Home Actividad Especial Alumnonan di Scol di Musica Rufo Wever a presenta na e Concierto...

Alumnonan di Scol di Musica Rufo Wever a presenta na e Concierto Dominical Donny Lacle

20
0
SHARE
- Advertisement -

ORANJESTAD   (AAN):  Recientemente alumnonan di Scol di Musica Rufo Wever bou guia di e docentenan Hester Matthijsse, Rob Rijnbout, Ryan Maduro y Johnny Croes a duna un presentacion na e Concierto Dominical na Biblioteca Nacional.
E concierto a cuminsa cu e ensemble di fio bou direcion di Hester Matthijsse cu a presenta un repertorio varia di musica clasico, popular y folklore acompaña ariba piano pa Rob Rob Rijbout. Despues a sigui Carienne de Cuba ariba piano cu a toca “Arubanita” di Rufo Wever acompaña pa e alumnonan di fio.
Como solista ariba piano, Ivan Ponson a duna un bunita interpretacion di e “Minute Waltz” di Frédéric Chopin. Justin Pena y su docente Ryan Maduro a toca den duo ariba guitara dos obra clasico y como solista Justin a toca e wals “Pabien na tur tata” di J.C. Padu Lampe, e polka “Fiesta” di Rufo Wever y “Preludio Criollo”di Rodrigo Riera. Aki algun siman Justin lo biaha pa Hulanda na unda e lo sigui cu su estudionan na ArtEZ hogeschool voor de kunsten na Zwolle.
Pa termina e ensemble chikito di Scol di Musica Rufo Wever a toca “Sabrosita”, un tumba di Rufo Wever.
Mi kier a gradici Sra. Mayra de Graaff, e comision Concierto Dominical Donny Lacle y Biblioteca Nacional pa duna e alumnonan di Scol di Musica Rufo Wever un biaha mas e oportunidad pa nan por a presenta den e concierto aki y tambe na e publico cu tabata aplaudi e alumnonan despues di cada presentacion. Esaki sigur ta un gran estimulo y ta contribui enorme na nan desaroyo musical.

- Advertisement -

DUNA COMENTARIO

Please enter your comment!
Please enter your name here