Home Gobierno A stop di deposita desperdicio di cas riba dump Parkietenbos

A stop di deposita desperdicio di cas riba dump Parkietenbos

61
0
SHARE
- Advertisement -

Minister Otmar Oduber:

ORANJESTAD (AAN): Gabinete Wever Croes for di inicio a mustra riba e importancia pa yega na un solucion pa Parkietenbos. Esaki ta un di e liñanan cora pa locual ta trata e maneho hiba pa e Ministerio di Desaroyo Teritorial, Infrastructura y Medio Ambiente. Durante periodo di eleccion e punto aki tabata uno cu tur partido (cu ta forma parti di Gobierno of no) tabata di acuerdo cu ne. Pues cu netamente mester remedia e situacion di Parkietenbos y tambe mehora e forma con ta maneha desperdicio aki na Aruba.

A base di e hecho cu kier yega na un solucion pa maneho di desperdicio y remediacion di dump Parkietenbos, mediante un decreto ministerial, a forma un plataforma di trabao caminda cu a inclui diferente departamentonan di Gobierno manera: TNO, WEB, ATIA como representante di comercio y e bisiñanan di Parkietenbos cu a lucha pa hopi aña pa mehoracion di e situacion cu tin eynan.

E rapport final di e maneho integral aki a worde entrega na Gobierno (den presencia di prensa) unda cu a mustra cu tin fase a termino corto, medio y largo pa por yega na e solucion desea cual ta pa sanea y remedia e dump na Parkietenbos, pa cual actualmente ta den e fase intermediario, mediano.

Minister encarga cu Desaroyo Territorial, Infrastructura y Medio Ambiente Otmar Oduber a anuncia cu desde dialuna 2 di juli 2018, tur locual ta desperdicio di cas no ta bay Parkietenbos mas. Di e forma aki cumpliendo cu un di e compromisonan cu e coalicion a haci cu comunidad di Aruba. Tambe a percura pa tin un proceso tumando lugar caminda cu den luna di augustus/ september ta bin un destaho publico pa e decision cu Gobierno a tuma pa bay den direccion di un incinerator, cu lo mester percura pa un ‘waste to energy technology’ akinan na Aruba pa atende cu nos desperdicio.

Esaki ta significa automaticamente cu ta atende cu remediacion di Parkietenbos caminda cu mester cera Parkietenbos definitivamente y completamente dentro di e periodo di 1 aña y mey. Pa percura cu Parkietenbos ta worde transforma den algo completamente diferente cu locual cu e ta actualmente. Porfin despues di hopi aña ta yegando na soluciona e situaciona aki cu ta uno malo pa nos medio ambiente y salud. Incluso e organizacion reconoci mundialmente, Pan American Health Organization (PAHO) a indica cu algo mester a worde haci mas cu 2 aña pasa considerando e riesgonan cu esaki ta trece cu ne pa nos salud.

E remediciacion di dump tin un costo cu ne, den pasado el a worde posponi na numeroso ocasion. Serlimar como e compania responsabel pa tur locual ta maneho di desperdicio mester por tin e forsa financiero pa por cumpli cu e direccion nobo aki. Pesey actualmente e ta necesario pa conhuntamente comunidad contribui por medio di un tarifa social, na maneho di desperdicio riba nos Isla.

- Advertisement -

DUNA COMENTARIO

Please enter your comment!
Please enter your name here