Home Social Celebracion fiesta di Santa Anna patrona di parokia Santa Anna Noord

Celebracion fiesta di Santa Anna patrona di parokia Santa Anna Noord

103
0
SHARE
- Advertisement -

ORANJESTAD (AAN): Tur 26 di juli Iglesia Catolico ta celebra e fiesta di e mayornan di Santisima Birgen Maria y welonan di Hesus: San Joaquin y Santa Ana.

San Joaquin y Santa aña ta e mayornan di Maria, Mama di nos Salbador, Hesucristo. Nan tabata tin e privilegio di ta e welonan di Hesucristo. Nan a pasa nan bida cu adoracion di Dios y haci obranan bon. Tradicion ta bisa cu nan a biba na Galilea y despues a bay establece na Herusalem.

San Joaquin ta worde describi como un homber masha piadoso y prominente, rico y respeta pa e pueblo. E ta descendiente di e cas di David.  Sin embargo hende ta papia cu su esposa tabata steril como cu e tabata tin bastante tempo casa cu aña y no a engendra ningun yiu. E sumo sacerdotea rechasa Joaquin y su sacrificio pasobra pueblo hudiu a interpreta e falta di yiu di su esposa como un señal di desagrado dibino, un castigo di Dios pa su descendencia. A consecuencia di esaki y pasobra e tabata carga un tristesa enorme  Joaquin a retira su mes den desierto na unda el a yuna y haci penitencia durante cuarenta dia. E pareha a resa fervientemente pa e gracia di tin un yiu y nan a haci un promesa cu nan lo dedica nan prome yiu na servicio di Dios. aña a priminti di consagra e baby na Dios. Como contesta na nan oracion y sacrificionan, un angel a aparace na aña y a bisa:

“Señor a mira bo tristesa y bo lagrimanan; bo lo concebi y duna lus y e fruta di bo bariga ta worde bendiciona pa henter mundo”.

Joaquin tambe a haya e mesun mensahe di e angel. Dios a contesta nan oracion den un forma mucho mas miho cu nan por a imagina hamas. Joaquin a bolbe mas lat pa Herusalem y a brasa su esposa aña cu hopi emocion na e porta di e ciudad.

Joaquin y aña ta e patrononan santo di welonan. aña ta e patrona di e muhernan cu ta traha y e muhernan cu tin problema pa concebi.

Parokia Santa Anna di Noord ta celebra e fiesta e aña aki cu un nobena di Santa Eucaristia den e barionan di pueblo di Noord cu ta cuminsa diamars 17 di juli. Tur dia lo tin celebracion di Santa Eucaristia na un cas di un parokiano den 5 barionan di Noord.

Diaranson 18 juli: Famia Mena y Bito Tromp / Turibana 23;

Diahuebs 19 juli: Famia Ola Figaroa / San Miguel 8-R;

Diabierna 20 juli: Famia Lourdes Gei / Rooi Santo 2;

Dialuna 23 juli: Famia Dora Figaroa / Alto Vista 60;

Diaranson 25 juli Famia Edna y Lourdes Zievinger / Sabana Liber 50.

Diamars dia 17 y 24 di juli lo tin Santo Sacrificio di Misa na Kapel di Alto Vista pa 5.30 di atardi. Y diasabra dia 21 pa 7ór di anochi y diadomingo 22 di juli pa 6ór lo tin Santo Sacrificio di Misa den iglesia Santa Anna. E unico dianan cu ta resa Santo Rosario ta na kapel y den iglesia 1 ora prome cu e Santo Sacrificio di Misa.

Diahuebs dia 26 di juli lo tin e celebracion solem cu ta cuminsa cu un procesion cu ta sali for di Centro Deportivo Frans Figaroa pa 5.30 di atardi rumbo pa iglesia Santa Anna. Aki lo tin e misa solem pa 6or di anochi. Tur gruponan pastoral, muchanan di tur e schoolnan di Noord, gruponan di deporte di Noord, y fielnan y parokianonan di Parokia Santa Anna y henter e pueblo di Dios di Aruba, ta worde invita pa bin participa na e celebracion solem aki. Despues di e celebracion eucaristico lo tin un brindis den e hofi di Misa Santa Anna.

- Advertisement -

DUNA COMENTARIO

Please enter your comment!
Please enter your name here