Home Turismo Turismo a aumenta cu 1.6% durante prome cinco luna di 2018

Turismo a aumenta cu 1.6% durante prome cinco luna di 2018

54
0
SHARE
- Advertisement -

RevPar a aumenta cu 11.9%

ORANJESTAD (AAN): Aruba a yama bonbini na un total di 441.455 bishitante ‘stay-over’ pa e prome 5 luna di 2018. Esaki ta 1.6% (+7.045 turista) mas compara cu e mesun temporada pa 2017.

Si exclui e bishitantenan di Venezuela, por mira un aumento di 6.1% (+25.025 turista) cual ta igual na un total di 410.466 bishitante pa nos isla.

E cifranan ta indica crecemento den mercadonan clave pa Aruba, manera Merca, Canada, Brazil y Hulanda entre otro. Pa mei, Aruba a ricibi un total di 85.430 bishitante stay-over, cu ta 5.5% (+4.455) mas compara cu e mesun luna aña pasa. Excluyendo bishitantenan di Venezuela, por mira cu esaki ta 7.3% (5.564 turista) mas cu ta igual na 81.776 bishitante pa nos isla pa mei 2018.

Turismo ‘stay-over’:

Aruba ta worde representa den tres diferente continente. Compara cu mei aña pasa, pa 2018 e turismo procedente for di e continente Norte Americano a aumenta cu 8.7% (+5.026 turista/total 63.003 turista) y ta trece 73.7% di total di turismo pa nos destinacion. Na mei, Merca a aumenta cu 9.3% (+5.158 turista/total 60.545 turista) y Canada a baha cu 5.1% (-132 turista/total 2.458 turista) compara cu e mesun luna na 2017. Pa e prome 5 luna di 2018, Norte America a trece 346.876 turista pa Aruba, cu ta un aumento di 7.3% (+23.643 turista).

E continente Latino Americano a baha cu 7.4% (-944 turista/total 11.895 turista) unda Venezuela a baha cu 23.3% (- 1.109 turista/total 3.654 turista) compara cu mei aña pasa. Colombia a baha cu 8.3% (-180 turista /total 1.982 turista) y Brazil a aumenta cu 11.8% (+111 turista/total 1.050 turista). E continente di Latino America a trece 13.9% di e total di turismo pa luna di mei na nos isla. Pa e prome 5 luna, Latino America a trece 55.449 turista pa Aruba, cu ta 23% (-16.551 turista) menos compara cu e mesun temporada aña pasa.

Pa loke ta Europa por nota cu turismo a baha cu 5.5 % (-409 turista/total 6.965 turista) compara cu e mesun luna aña pasa. Hulanda a aumenta cu 15.8% (+460 turista/total 3.364 turista), y Reinonan Uni a baha cu 43.2% (-1.251 turista/total 1.643 turista). Esaki ta primordialmente door cu un vuelo charter directo for di Manchester – Inglatera pa Aruba a cay afo pa 2018. Consecuentemente esaki ta causa cu tin menos asiento obtenibel pa biaha directo pa nos destinacion for di e paisnan di Reinonan Uni.

Alemania a aumenta cu 70.1% (+262 turista/total 636 turista). E continente Europeo a representa 8.2% di turismo pa Aruba pa luna di mei. Pa e prome 5 luna, Europa a trece 32.350 turista pa Aruba, cu ta 1.8% menos (-599 turista) cu e mesun temporada aña pasa.

Turismo Crucero:

Durante mei 2018, 40.224 pasaheronan crucero a bishita nos destinacion riba un total di 13 diferente barconan crucero. Compara cu luna di mei aña pasa, turismo crucero a baha cu 22.3% (-11.532 turista crucero): na mei 2017 Aruba a haya 51.756 bishitante for di 19 crucero. Pues 6 barco crucero menos cu aña pasa, di cual 3 crucero mester a bay e asina yama ‘dry-dock’ inesperadamente, loke a contribui na cancelacion inespera cu a percura pa menos bishitante crucero durante luna di mei.

Pa e prome 5 luna di 2018, un total di 404.680 pasahero crucero a bishita Aruba (un aumento di 2.2% +8.780 pasahero mas) riba un total di 173 diferente crucero (un aumento di 1.8% +3 barco mas).

Tourism Receipts / Central Bank of Aruba:

Di acuerdo cu Banco Central e asina yama ‘Tourism Receipts’, pa aña 2017 a contribui cu AWG 3.078.5 miyon den nos economia, cu ta un aumento di 6.5% compara cu e mesun temporada na 2016.

Hotelnan / AHATA

Segun Aruba Hotel and Tourism Association pa e luna di mei 2018, e ‘Average Daily Rate’ (ADR) a aumenta cu 11.1% compara cu mei 2017 Esaki den cifra ta US$ 200.68 na 2017 compara cu US$ 222.94 pa 2018. Pa e prome 5 luna di 2018, ADR a subi cu 8.7% y den cifra esaki ta US$ 292.91. E entrada pa camber disponibel, e asina yama RevPAR a aumenta cu 8.9% di US$ 168.98 na mei 2017 pa US$ 184.06 na mei 2018. Pa e prome 5 luna di 2018 RevPAR a aumenta cu 11.9% – US$ 262.29

E anochinan ocupa (ORN) pa camber a baha cu 1.9% pa mei 2018. Pa e prome 5 luna di 2018 ORN a aumenta cu 2.8%.

E prome 4 luna di 2018 e cifranan di AHATA ta basa riba 14 propiedadnan incluyendo  Holiday Inn Resort  y mayoria di e hotelnan cu excepcion di Hilton Aruba Caribbean Resort & Casino. For di mei 2018 e cifranan ta basa riba 13 propiedad – excluyendo Holiday Inn Resort.

 

- Advertisement -

DUNA COMENTARIO

Please enter your comment!
Please enter your name here