Home Gobierno Prome Minister kier condena loke su mes a sostene y promove den...

Prome Minister kier condena loke su mes a sostene y promove den pasado

142
0
SHARE
- Advertisement -

Melvin Tromp di AVP

ORANJESTAD(AAN)– Cu gran asombro pueblo por a tuma nota di e decision di Gabinete Wever Croes,  pa castiga e radio emisora, bos di pueblo, esta Canal 90, cu suspencion di dos dia di su popular programa ‘Pueblo na Palabra.’

Un acto inprecindibel sigur ora cu tuma nota cu  gobierno ya tin problema cu presion di un pueblo cu a wordo mal engaña pa e actual gobierno di Prome Minister Evelyne Wever Croes, sr Melvin Tromp di partido AVP ta mustra.

“E cos aki ta refleho di un gobierno cu no kier acepta cu pueblo no ta contento cu su maneho di medida, su maneho di abuso y su maneho sin pia ni cabes caminda ta pone pueblo paga pa e falta di capacidad di un gobierno cu pueblo nuca a vota p’e.

Na mes momento nos ta keda babuca pero no sorprendi cu net Prome Minister Wever Croes, a sinti su mes menasa pa expresion haci pa un ciudadano durante di e programa popular aki cu ta conta cu grna sintonia hasta den e propio seno di partido MEP.

Con por ta posibel cu e lider di MEP por sinti su mes menasa pa un expresion haci pa un persona disgusta cu su gobierno, mientras cu su persona hunto cu su partido siendo den oposicion, a sostene tur acto di violencia y destruccion, nunca a condena esaki pero semper a papia cu ta expresion di hendenan disgusta cu gobierno.

Kisas Prome Minister tin memoria cortico pero ta su partido a organisa reunionnan cu nan lidernan di bario di MEP, pidiendo tur hende pa bin manifesta dilanti di Parlamento y despues a bay para pafo ora cu desorden e cuminsa y destruccion a tuma luga riba edificio di parlamento.

Ta durante di e manifestacion aki tironan a cay, sin cu nunca e actual Prome Minister a condena y cuestiona e tipo di comportacion aki, ya cu e tempo ey esaki a sirbi su interes politico y awor cu un persona a expresa su mes den un programa di pueblo y pa pueblo, ta sinti su mes menasa y a dicidi di tuma medida y a haya su colega di comunicacion disponibel pa tuma medida contra di e programa ‘Pueblo na Palabra.’

Auto a ser kima dilanti di parlamento, airco a wordo cendi na candela, un miembro di fraccion di MEP kier a habri porta pa fanaticonan di e partido por a drenta den e edificio den loke tabata un intento pa percura pa discordia y destruccion y net e mesun lider di MEP aki ta sinti cu el a wordo menasa y cu e tin cu tuma medida.

Esaki ta claramente un intento pa tapa bos di pueblo, pa purba di frena e disgusto cu ta biba den pueblo pa medidanan cu su gobierno a tuma,  cu lo cambia bida di tur hende y crea problema  den tur sector di comunidad.

Un gobierno cu no tin nocion di loke ta gobernacion, cu no tin solucion pa problemanan cu e mes a bisa e lo atende sin tuma medida, y despues di a traiciona pueblo cu promesanan falso, awor Prome Minister tin problema cu disgusto di pueblo cu ta esun cu un biaha mas tin cu bay carga cu medidanan cruel cu su partido MEP semper a impone riba pueblo.

Den henter e asunto aki lo ta bon pa Prome Minister y su gobierno cuminsa realisa cu loke su gobierno ta cometiendo contra pueblo di Aruba, lo wordo condena severamente y pueblo tin su derecho di mustra su disgusto y tin derecho di lanta para y exigi di gobierno pa traha na interes di pueblo y no na interes di solamente amigo y famianan, di sponsor y simpatisadonan,  mientras cu ta pueblo lo tin cu carga cu e abusonan aki,” sr Melvin Tromp ta mustra.

- Advertisement -

DUNA COMENTARIO

Please enter your comment!
Please enter your name here