Home Comentario Rercordando Manolo cu hopi cariño

Rercordando Manolo cu hopi cariño

55
0
SHARE
- Advertisement -

Comentario

Pa Mercedes Monge

Cu hopi cariño mi ta recorda Manolo, manera tur cu a conoce tabata yame. Manolo e doño di Sam’s. Semper cu mi bin trabao banda di 9 di mainta, of despues di un conferencia di prensa un poco mas laat, mi ta tuma e caminda di Havenstraat pa cana te e Terminal di Arubus.

Generalmente mi ta cruza caminda tuma e banda  di Plaza Daniel Leo pasando dilanti Sam’s pasobra merdia eybanda tin mas sombra cu e otro banda di caminda, pues pa mi scapa un tiki di e solo.

No a falta un biaha, y pa hopi tempo caba, cu ora Manolo wak mi pasa e ta sali yama mi “Maria…Maria”…pasobra mi no sa di con no por a yama mi pa mi nomber. Mi tabata bise “Mercedes, Mercedes” y e tabata hari.

“Bo ta bayendo Diario?…Si Manolo. Warda mi un rato mi mes ta hiba bo…e tabata avisa nan paden, saca yabi di auto, y trece mi. Of si no, mescos e tabata yama mi y bisa mi cu e ta laga un trahador trece mi trabao….

Mi no tabata sa cu e tabata malo ultimamente y cu e tabata na Hospital. Pesey, pa un tempo caba mi no a scucha e “Maria…Maria” y mi no tabata mire bin DIARIO, manera hopi biaha e tabata bishita nos.

Na December ultimo el a bin trece un lampi masha special y a regala cada un di nos un. E tabata un momento hopi special y cu nos cada un a gradicie. Semper cu un smile y haciendo joke, pasobra e tabata gusta hari y laga otronan hari tambe.

Y semper bay su personal ta hopi atento cu e clientela y ta un lugar unda bo ta bay puntra pa algo, of pidi un ayudo bo ta haye, manera ami recien mi a cumpra mi camara cu varios biaha mi a bay puntra ta di con mi no ta wak e imagen, of di con el a pega, anto cu santo pasenshi nan a yuda mi set up bon e camara. Tur esaki door di trahadornan cu a haya den e doño di nan negoshi un persona motiva, cu a sa di trata nan cu respet, cariño y aprecio cu nan ta transmiti e clientenan tambe.

Pues, tanten mi ta sigui den mi profesion, cubri conferencianan di prensa durante e tempo cu Dios permiti mi sigui hacie, y tanten mi ta sigui bin y bay na pia, lo mi pasa e mesun trayecto ey pasando dilanti Sam’s y na dado momento lo mi sinti comosifuera lo mi bay scucha “Maria, Maria, bo ta bayendo DIARIO?” mientras tanto Manolo ta sosega den Paz di Señor sin ningun sorto di malesa, ni tribulacion, cu un smile na su cara y un joke na flor di labio. Mi sincero condolencia na su famia stima y su trahadornan fiel.

- Advertisement -

DUNA COMENTARIO

Please enter your comment!
Please enter your name here