Home General Corte Superior a pospone caso asalto arma na Superior Tobacco

Corte Superior a pospone caso asalto arma na Superior Tobacco

81
0
SHARE
- Advertisement -

Abogado mr. v.d.Biezen ta señala cu lo por a bruha den dos ruman

ORANJESTAD (AAN) – E acusado J.W. a apela contra su condena y e caso a bin dilanti den Corte Superior pero pro forma. E acusado J.W. a apela pasobra e no ta di acuerdo cu e ta wordo acusa di a participa den e asalto arma na Superior Tobacco. E abogado a pidi pa pasa imagennan di video cu tin di e asalto arma pasobra e abogado ta sospecha cu lo a bruha den J.W. cu su otro ruman L.W.

POR A BRUHA DEN DOS RUMAN

Abogado di J.W., mr. v.d.Biezen, a bisa Hof di Corte Superior cu a apela e acusacion riba asalto cu violencia. El a pidi Hof pa pasa algun imagen di e video di seguridad cu a graba e asalto arma durante tratamento di e caso den Corte. Na opinion di e abogado, lo mira tres persona ta asalta e trahador di Superior Tobacco y un di e personanan ey ta e ruman homber di J.W., esta L.W., kende a wordo condena na 4 aña di prison.

E abogado tambe a pidi Hof pa inclui e procesverbaal di e ruman di J.W., L.W. den e caso aki pasobra e abogado ta haya esaki ta importante.

Na opinion di mr. v.d.Biezen, ambos ruman tin tattoo na nek y e abogado ta haya importante pa mira esaki riba e reconocimento di potret pa saca afor si a bruha den e rumannan.

Procurador General a bisa Hof cu e no tin nada contra esakinan.

CASO POSPONI

Hof a bisa cu ta pospone e caso pa 20 Augustus 2018 caminda lo bay trata e caso.

E acusacionnan cu tin contra J.W. ta cu dia 18 Augustus 2017 a participa den un asalto arma riba trahador di auto di Superior Tobacco. Mas cu 600 carton sigaria a horta cu ta balora na mas 70 mil florin di balor. Tambe ta acusa J.W. cu 15 September 2017 e tabatin un arma di candela y na October 2017 a horta for di un supermercado.

Dia 9 Maart 2018 sentencia a cay pa J.W. Hues ta haya J.W. culpable di ladronicia di e supermercado y e asalto arma riba e chofer di e Van di Superior Tobacco. El a aproba e demanda di daño di e supermercado cu ta mas cu 5 mil florin. Hues a condena J.W. na 4 aña di prison, kitando e tempo cu e ta sera den KIA. Ademas Hues a ordena pa paga Superior Tobacco 50 mil florin, supermercado mas cu 5 mil florin. Medida pa paga e danjo via Ministerio Publico.

Na Mei 2018, sentencia a cay pa e ruman di J.W., esta L.W. Hues a bisa cu e ta haya legalmente proba cu L.W. a participa den e asalto arma riba e empleado di Superior Tobacco hunto cu otronan. Tambe Hues ta haya L.W. culpable di ladronicia na un cas na Bakval cu otronan. Tambe a keda proba ladronicia for di un camber di hotel y un cas.

Pa cu e castigo, Hues a bisa cu e ta tene cuenta cu hunto cu otronan, L.W. a haci e asalto arma cu violencia riba e trahador di Superior Tobacco den dia cla. Esaki a shock henter comunidad y a crea sentiment di inseguridad den comunidad. Pa cu e ladronicia for di turista den un camber di hotel, Hues ta haya cu L.W. a tacha imagen di Aruba. Turistanan ta bin Aruba pa relaha y no bira victima di ladronicia. Hues a tene cuenta cu e carchi di castigo cu ya caba tin condena pa casonan similar.

Hues a bisa cu e demanda di daño di 50 mil florin di Superior Tobacco ta keda aproba. Ademas Hues a aproba e demanda di 500 florin pa e persona di un cas cu a wordo horta. Hues a bisa cu e ta pone e medida di demanda di daño. El a condena L.W. na 4 aña di prison, kitando e tempo cu e ta sera den KIA.

Dia 20 di Augustus 2018 lo bira interesante pa saca afor si abogado mr. v.d.Biezen tin razon of no.

- Advertisement -

DUNA COMENTARIO

Please enter your comment!
Please enter your name here