Home Gobierno CEDE Aruba ta sera convenio cu Gobierno di Aruba y Samenwerkende Fondsen

CEDE Aruba ta sera convenio cu Gobierno di Aruba y Samenwerkende Fondsen

135
0
SHARE
- Advertisement -

ORANJESTAD (AAN): Siman pasa Diaranzon, tabata un dia historico pa CEDE Aruba y tur e fundacionnan cu ta trece iniciativa nobo ariba tereno social. Gobierno ta reconoce e papel importante cu Iniciativa Priva tin den desaroyo di sector social den nos comunidad.

Sin e esfuersonan y logronan di e gran cantidad di fundacionnan cu ta traha incansabel riba e tereno social riba nos isla, Aruba lo no ta caminda nos ta awe. Riba e dia historico aki CEDE Aruba ta consolida e coopercacion cu Gobierno di Aruba y cu Samenwerkende fondsen Caribisch Deel van het Koninkrijk di Hulanda na bienestar di nos fundacionnan y pueblo di Aruba en general.

Aunke Aruba ainda tin masha hopi reto ariba tereno social, fundacionnan diariamente ta contribui na ayudo y actividadnan pa nos grandinan, pa nos muchanan, mayornan y personanan cu limitacion.

Fundacionnan a tuma iniciativa pa lanta internaat, ayudo pa victimanan di violencia, ayudo pa mamanan jong, screening y sosten na famianan vulnerabel, cuido di baby y anciano na cas, rehabilitacion di hende cu adicion, actividadnan recreativo y deportivo den bario y hopi mas. Hopi di e iniciativanan a cuminsa y a ser haci posibel door di fondonan di CEDE Aruba y Samenwerkende Fondsen.

Cu e convenio aki, Gobierno ta percura cu CEDE Aruba, despues di un debido evaluacion, por aloca e fondonan na fundacionnan cu tin proyectonan pa fortifica bienestar di nos hendenan riba  tereno social. Samenwerkende Fondsen, cu ta traha na bienestar di henter Reino, tambe ta forma parti di e convenio y ta consolida e cooperacion cu CEDE Aruba.

Samenwerkende Fondsen ta consisti di  6 fondo Hulandes: Kansfonds, Oranje Fonds, Stichting Kinderpostzegels, Fonds Sluyterman van Loo, Innovatiefonds Zorgverzekeraars y Roomsch Catholijk Oude Armen Kantoor (RCOAK). Pa cada 1 Florin cu CEDE Aruba ta hinca den un proyecto cu a ser aproba, Samenwerkende Fondsen na su turno ta pone 1 of mas Florin despues cu nan tambe duna nan aprobacion na e proyecto segun nan maneho. Asina ambos partido ta contribui na bienestar di nos isla y ta reconose e conosimento y experiencia cu CEDE Aruba a desaroya durante tur e añanan.

CEDE Aruba ta un fondo di desaroyo cu ta existi for di  1980. Akinan ta desea di duna un reconocimento special na Sr. Jan Meelis, fundador di CEDE Aruba. Durante e prome 20 aña di su existencia, CEDE Aruba a ricibi fondonan di Gobierno Hulandes.  Den e periodo di 2001 te cu 2010, CEDE Aruba a cuminsa ricibi fondo pa medio di Fondo di Desaroyo di Aruba, a base di un acuerdo entre e Gobiernonan di Aruba y Hulanda. Desde 2011, Gobierno di Aruba a sigui percura pa financiamento di CEDE Aruba. CEDE Aruba y Samenwerkende Fondsen ta contribui cu un promedio di 2,8 miyon Florin na proyectonan den nos comunidad y e montante aki lo sigui  crece. Cu e convenio nobo aki, e cooperacion a haya un perspectiva nobo.

E convenio cu a ser firma  ta regla e contribucion financiero di Gobierno y Samenwerkende Fondsen na Inititavia Priva atravez di CEDE Aruba  y e responsabilidadnan di CEDE Aruba, cu ta entre otro: un bon gobernacion, un bon administracion financiero y un posicion independiente di politica, religion y interes comercial. E protocol ta valido pa un periodo di 5 aña. E firmamento di e convenio a tuma luga door di e miembronan di directiva di CEDE Aruba y Gobierno di Aruba, representa pa Minister di Asunto Social y Labor, Sr. Glenbert Croes y Minister di Finanzas, Economia y Cultura ad interim, Señora mr. Evelyne Wever-Croes y Samenwerkende Fondsen, representa pa Señora Drs. Henriette Hulsebosch y Sr. Drs. Peter Douwes.

Directiva di CEDE Aruba ta gradici Gobierno di Aruba y Samenwerkende Fondsen pa nan confianza y coperacion durante tur e añanan y cu a haci posibel pa realisa e etapa nobo aki na vanguardia  di  sector social. E directiva di CEDE Aruba ta consisti di Sr. Amy Lasten (presidente), Sr. Leonardo Reyes (tesorero), Señora Merl- Serrant-Gibbs (secretaria saliente), Señora Georgine Arends (tesorero saliente), Señora Estella Brown-Thode (miembro), Señora Sheila van Veen (miembro), Sr. Fredis Refunjol (miembro) y Sr. Igmar Reyes (miembro). Bureau di CEDE Aruba tabata representa pa Sr. Daniel Tecklenborg (Director) y Sr. Bryan Krosendijk (Coordinador di Proyecto). Tambe tabata presente Señora Diet-Booi Staring (prome director di CEDE Aruba).

- Advertisement -

DUNA COMENTARIO

Please enter your comment!
Please enter your name here