ORANJESTAD (AAN): Recientemente The Ritz-Carlton, Aruba a celebra exitosamente nan “Employee Apreciation Week” pa asina gradici cada un di e Damas y Cabayeronan pa nan desempeño y trabou remarcabel cu ta contribui na e exito di e compania.
Un celebracion cu tur e hotelnan rond di mundo cu ta pertenece na e cadena hotelero Marriott International ta festeha durante mesun siman. The Ritz-Carlton, Aruba como parti di e prestigioso cadena hotelero aki tambe ta dedica na e Employee Apreciation Week.
Dialuna dia 21 di Mei, e apertura di e siman di aprecio a kick start na un manera saludabel cu un ‘Mountain Biking Tour’ y un divertido ‘Watermelon Eating Contest’. Un siman continua cu sorpresa y aventura cu diferente actividadnan cu e Damas y Cabayeronan por a participa pa asina disfruta di nan “Employee Apreciation Week” cu un variashon di actividadnan manera bowling, bingo, baking challenge, paintball, nature walk den Parke Arikok, Catamaran Sail & Snorkel, y un movie night huntu cu famia y amistadnan.
Diaranson dia 23 di Mei a tuma luga un actividad special pa duna bek na comunidad di un forma sumamente bunita y apreciable. The Ritz-Carlton Community Footprints, Marriot Spirit to Serve our Communities, y Aruba Marriott Care Foundation a bai duna un man na Scol Practico pa Ofishi, St. Cruz, modernisando e baño nan di e studiante y dunando nan gymzaal un estilo nobo y tambe chapi pafor di e scol.
Pa clausura e grandioso siman aki e empleadonan di The Ritz-Carlton, Aruba a participa den e evento ‘Beach Olympics’ na Eagle Beach unda por a competi den teams pa disfruta di un atardi agradabel y ameno riba beach mientras tanto construyendo team work na un manera saludabel.
