Minister Bikker a splica:
ORANJESTAD (AAN) – Minister mr. Andin Bikker a toca, finalmente, den conferencia di prensa di Diahuebs, un punto cu ta regarda DIMAS y cu ta relaciona cu e investigacion cu tin riba ex-Minister Paul Croes, y cu por resulta cu tin un grupo unda husto ta paga pa picador.
E mandatario a referi na un situacion cu e gobierno actual a hereda, indicando cu ora nan a drenta den gobernacion, el a haya acerca e cartera encarga cu DIMAS.
E mandatario a tuma nota cu, door cu ex-minister Paul Croes a bira sospechoso den pasado y tin un caso legal ainda andando, el a firma y duna aangeving, etc.,( y mester wak kico lo ta e resultado di e caso), a bin duda durante un grupo di caso cu a cay den e investigacion, unda cu tin husto ta paga pa picador.
Esaki den sentido cu tin un cantidad di dossier cu mester wak si ta cay den e caso di sr. Paul Croes of no.
E dignatario a declara cu ora el a drenta den gobernacion, a laga haci un screening profundo pa wak kico ta pasando cu e dossiernan concerni, y te awo no ta hayando ningun indicacion cu e personanan aki lo a haci nan mes culpable di algo, di locual sr. Croes ta wordo sospecha di dje.
E ta algo hopi fastioso, segun e mandatario, pasobra e personanan aki ta keda manda carta, tin di nan a busca abogado y a lanta caso, etc., y nan ta keda sostene cu nan no tin nada di haber cu locual sr. Croes ta wordo sospecha.
E mandatario a subraya cu gobierno a haci un analisis profundo di e caso aki, y no a haya ningun indicacion cu tin algo cu no ta corecto, y aworaki lo instala un comision pa haci un ultimo screening y duna conseho riba esaki, despues di analiza cada dossier.
Basa riba e conseho di e comision aki, lo tuma un decision pa asina gobernacion por sigui, y pa e personanan concerni lo tin certeza pasobra e impresion ta cu husto ta pagando pa picador.
Si den cualkier di e casonan aki e comision ta duna advies cu e personanan por haya vergunning, y despues ta resulta toch den e cuadro di investigacion cu e impresion cu tabata tin no ta corecto, na tur momento por retracta e permiso aki.
E mandatario a reitera cu no obstante cu e situacion aki ta hereda gobierno tin cu tuma decision, y no por tene un grupo den un situacion di incertidumbre pasobra tin un ex-mandatario cu ta den investigacion.
E investigacion preliminar ta indica cu e casonan menciona tin nada di haber cu e asunto di ex-minister Paul Croes, pero nan a cay net den e temporada ey y gobierno lo kier trece aclaracion riba esaki.
