Home Policial Accident pisa a cobra bida di dos hoben

Accident pisa a cobra bida di dos hoben

1166
0
SHARE
- Advertisement -

Impacto violento entre Hayabusa y Nissan Sentra

ORANJESTAD(AAN): E trankilidad di Diahuebs madruga den diferente bario a ser kibra, ora cu diripiente cantidad di vehiculo di Polis, Ambulans, y Bombero a cuminza mobiliza cu sirena.

Tabata banda di 3:20 am, cu habitantenan cerca di Isla Bonita Mall na Tanki Flip a tende un sonido masha duro mes, indicando cu un accident a keda registra.

E prome yamada a drenta na Central di Polis pa 3:23 am, indicando cu na altura di Tanki Flip 117 un accident serio a keda registra.

Den un frega di wowo Polis a yega, y a core raporta cu na altura di Sun & Shade Optica di un accident pisa, y pa cuminza manda Ambulans.  Nan a mira tambe cu tin dos hende abao riba caminda cu no ta duna señal mas di bida.  Esey automaticamente a pone nan cuminza notifica demas autoridad.

A resulta cu un Nissan Sentra color blauw cu number A-43141 coriendo riba caminda di Noord pa Tanki Flip, na altura di Isla Bonita Mall a dicidi na bira na man robez pa sea haci un U-Turn of a djis bira pa subi parking di e Mall.

Net e momento ey un motorcycle Suzuki Hayabusa color blanco tabata bin di direccion contrario.  E motociclista aparentemente a haya ni chens di primi brake, y cu tur velocidad a dal y pega den e vehiculo.

DESGRACIA VIOLENTO:

E Nissan a keda net na rand pariba di caminda, y tanto e chauffeur y e ocupante a wordo saca violentamente di e vehiculo.  E motociclista lo a dal cu su curpa riba e auto, y pesey a keda benta eybao tambe.  E brommer mes a keda bons y finaliza pabao di caminda.

Ambulans a yega y mesora a yuda cu e chauffeur di e Nissan cu tabata gravemente herida.  Personal di Cuerpo di Bombero a yega pa asina yuda libere for di bao di e vehiculo.

Ora cu a logra stabiliza e persona, nan a transporta e chauffeur Marcel T. di 21 aña rumbo pa Hospital unda el a wordo interna inmediatamente den Unidad di Cuido Intensivo.

Pero su pasahero cu a haya mayoria di e golpi, tabata benta eybao sin duna reaccion mas.  E manehador di e Hayabusa tambe no tabatin pulso mas.  A djis keda warda presencia di Docter.  Mientras tanto a dicidi na tapa e dos curpanan cu paña.

Pa 4:00 am, Dr. Texeir a presenta y a constata morto di e motociclista Dyllon A. Lourens, naci na Aruba dia 1 October 1995, pues tin 22 aña di edad.  E ta mihor conoci como “Buyuyi”.  E ta studiando actualmente na Hulanda, pero aworaki na Juli e ta cu vakantie na Aruba.  E ta un persona cu semper a demostra hopi respet pa su prohimo, y di chikito caba a demostra su amor pa deporte di motociclismo.

Mesun momento tambe, Dr. Texeir a constata morto di Wendell A.R. de Leeuw, naci na Aruba dia 25 December 1995 y e tambe tin 22 aña di edad.  E ta mihor conoci como “Djaka Muis”.  Pa casualidad e tambe ta un person cu tin hopi amor pa e deporte di motociclismo.  E ta bibando na Aruba, pero aki algun dia e tabata prepara pa bay exterior.

INVESTIGACION:

Inmediatamente despues di accident, Polis a cera full e caminda di rotonde Tanki Flip te na altura di Do It Center Shaba.  Autoridad kier compronde pakico e chauffeur di e Nissan a tuma un birada na man robez sin duna preferencia.  Tambe lo kier check di con e no a mira e Hayabusa.  Tambe no tabatin ningun lastro di brake aparentemente riba caminda.

Lo bay check e companianan den vecindario pa mira cual di nan tin Security Video cu por a graba e accident pa asina compronde e desgracia mihor.

A usa spotlight y demas material di investigacion, pa asina tuma midi di tur aspecto di e accident.  Solo a sali, y ainda Polis tabata investigando e desgracia na Tanki Flip.

Loke a hala atencion di hopi hende, ta con e Suzuki Hayabusa a laga e Nissan destrui.  Esaki a bira e di cuatro biaha den historia recien, cu DIARIO ta corda con motorcycle a causa asina hopi destruccion na un vehiculo.

Un Suzuki Hayabusa ta un motorcycle di 4-cylinder, 16-valve, y ta como 2.2 meter largo.  E motorcycle aki tin un peso riba su mes di 266 kilo.  Pero den un impacto, bo ta multiplica esaki cu 3x, y bo ta haya comosifuera e tin un peso di 800 kilo.  Riba e potret por mira con destrui full e auto a keda.  E impacto ta parce di ta net na e parti dilanti di e porta di pasahero.

CHAUFFEUR: E chauffeur di e Nissan Sentra, Marcel T. tabata den estado critico.  Polis a informa cu despues di su yegada na Hospital, el a ser poni den Unidad di Cuido Intensivo, debi na posible hemoragia interno.

Den oranan di atardi, Polis a haya informe cu e pacient a wordo saca di Unidad di Cuido Intensivo y awor ta den piso normal di Hospital, y su estado awor ta stabil.

Vocero di Polis, agente Liliana Rasmijn a mustra cu nan dos a bira e di #3 y #4 di morto den trafico pa 2018.  El a agrega cu Fiscal a tuma e dos curpanan den beslag pa investigacion.

E noticia di e fayecimento aki a laga henter Aruba keda den un tristeza enorme riba Diahuebs.  Specialmente su famia, nan novia, y amigonan cercano a keda hopi tristo mes cu e noticia.

Na famia y demas conocir di tanto Wendell, y tambe Dyllon, DIARIO ta manda palabranan di profundo pesame, y ta desea nan forza pa e dianan venidero.

- Advertisement -

DUNA COMENTARIO

Please enter your comment!
Please enter your name here