Home Gobierno Ainda “ni o ni la” di ehecucion di e plan social

Ainda “ni o ni la” di ehecucion di e plan social

70
0
SHARE
- Advertisement -

Parlamentario Mervin Wyatt Ras

ORANJESTAD (AAN): Miembro di fraccion di AVP, drs.  Mervin Wyatt Ras a mustra riba e preocupacion cin tin den ultimo dianan, relaciona cu e impacto cu aumento di BBO y BAZV mas otro medidanan di gobierno, tin riba entrada di casnan di famia.

Un preocupacion cu ta sigui crece y cu a percura pa un incertidumbre grandi den comunidad, mirando con tras di otro gobierno ta tratando di saca mas placa for di cartera di pueblo pa financia su maneho.

“Na grandi gabinete Wever Croes a trata di manipula opinion publico cu problemanan social den nos comunidad, hasta a bay asina leu na bisa cu tin un crisis social.  Parlamento a aproba 17 miyon di Florin den presupuesto di aña 2018 pa minister di asuntonan social bay atende cu e crisis cu nan a anuncia.

Un suma cuantioso pero cu ni o ni la di ehecucion di e plan. No por ripara kico lo bay  worde haci. Eigenlijk lo mester aumenta e schoolkinderentoeslag y bijstand pa yuda esunnan vulnerabel pa sobrevivi. En bes di esaki e gobierno aki cu a bisa cu hende ta central pa nan lo hasta kier kita e pleeggezinnentoelage. Spera cu esaki no sosode paso esaki ta bay en contra di derechonan di mucha.

E situacion a bira ainda mas complica despues di prome di juli ultimo, ora cu gobierno a introduci e pakete di medida cu ta for di control, caminda tanto comerciantenan, ciudadanonan  y hasta e propio gobernantenan, no tin control riba kico tin cu worde cobra y kico tin cu worde paga.

Tur e desaroyonan aki lo bay percura pa mas problema social den nos comunidad ya cu pueblo tin menos placa pa gasta, menos placa pa haci algo cu nan famia y esaki ta bay crea un situacion sumamente delicado pa hopi hende. E unico cos cu e minister a haci te awor ta reconoce personanan den e area, loke ta bon pero esey gobierno ta haci pa tapa e hecho cu a insulta tur den sector social ora gobierno a bisa cu nada no a ser haci riba tereno social den 8 aña. Un cos cu  segun parlamentario Wyatt-Ras ta sigur ta cu esunnan den sector social ta traha duro independiente. No manera cu e minister ta kere cu e mester ta henter ora den sociale zaken pa nan por traha. E hecho cu lo bay nombra trahadonan social pa dos aña so tampoco no ta cuadra cu e realidad di guia di problemanan social cu ta di largo duracion. No ta manera un trahador di departamento di belasting cu por ser coloca pa 2 aña pa atende cu cierto achterstand y caba e trabao. Den sector social esaki ta un proceso cu por dura largo. E hecho cu e gobierno aki no ta serio pa loke ta e sector social ta sali na cla ora cu durante tratamento di presupuesto 2018 sin bisa a core entrega un nota di cambio den cual a kita 6 miyon for di e plan social. Asina cu fraccion di AVP a reacciona riba esaki gobierno a core entrega un otro nota di cambio poniendo e suma di 6 miyon back.

Fuera di e pakete di medida, gobierno a aumenta accijns riba gasolin y ta premira cu dentro di algun siman prijs di gasolin lo sigui subi mientras cu riba tereno laboral ya caba tin trahadonan cu ta worde manda cas ya cu e situacion financiero di algun compania, ya no ta mesun cos cu algun luna atras.

Trahadonan cu ta depende di ‘uitzendburea’ ta e promenan cu a worde manda cas y aki nos a papia di un grupo di entre 40 pa 50 trahado mientras cu den otro sectornan ya caba tin trahadonan cu a worde avisa cu nan contract lo no worde prolonga mas, aumentando asina nivel di desempleo.

Den enseñansa tambe tin desaroyonan cu ta hinca pueblo den un situacion preta na momento cu den corto tempo a dicidi cu lo cobra schoolgeld pa aña escolar nobo den un lapso di menos c’un siman, poniendo hopi studiante den problema serio pa cumpli cu esaki y perhudicando nan posibilidad pa atende e proximo aña escolar.

Gabinete Wever Croes a sigura tur hende cu nan tin solucion pa tur cos sin cu mester tuma medida  pero e unico accion concreto cu e gobierno aki a tuma, ta di asota pueblo cu diferente medida y persigui trahadonan pa pone nan hendenan.

Pueblo no tin perspectiva na e momentonan aki cu cosnan lo drecha, cu cosnan lo bay cambia y ainda gobierno tin decisionnan pa tuma cu lo sigui crea mas problema financiero pa comunidad cu na su turno lo sigui empeora e situacion social y financiero di nos hendenan mas ainda,” Parlamentario Mervin Wyatt Ras a declara.

- Advertisement -

DUNA COMENTARIO

Please enter your comment!
Please enter your name here