Home Gobierno Premier Wever-Croes a splica con Aruba lo soluciona su problemanan

Premier Wever-Croes a splica con Aruba lo soluciona su problemanan

153
0
SHARE
- Advertisement -

Den un sala na Nieuwspoort completamente yen:

ORANJESTAD  (AAN):  Premier Evelyn Wever-Croes tabata orador invita di e organisacion Genootschap Nederland Aruba na Hulanda diahuebs ultimo. E presentacion bou di e titulo “Hoe Aruba de uitdagen zelf en met daadkracht aanpakt” a tuma luga den curason di Den Haag, na Nieuwspoort.

Den su presentacion Premier Wever-Croes a para keto na e retonan cu Aruba ta enfrenta. Retonan social serio cu a culmina den morto di e dos angelitonan Eugene y Rishandroh. Retonan cu pais bisiña Venezuela. Retonan cu integridad den gobernacion. Y retonan financiero.

Den esaki Premier a splica cu manera cu Gabinete Wever-Croes a sinta 6 luna pasa, y a wordo confronta cu e realidad financiero di pais Aruba, a lora manga y a cuminsa traha.

Mientras tanto tin un crisisplan social aproba y den prome fase di ehecucion.

Tin un plan con pa atende cu e situacion na Venezuela si e escala, y ta finalisando e capitulo financiero.

Tin un plan elabora riba tereno di integridad cu incorporacion di un bureau integriteit pa garantisa integridad den aparato gubernamental y un camara di integridad pa garantisa integridad den toma di decision di Gobierno.

Tambe tin un plan financiero economico den ehecucion, pendiente aprobacion final di Hulanda. Den e plan financiero economico, Gobierno di Aruba e describi e caminda duro pero necesario pa yega den dos aña na un surplus di 25 miyon florin.

E prome pasonan significativo a wordo tuma caba, y e ehecucion di e plan ta bayendo manera planifica. Unico cos cu falta ta e aprobacion di Hulanda pa asina por cambia e ley.

Premier Wever-Croes a enfatisa cu Aruba lo enfrenta y surpasa e desafionan aki nos mes y cu determinacion. Nos no ta pidi Hulanda placa. Nos ta pidi Hulanda duna nos espacio y tempo pa por trece e presupuesto den balansa na forma structural y duradero cu nos pueblo por carga.

Na final Premier a bisa cu e ta kere den cooperacion den Reino, a base di respet mutuo y a base di madures.

“Esey kiermen cu nos mester atende nos asuntonan nos mes. Den union y trahando hunto nos lo logra surpasa e retonan aki. Nos a haci’e den pasado caba y mi tin tur confiansa cu nos lo bolbe haci’e”, tabata e palabranan final di Premier Wever-Croes na ocasion di e charla na Nieuwspoort Den Haag diahuebs ultimo.

- Advertisement -

DUNA COMENTARIO

Please enter your comment!
Please enter your name here