Home Turismo Air Century lo bula tres biaha pa siman

Air Century lo bula tres biaha pa siman

44
0
SHARE
- Advertisement -

ORANJESTAD   (AAN):   Diamars mainta a duna bonbini oficial na e vuelo inaugural di e aerolinea Air Century.  Durante un ceremonia na Aeropuerto Reina Beatrix a ricibi e ehecutivonan di e compania hunto cu e prome pasaheronan cu a yega Aruba.

Di parti di Aruba Airport Authority NV (AAA NV) a hiba palabra Sra. Barbara Brown, Sr. Oslin Toppenberg di Aviation Ground Services (AGS) y tambe Sra. Arantxa Chain, Marketing Manager di Air Century.

Barbara Brown a laga sa cu AAA NV ta hopi contento cu e yegada di e aerolinea cu ta bay cubri e ruta entre Aruba y Santo Domingo (Isabella International Airport).

Un di e obhetivonan di aeropuerto semper ta aumenta e conexionnan entre e region di Caribe y naturalmente e inicio di e operacion di e aerolinea aki lo sirbi e meta aki, a agrega.

Air Century ta bira e aerolinea number 28 operando desde Aeropuerto Reina Beatrix y tambe ta bira e di 32 ruta directo desde Aruba pa Santo Domingo.  “Nos ta felicita boso y nos ta spera mas vuelo y mas rutanan desde Republica Dominicana”, e representante di Aruba Airport Authority NV a expresa.

Na otro banda, Sr. Oslin Toppenberg di AGS a manifesta cu nan ta complaci. Despues di un trabao intenso conhuntamente cu gerencia di Air Century a yega na e conclusion cu no tabata tin ningun impedimento pa por a traha cu e compania.

Di parti di Air Century, Arantxa Chain a duna di conoce cu e vuelo aki tabata tin e meta di resolve e necesidad di un vuelo directo entre Republica Dominicana y Aruba.

Manera ta conoci, recientemente, PAWA a stop su operacion y e ruta aki a keda sin un aerolinea cu por a duna servicio di transporte comercial entre Aruba y Santo Domingo.

Awor, Air Century ta inicia su operacion cu tres vuelo pa siman (Diamars,  Diahuebs y Diadomingo). E frecuencia lo wordo incrementa pronto conhuntamente cu e incorporacion di avionnan nobo Bombardiers CRJ 200, e ehecutivo di e aerolinea a indica.

Chain a bisa tambe cu esaki ta bira un oportunidad a largo plazo cu lo contribui pa fortalece e relacion entre e paisnan ademas di aumenta e relacion comercial y e intercambio turistico cu beneficionan pa ambos partido.

El a gradici e sosten di e autoridadnan di Aruba, di Minister di Turismo y di e ehecutivonan di Aruba Airport Authority cu a yuda haci e vuelo aki posible.

 

 

- Advertisement -

DUNA COMENTARIO

Please enter your comment!
Please enter your name here