Home Enseñanza A urgi Minister pa inclui un programa di ‘Summer School’

A urgi Minister pa inclui un programa di ‘Summer School’

95
0
SHARE
- Advertisement -

Parlamentario Ras (MEP): p’e alumnonan cu ta keda sinta den klas 3 di scol secundario

ORANJESTAD   (AAN) – “Mas y mas mi ta convenci cu awo ta e momento crucial pa introduci un sistema di scol di zomer pa enseñansa secundario na Aruba”, asina Parlamentario pa partido MEP, Sue-Ann Ras ta bisa.

Segun e Parlamentario, no ta un secreto, cu hopi di nos hobennan ta perde animo y motivacion pa sigui cu nan estudio, despues cu sea nan a keda sinta of no gradua na un scol secundario.

Biniendo for di enseñansa pa 15 aña, Ras ta fada y cansa di wak tanto potencial y soño di nos hobennan bay benta afo, pa motibo di nos sistema anticua di enseñansa, tanto e maneho como e curiculo.

 

KEDA SINTA OF NO GRADUA

Segun Ras, no mester lubida niun momento so, cu Aruba tin e indice di mas halto den keda sinta den klas 1 di scol basico, cu ta considera como e fundeshi principal di alfabetizacion y formacion academico di un mucha. Awo si nos analisa tambe e cantidad di graduadonan na Aruba den e scolnan secundario, nos sa tambe cu mayoria ta caba EPB, despues MAVO y finalmente HAVO y VWO. “Cu tin un problema den e sistema y maneho di enseñansa ta obvio y mi pregunta ta keda, cuanto mucha y hoben mas nos tin cu sacrifica, pa realmente haci un cambio husto, pa brinda enseñansa di calidad y igualdad?”

Keda sinta ta comproba na varios pais, di no ta funciona y ta trece hopi demotivacion cerca e mucha of hoben”, Ras ta sigui bisa. Mas cu claro tin diferente caso y cada caso mester haya evaluacion individual. Pero loke si ta condenabel ta, ora cu un mucha keda sinta pa 1 of 2 punto, of pa lesamento tecnico, ya cu toch algun scol basico na Aruba ta keda uza e parti di lesamento tecnico (AVI) como un instrumento pa midi y riba dje, como instrumento pa evalua si un mucha ta bay over of no. “Cu mester tin cierto nivel di lesamento, sigur ta e caso, pero esey mester ta uno cu ta husto y igual pa nos muchanan y no loke ta impone como midimento na Hulanda. Mas tristo ta, cu na Hulanda mes ta cana completamente diferente cu AVI lezen,” e Parlamentario a sigui bisa.

 

DEMOTIVACION

E otro problema y demotivacion segun Ras, ta e aspecto di keda sinta pa 1 of 2 vak, pero mas tristo ora ta papia di e famoso 1/10 punt of 1 of 2 punto. Esaki ta netamente e forma cu ta perhudica un alumno emocionalmente djis pa algun punto, mientras cu por bin cu un solucion hopi mas relevante y motivante, p’e toch pasa su aña escolar. “No por ta posibel cu den e temponan aki, un hoben ta keda sinta pa e escogencia di tipo di maneho y sistema anticua di enseñansa y curiculo”. Nos hobennan ta keda sinta na scol secundario pa cierto materia, cu hopi biaha, nan no ta ni scoge den nan pakete pa finalisa scol secundario.

 

MOCION

“Relaciona cu tur esaki, dia 20 di april 2018, mi a presenta un mocion, cu a haya aprobacion unanime, unda ta urgi Minister di Enseñansa pa revisa y bin cu un proposicion di e norma di evaluacion pa e scolnan secundario, specialmente esunnan dirigi riba e klasnan 3 y 4 y mas pronto posibel, specialmente ora ta trata pa scoge pakete pa bay examen”, Ras a continua bisando.

Tambe el a urgi Minister pa inclui un programa di ‘Summer School’ p’e alumnonan cu ta keda sinta den klas 3 di scol secundario, pero esaki mester amplia y bira un programa, pa tur klas, specialmente p’e klasnan di examen den scol secundario. Y finalmente, mester stipula norma nacional p’e scolnan secundario EPB y MAVO mas pronto posibel. Ras ta haci un apelacion urgente na Minister di Enseñansa como tambe Departamento di Enseñansa, Inspeccion di Enseñansa y tur departamento concerni, sinta na mesa y bin cu un solucion y accion mas rapido posibel di revision di e maneho y curiculo di nos enseñansa.

- Advertisement -

DUNA COMENTARIO

Please enter your comment!
Please enter your name here