Home Gobierno Den seis luna 856 persona a wordo deporta for di Aruba

Den seis luna 856 persona a wordo deporta for di Aruba

332
0
SHARE
- Advertisement -

Sin radar y sin helicopter

ORANJESTAD (AAN) — Minister di Husticia, mr. Andin Bikker, durante e prome conferencia di prensa semanal gubernamental, di e siman aki, a elabora riba e manera con e ta atacando e problema di ilegalidad y custodia di nos fronteranan, no obstante e retonan presupuestario existente.

E mandatario a reitera cu na momento di asumi gobernacion, a topa cu e situacion cu ex-minister Dowers, for di aña 2011 a elimina e sistema di radar, tampoco a renova e contrato di helicopter, y a bin tuma cierto decision tocante e sistema di camara cu e gobierno nobo aki a bin renova.

Tampoco el a atende diferente otro aspecto riba e mesun tereno aki.

No obstante, e mandatario a cuestiona e ex-mandatario cu a publica den prensa cu den ocho luna di gobierno, nan no a logra restaura e radar ni e helicopter. Algo cu segun mr. Bikker ta “in place” caba.

Minister ta puntra sr. Dowers si e kier pa gobierno drecha den ocho luna e retonan presupuestario cu su mes gobierno a laga atras y cu no ta suppose di existi mes.

E mandatario a indica cu pa loke ta trata e “orden dienstnan” por ehemplo, na 2017 for di April te cu December, mas of menos ocho luna tabata tin un total di 824 persona cu a wordo deporta. Aworaki, di Januari te cu Juni, pues den apenas seis luna ya caba 856 persona a wordo deporta y ainda tin cinco luna mas pa bay.

Kiermen, cu apesar cu ex-Minister Dowers no a laga un radar, no a laga un helicopter, Gobierno ta bezig atendiendo e personanan cu sin permiso ta purba drenta nos pais of a drenta como turista, y despues di esey autoridad mester atende cu nan, pasobra nan no ta cumpliendo cu Aruba su leynan di admision y expulsion.

Por cierto, e mandatario a declara cu e mes ta haya tips di hendenan local, cu si nan sospecha cu tin un persona ilegal trahando den un apartamento cerca di nan, nan ta yama e minister mes pa warda nos costa actua.

E siman aki, e minister lo haya e rapport di e Comision special cu el a institui di Cuerpo di Polis di Aruba, pa den tempo hopi cortico por busca e radar y saca e bestek pa destaho publico pa e helicopter.

E dignatario a bolbe referi na ex-Minister Dowers, indicando cu e no a prolonga e servicio di helicopter pero despues a purba di bin cu destaho publico cual no a bay bon.

Minister Bikker a subraya cu, cu tur honestidad e no ta compronde con si e ex-minister como parlamentario no ta presenta na Parlamento pero ta critica cosnan cu e mes basicamente a dicidi di haci, manera cancela e radar y no prolonga e contrato pa servicio di helicopter.

E titular di husticia a acentua cu e radar ta bay bin na corto plazo mescos e helicopter. El a subraya cu aki por wak con, cu poco medio e gobierno ta cumpliendo cu retonan nobo, historicamente hamas conoci, unda gobierno ta haya den e situacion cu personanan di nos pais ruman Venezuela ta yegando na nos costanan y afectando nos comunidad, pero autoridad ta atendiendo cu esaki diligentemente. E dignatario a expresa cu por imagina cuanto persona ilegal mas por a detecta si ex-minister Dowers no lo a cancela e radar ni a cancela e contrato di helicopter.

- Advertisement -

DUNA COMENTARIO

Please enter your comment!
Please enter your name here