Home Economia Confrontacion cu CAft y Hulanda ta inevitable pa falta di seriedad

Confrontacion cu CAft y Hulanda ta inevitable pa falta di seriedad

326
0
SHARE
- Advertisement -

Fraccion di AVP

ORANJESAD (AAN): Mientras cu dianan ta pasando y tempo a cuminsa preta,  por mira cu e falta di seriedad di gabinete Wever Croes, ta pone c’un confrontacion y hasta un KB ta bay bira inevitabel.

Ta conoci cu prome minister a priminti tanto CAft como gobierno Hulandes, cu su gobierno lo bay reduci gasto di personal cu 12 miyon Florin pero tur loke por worde nota den e dianan aki, ta cu practicamente henter gabinete Wever Croes ta den exterior cu vacacion.

E seriedad di e asunto ta mustra di no tin prioridad di e actual gobernantenan pero di tur observacion cu gobierno a haci con e lo bay reduci e suma di 12 miyon aki, no ta conoci ainda mientras cu no tin mucho tempo cu a keda.

Fraccion di AVP ta mustra cu henter e areglo di vut no a worde anuncia y parlamento ainda no a worde informa di e palabracion cu gobierno a haci cu tanto CAft como gobierno di Hulanda con lo bay yega na e reduccion menciona.

Prome Minister ta nenga rotundamente cu lo bay retira trahado for di servicio di gobierno pero no a aclaria con lo bay reduci 12 miyon di Florin mientras cu ainda nombramento di hende den servicio di gobierno, ta continuando na diferente departamento.

No solamente no tin claridad riba e medida cu gobierno lo bay tuma, tur cos ta mustra cu entre e ministernan mes no tin palabracion concreto riba kico por haci y kico no por haci, ya cu tin minister cu ainda ta sigui tuma hende den servicio.

Falta 42 dia pa gobierno entrega presupuesto 2019, cu tur cambionan palabra pero tur cos ta mustra cu gobierno ainda no a compronde e seriedad di e situacion y no ta haciendo e esfuerso cu e proceso aki  ta rekeri y por tuma nota cu tin ministernan ta mas den exterior cu nan ta na Aruba, creando mas gasto  pa gobierno na luga cu nan traha mas duro pa reduci e gastonan aki.

Pa gabinete Wever Croes ta birando asina facil pa tuma medida contra pueblo, pa chica cartera di pueblo cu nan mes haci sacrificio pa logra un meta cu prome minister mes a palabra cu Hulanda.

Ta trata di di mesun palabracionnan haci cu cual prome minister a mustra su alegria cu su gobierno lo no haya un KB for di gobierno di Reino pero tumando na consideracion e ultimo desaroyonan cu tin, tur cos ta mustra c’un confrontacion lo ta inevitabel den loke ta resta di e aña aki.

No tin dialogo tumando luga, no tin indicacion di loke ta worde prepara pa yega na e palabracion haci y simplemente  e falta di capacidad pa goberna e pais, ta sigui resalta mas cu tur cos.

CAft den un comunicado emiti ta mustra entre otro cu “pa 2018 gobierno lo tuma medida cu mester reduci gasto di personal cu 12 miyon Florin,” pues  ta loke a worde palabra tin cu worde ehecuta den loke a keda dianan cu a resta.

No solamente gobierno tin a tarea grandi aki pa ehecuta pero na mes momento gobierno ta worde confronta diariamente cu desaroyonan negativo cu a surgi door di e pakete di medida cu a worde introduci di prome di juli ultimo, cu a percura pa un caos formal.

- Advertisement -

DUNA COMENTARIO

Please enter your comment!
Please enter your name here