ORANJESTAD (AAN): ATIA ayera a emiti un comunicado relaciona cu e accion di douaneronan y a splica lo siguiente:
“Awe mainta Douane, pa motibo di malcontento, a dicidi reuni durante ora di trabao pa
asina ricibi atencion di minister di Finanzas.
ATIA atrobe ta asombra con facil ta gara e arma di “reuni” of “strike” pa pone forza na exigencianan, sin tene cuenta na e daño cu ta wordu hasi na comercio, consumidor I henter economia di Aruba.
E “reunion” ta wordu programa exactamente riba e dia cu e barco di container principal ta yega for di Miami, hasiendo e daño maximo na comercio di Aruba.
Nos ta enfrentando caba cierto retonan cu productividad serio cu bahamento di container cu gobierno ta poniendo prioridad pa trata na soluciona.
Tur sindicato tin derecho pa pone forza y exigi atencion ora esaki ta necesario, pero gara e hacha di para trabao, cortando adernan principal di economia di Aruba, ta un arma cu mester wordu uza cu hopi cautela mirando e daño irreparabel cu ta causa na nos pais.
ATIA ta expresa un vez mas su preocupacion pa e acto di awe mainta y preocupacion pa su consecuencia. Tene henter un pais rehen pa pone forza pa negocia, ta mustra di ta un actitud cu e exigencia semper mester wordo cumpli cune of ta hasi mas daño na economia?” , ATIA ta puntra finalmente.
