Home Hudicial Pueblo ta nada contento cu exigencia contra e burdugonan

Pueblo ta nada contento cu exigencia contra e burdugonan

1288
0
SHARE
- Advertisement -

TUR RELATO SEMPER TA MIHOR DEN DIARIO
Lesa full e proceso awe den Corte >> AKI <<
Lesa con e Padrastro a admiti di mata >> AKI <<
Lesa con no tabatin suficiente stul den Corte >> AKI <<

ORANJESTAD (AAN): Algun hende ta yamando nan como “burdugo” caba.  Esta e padrastro y e mama di e dos muchanan, Rishandroh y Eugene, cu a wordo mata.  Y Diabierna merdia ora cu a bira conoci cu Fiscal a exigi 15 aña di prison pa e padrastro, y solamente 4 aña pa e mama, ta fuse di hopi hende a bula.

Diabierna Corte den Prome Instancia di Aruba a trata e casonan contra e sospechosonan Gabriel M. y Risheila F.  E casonan aki ta sali di e investigacion cu e codename ‘Speeltuin’.

E investigacion a cuminza riba 22 di november 2017, despues cu dokternan a constata cu e mucha homber Rishandroh di 5 aña di edad tabata severamente maltrata.  Dos dia despues Rishandroh a bin na fayece a consecuencia di su heridanan.

Den curso di e investigacion a keda constata cu Eugene di 3 aña di edad, ruman homber chikito di Rishandroh, tambe tabata morto. E curpa di Eugene a worde haya riba indicacionnan di Gabriel M. Despues a keda determina cu Eugene a worde dera riba 27 di september 2017.

Eugene y Rishandroh tabata yiunan di Risheila F.

Como pareha di Risheila F., e muchanan tabata cay tambe bao cuido di Gabriel M.

ENCUANTO E PADRASTRO:  Gabriel M. ta worde persigui pa homicidio di Rishandroh y Eugene y pa maltrato serio di e dos mucha hombernan den e periodo prome cu nan fayecimento, mientras cu e muchanan tabata cay bao di su cuido.  E periodo aki a start na augustus 2017.

Banda di e hechonan aki Gabriel M. ta worde persigui tambe pa e maltrato di Risheila F. pa añanan largo y pa a dera curpa di Eugene pa evita e descubrimento di un crimen.

Ministerio Publico a exigi pa huez condena Gabriel M. pa homicidio di Eugene y Rishandroh. Ademas a exigi pa huez condenele pa e maltrato severo pa tempo largo di Eugene y Rishandroh, pa e maltrato largo di Risheila F. y pa sconde e curpa di Eugene.  E castigo maximo pa e delitonan aki ta un castigo di prison di 20 aña.

Expertonan a determina cu Gabriel M. ta verminderd toerekeningsvatbaar, por worde teni menos responsable pa su actonan, tempo cu el a comete e hechonan.  Pa yega na e castigo exigi contra dje, Ministerio Publico a studia casonan comparable y circumstancianan cu lo por haci e castigo mas pisa of menos pisa.

Ministerio Publico a exigi un castigo di prison di 15 aña contra Gabriel M.

Un di e consideracionnan tabata cu Ministerio Publico ta haya necesario cu banda di e castigo di prison mester tambe impone un medida contra su libertad.

Pa e razon aki Ministerio Publico a exigi huez pa impone un castigo di prison y e medida di TBS (terbeschikkingstelling = poni na disposicion di gobierno) cu tratamiento obligatorio (dwangverpleging).

Expertonan riba tereno di comportamiento humano a determina cu Gabriel M. ta sufri di un disturbio di personalidad.

Ademas e expertonan ta kere cu e peligro cu Gabriel M. ripiti delitonan di violencia grave ta sumamente halto, si e no worde trata.

Mirando cu Gabriel M. a nenga yudanza cu a worde ofreci na dje den pasado y pa motibo di e peligroso cu e ta, ta indicativo pa tratele den un clinica cera.

E medida di TBS ta posible na Aruba desde introduccion di e Codigo Penal nobo na 2014.  Si huez dicidi pa sigui e exigencia di Ministerio Publico, anto lo ta prome biaha cu TBS ta worde imponi na Aruba.

E meta di e medida di TBS cu dwangverpleging no ta solamente pa trata Gabriel M., pero tambe pa proteha sociedad contra dje.

Personanan cu a haya TBS cu dwangverpleging ta sali den libertad unicamente despues cu expertonan conclui cu e peligro pa nan ripiti nan hechonan a baha pa un nivel acceptable pa seguridad di sociedad.

ENCUANTO E MAMA: Risheila F. ta worde persigui pa medeplegen (comete hunto) of medeplichtigheid (complicidad) di e homicidio di Rishadroh y Eugene y e medeplegen of medeplichtigheid di maltrato severo di e muchanan den e periodo prome cu nan morto, mientras cu e ta mama di e dos muchanan.

Ademas Risheila F. ta worde acusa di a duna su yiunan insuficiente proteccion.

Ministerio Publico a exigi pa e mama  worde declara liber di e homicidionan y di e maltratonan severo.

Pero tog Ministerio Publico ta haya cu e mester worde condena pa complicidad na comete e crimennan aki y pasobra el a keda sin ofrece seguridad na e muchanan.   Ministerio Publico a exigi un castigo di prison di 4 aña, di cual 1 aña ta condicional.

Na e parti condicional ta mara tres condicion particular.  (1) Esta, cu e ta keda bao supervision di Reclassering. (2) Cu e ta haya tratamiento. (3) Cu e ta prohibi pa tin contacto directamente of indirectamente cu Gabriel M. durante e tempo di prueba di 3 aña di tempo.

E castigo di prison cu Ministerio Publico a exigi contra Risheila F. ta bastante mas abao cu esun exigi contra Gabriel M.  E motibo ta cu e mes no a maltrata of a mata e muchanan.  E ta worde acusa si di a duna Gabriel M. oportunidad pa maltrata e muchanan severamente y mata nan.

Ministerio Publico ta di opinion cu Risheila F. mester a tene e muchanan leu for di Gabriel M. una vez el a haya sa cu e tabata maltrata nan.  Esey sigur cu Rishandroh despues cu Eugene a muri.  A inclui den e exigencia tambe cu Risheila F. mes pa hopi tempo tabata victima di Gabriel M.  Risheila ta ademas un ‘first offender’.

No obstante e splicacion aki, pueblo a reacciona furioso Diabierna riba social media.  Nan ta haya e castigo exigi di 4 aña pa e mama uno ridiculo.  Pa colmo cu e 12 luna di castigo incondicional, tin chens cu e lo por sali hopi mas trempan di prison.

Pueblo a splica, cu nan ta realmente spera cu Huez si lo tin mihor curazon, y cu e si lo por sa di no worry cu e exigencia di Fiscal, y e mes dicidi na impone un castigo mas halto.

© 2018 – DIARIO NV

- Advertisement -

DUNA COMENTARIO

Please enter your comment!
Please enter your name here