Home Hudicial Agente di Polis cu a dal mucha mata cu auto condena na...

Agente di Polis cu a dal mucha mata cu auto condena na 240 ora di trabou pa comunidad y 2 aña sin rijbewijs

337
0
SHARE
????????????????????????????????????
- Advertisement -

Fayo formal den investigacion di Polis a causa cu no por a duna castigo mas pisa

 

ORANJESTAD (AAN) – Manera DIARIO a publica ayera mainta Hues di Corte den Promer Instancia a dicta sentencia den e caso penal cu Ministerio Publico a cuminsa contra e agente di Polis J.V., kende ta wordo haya culpable di a dal e mucha di 12 aña, Zinnia Croes, den Spaans Lagoenweg mata cu auto. E agente di Polis no a presenta pa scucha su sentencia. Ta masha poco biaha sa sosode cu un sospechoso no ta presenta pa scucha su sentencia.

AGENTE NO A PRESENTA

Pa sorpresa di Hues, Fiscal y esnan presente, J.V. no a presenta. Su abogado mr. Lejuez a informa Hues cu J.V. ta sinti hopi malo pa loke a sosode y pesey no tabata kier a presenta pa scucha su sentencia.

   Hues a keda hopi asombra y a bisa cu e ta lamenta cu J.V. no a presenta.

MAL INVESTIGACION DI POLIS A DAÑA TUR COS

Hues a bisa cu e no ta haya legalmente proba e acusacion cu J.V. tabata core bou influencia di alcohol. Hues a mustra cu J.V. a supla e aparato pa midi e grado di alcohol den su rosea y e resultado tabata 300 mcg cu ta hopi mas cu loke ley ta permiti. Sinembargo el a pidi un otro investigacion pasobra e tabata contra e test aki.

   Hues a mustra cu segun ley, ora un sospechoso bisa cu e ta protesta contra e resultado y kier haci un otro test, Polis mester percura pa haci e otro test sino e resultado di e suplamento no por wordo usa como prueba. Door cu Polis a keda sin haci e otro testo, door cu supuestamente no tabatin e aparto, no por usa e resultado di suplamento como prueba contra J.V. Pesey no tin prueba mas y mescos cu Fiscal a bisa, Hues tambe ta haya cu no por prueba cu J.V. tabata bou influencia di alcohol. Hues ta declara J.V. liber di e acusacion aki.

   Subsidiario, Fiscal a acusa J.V. cu riba 13 Maart 2015 el a bebe asina hopi alcohol cu e no tabata apto pa core auto. Hues a mustra cu no por usa e resultado di e aparato di supla manera el a splica ariba. Hues a señala cu Polis no a haci investigacion pa determina si J.V. tabata bou influencia. Na opinion di Hues, Polis por a laga J.V. cana un pidi y haci otro cosnan pa determina cu e tabata bou influencia pero Polis no a haci esaki. Pesey pa e subsidiario tambe Hues ta declara J.V. liber pa e acusacion aki tambe.

A CORE IRRESPONSABEL

Hues a sigui bisa cu si a keda proba e promer acusacion contra J.V. cu ta cu el a core irresponsabel y dal e mucha di 12 aña cu auto cu consecuencia cu e mucha a fayece.

   Hues a cuestiona e forma di core di J.V. Na opinion di Hues, ora un chofer di auto mira muchanan ta cana banda di caminda, e mester ta hopi atento y mester por brake di inmediato den cualkier momento. Esaki pasobra mucha por haci cosnan cu mester brake di biaha.

   Den e caso aki, J.V. tabata core entre 70 y 80 km pa ora, pero no a brake ora el a mira e muchanan ta cana na banda di caminda. Hues a mustra cu J.V. a bisa cu el a hisa pia for di pedal di gas ora el a mira e mucha, pero esaki na opinion di Hues, no ta baha e velocidad di auto di biaha.

GLAS GETINT

   Ademas Hues a mustra cu e glasnan di auto tabata getint scur cu ta dificulta pa wak bon. Tin testigo cu a bisa cu ora e ta core e auto anochi, e mester baha e glas pa por mira riba caminda.

CORE DURO

Hues a sigui bisa cu tin testigo a bisa cu a mira e mucha a mira robez y drechi promer cu a cruza. Pero e auto tabata bin mucho duro. Hues a bisa cu e no ta kere e declaracion di J.V., cu diripiente e mucha a cruza su dilanti. Hues a remarca cu si J.V. a keda paga tino riba caminda, e lo a mira e mucha y lo a brake. Hues ta haya cu J.V. no a mira e mucha cruza y pesey no por a brake na tempo. Hues ta haya cu ta door J.V. su culpa e mucha a fayece.

CASTIGO

   Pa cu castigo, Hues a bisa cu e tin cu tene cuenta cu seriedad di e caso. J.V. a causa sufrimento y dolor na e famia.

   Hues a remarca cu como Polis, J.V. mester tabata sa mihor.

   Hues a bisa cu e tin cu tene cuenta tambe cu no por prueba cu J.V. tabata bou influencia di alcohol, door cu Polis no a haci investigacion manera mester ta.

   Tambe Hues a tene cuenta cu e caso ta data di 2015 y segun ley a surpasa e tempo stipula pa un caso penal wordo trata den Corte. Esey ta trece cun’e cu mester reduci castigo. Hues a bisa cu e ta lamenta esaki pa e famia di e difunto.

   Hues ta haya cu e castigo exigi pa Fiscal ta na su lugar y ta confirma esaki. Hues a condena J.V. na 240 ora di trabou pa comunidad, 24 ora di curso riba consecuencia ora ta core bou influencia. Ademas Hues a ordena pa kita rijbewijs di J.V. pa 2 aña. Tambe Hues a bisa cu si J.V. no cumpli cu e 240 ora di trabou pa comunidad, e lo mester bay 120 dia sera.

- Advertisement -

DUNA COMENTARIO

Please enter your comment!
Please enter your name here