Home Salud Stichting Bloedbank Aruba tin actualmente 1818 donante di sanger fiho

Stichting Bloedbank Aruba tin actualmente 1818 donante di sanger fiho

31
0
SHARE
- Advertisement -

Na Aruba tambe tin Super heroes!

ORANJESTAD   (AAN):  Dia internacional di Donante di Sanger a wordo celebra den gran forma. No solamente a tuma tempo  pa gradici cada donante cu di forma boluntario ta haci donacion di sanger pa salba bida di un desconoci pero alabes a haci uzo di e momento pa asina inspira otronan pa join e team di donantenan den forma di un Opendag cu a atrae hopi hende.

Ya pa algun siman por a nota un accion di e capa cora cu a cuminsa cu algun Super Heroes den e Aruba Bank Walk & Run. Esaki ya a lanta un cierto pregunta ken e hendenan aki ta y pakico nan tin un capa cora bisti. Alabes den mata riba Plaza Daniel Leo y na Linear park a colga capa cora pa asina trece e fiebre di Super Heroe pa dilanti. Durante fin di siman cu a pasa algun boluntario a cana rond den caya grandi y haci nan compra cu nan capa cora na unda hopi pregunta a ser lansa den nan direccion pakico nan ta bisti manera Super Heroe?

Wel awe nos ta kibra e silencio y ta conta cu pa bo ta un Super Heroe bo no tin mester un poder extraordinario. Cu cada donacion di sanger na Stichting Bloedbank Aruba bo ta salbando un bida y esey ta hacibo un Super Heroe!

Imagina cu abo tin e poder di yuda un persona cu por ehempel a caba di perde hopi sanger durante un accident, un pashent cu ta ricibiendo tratamento  di cancer of leukemia, pashentnan cu ta haci dialyse, un parto cu hopi complicacion y hopi otro casonan. Pues ta un donante di Sanger ta hacibo un Super heroe.

Stichting Bloedbank Aruba tin actualmente 1818 donante di sanger fiho, pero esaki no ta suficiente pa henter e comunidad di Aruba. Bloedbank mester di un capacidad di 5% di henter e poblacion di Aruba cu ta mas o menos 6000 donante di sanger. Cu e lansamento di e campaña aki ta spera di trece mas conscientisacion rond di e tematica aki y asina lanta curiosidad kico ta encera ta un donante di sanger.

E campaña aki oficalmente a ser lanza riba Dia internacion di donante di Sanger y lo ta presente riba rednan social. Pero ya pa algun siman a cuminsa cu esaki y den tempo cortico a haya un bon acohida. Esaki no lo tabata posibel sin ayudo di nos Super heroes cu a participa danki an Aruba Bank den e caminata famoso Walk & Run. Tambe un danki na tur e Super Heroes cu a cana cu e capanan den caya grandi y por ultimo e Super heroes cu ta forma parti grandi di e campaña y cu poco poco pueblo di Aruba lo bay conoce mas di cerca.

Danki un biaha mas na cada donante cu ta nos Super heroes salbando diariamente bida. Boso donacion ta un poder extraordinario. Boso tur ta Super Heroe.

Stichting BloedbankAruba kier invita tur hende pa acudi riba nos pagina di Facebook, Instagram  of nos website www.bloedbankaruba.aw y aplica pa bira un donante di Sanger. Nos mester di mas Super Heroe!

- Advertisement -

DUNA COMENTARIO

Please enter your comment!
Please enter your name here