Home Gobierno Aruba cu logro durante Reunion entre Ministernan di Husticia di Reino tocante...

Aruba cu logro durante Reunion entre Ministernan di Husticia di Reino tocante RST

78
0
SHARE
????????????????????????????????????
- Advertisement -

Minister di Husticia mr. Andin Bikker:

ORANJESTAD (AAN) – Gobierno a tene su conferencia di prensa di Diahuebs, den cual a participa Minister di Husticia mr. Andin Bikker, y su prome punto di agenda tabata e reunion entre e cuater Ministernan di Husticia di Reino, cu a tuma lugar na Bonaire.

E mandatario a cuminza, informando cu nan a avanza riba diferente tema y yega na acuerdo, y den esaki a logra haya mas tempo pa defini e punto di bista di Aruba, pa loke ta trata e Acuerdo di Cooperacion encuanto e Recherche Samenwerkingsteam (RST).

E dignatario a haya na su lugar splica mas tocante kico RST ta. Minister Bikker a indica cu for di 2001 a yega na un acuerdo, e tempo ey cu Hulanda y Antiyas, pa coopera den e temanan di investigacion specializa di Recherche riba crimen cu ta traspasa nos fronteranan. Criminalidad no ta atene su mes na fronteranan local pero hopi biaha tin operacionnan internacional y pa combati y preveni esaki mester ta proactive.

Den e sentido aki, for di 2001 a bin cooperacion no solamente cu Hulanda y Antiyas pero tambe cu Merca y otro paisnan, Interpol, etc.

E tema di RST ta reglamenta den un Protocol di 30 di November. Na Januari 2017 diferente asesor a bay di acuerdo y a propone pa revalua e protocol di 2001 y un team a wordo instala.

Nan a bin cu un recomendacion cu a drenta na fin di Mei, cu mester a bin mas tempran, na opinion di mr. Bikker. Den Juli nan a reuni y papia riba dje, pero ta asina amplio cu Aruba no por a reconoce su mes den dje.

E ora ey a pidi pa extende e periodo te Januari pa por studia esaki mihor, y na prome instante tabata tin diferencia di opinion cu e partnernan di Reino, cu kier a sigui riba e punto aki y cu Aruba a bay hunto cu nan.

Minister Bikker a expresa cu el a keda firme riba Aruba su punto di bista pa bisa no, cu mester di mas tempo; cu nan ta di acuerdo cu e cooperacion di Recherche cu ta traspasa frontera pa combati y preveni criminalidad organiza, pero mester di mas tempo pa defini su puntonan y studia e documento mihor.

Awor e combersacion a sigui na Bonaire y Aruba a mantene su punto di bista, habri claro pa combersa riba e tema pasobra Aruba kier coopera riba e tema di Recherche Samenwerkingsteam, pero Aruba mester sinti su mes confortable cu loke e ta bay di acuerdo cune, y loke e ta defini y compronde den kico y cu kico ta bay di acuerdo cune.

E extension di tempo a wordo logra y tambe pa defini diferente punto di preocupacion cu ta haci cu Aruba no ta di acuerdo cu e documento.

Pa pone un ehemplo, e dignatario a indica cu tempo Curacao y Sint Maarten a haya nan Status Aparte, esaki ta diferente na esun di Aruba. Pa loke ta trata e cuadro hudicial,  nan tin diferente ley federal (rijkswet) riba e documento di cual Curacao, Sint Maarten y Hulanda ta di acuerdo cune, pero no Aruba. Nan ta den libertad di reglamenta nan aspecto di Husticia, pero Aruba tin su propio leynan pa reglamenta esakinan.

Por ehemplo, Aruba tin un Procurador General, pero Curacao y Sint Maarten tin un PG comparti.

Y asina tin diferente rijkswet cu ta reglamenta aspectonan di Husticia cu Aruba no tin, mr. Bikker a splica.

El a expresa cu “bo no por bin cu un bachi cu ta fit tur hende” pasobra nos Status Aparte ta apart, entre otro, pa loke ta trata husticia.

Den e leynan federal di Curacao y Sint Maarten tabata tin un pilot, un team cu yama “Team Bestrijding Ondermijning  Criminaliteit” (TBO), cu den e documento cu nan kier pa Aruba bay di acuerdo cune, constantemente ta wordo menciona cada bez. Minister Bikker a subraya cu Aruba kier evita pa via nos porta di cushina bin cu leynan federal cu nos pais no ta participe di nan. Na Bonaire e mandatario a splica cual ta Aruba su preocupacion y nan a compronde esaki, y cu e futuro protocol di RST tin nada di haber cu e team special TBO cu ta specificamente diseña pa Curacao y Sint Maarten y no pa Aruba. Asina aki tin mas punto cu e mandatario a keda splica na mesa, y awor e por bisa cu Hulanda, Curacao y Sint Maarten, y mas bien Hulanda, ta comprondiendo mihor kico ta Aruba su obhecionnan inicial pa loke ta trata e documento, y nan a yega riba varios punto di aclaracion.

- Advertisement -

DUNA COMENTARIO

Please enter your comment!
Please enter your name here