kwartaal, durante di e bishita aki a tuma despedida tambe di miembronan di Colegio Sybilla Dekker (miembro riba proposicion di Hulanda) y Robert Croes (miembro riba proposicion di Aruba). Tur dos e miembronan cu ta despedi, tabata envolvi for di inicio di CAft riba 1 di augustus 2015 y nan ta mira bek riba un cooperacion cu Aruba cu ta mehorando cada bes mas. Sybilla Dekker ta relata tocante di su periodo den CAft: “Kedando den combersacion cu otro, Aruba y CAft por a pone e pasonan necesario den desaroyo di supervision financiero na beneficio di finansa publico sostenibel. Robert Croes ta confirma esaki y ta añadí: ”Tabata un honor pa riba proposision di mi pais mi por a forma parti di e Colegio y semper mi a haci esaki semper a base di honor y consenshi”.

 

Bishita di trabou CAft

Manera ta custumber durante di e bishitanan di e Colegio na Aruba, a hiba combersacion cu Gobernador, Minister di Finansa, Conseho di Minister y e Comision Parlamentario di Finansa,

- Advertisement -

DUNA COMENTARIO

Please enter your comment!
Please enter your name here