Home Infrastructura Desde 2013 caba a exigi pa traha rapport encuanto efecto di huma...

Desde 2013 caba a exigi pa traha rapport encuanto efecto di huma riba Barcadera

273
0
SHARE
- Advertisement -

Trahadornan di Astec ta kere cu storia di WEB Aruba NV ta ‘smokescreen’

ORANJESTAD (AAN): Trahadornan di Astec cu ta labora riba Waf di Barcadera, a tuma nota cu WEB Aruba NV y Gobierno a bin cu un plan pa purba na reduci e efecto di Sulfur den e huma cu ta sali di stacks di e planta na Balashi.

WEB Aruba NV kier bay busca Fuel Oil awor cu ta contene 0.2% menos sulfur (“azufre”) compara cu esun anterior.   WEB kier baha sulfur di 1.7% pa 1.5%.

Kico opinion di trahadornan di Astec ta?  Nan a keda asombra cu kier baha di 1.7% pa apenas 1.5%.  Asina poco.

“On the long run, e lo afecta nos tog,” un trahador di Astec a relata Diaranzon atardi na DIARIO.  Nan ta opina cu e Conferencia di Prensa di WEB Aruba NV tabata djis un “smoke-screen” pa gaña nan algo.

“Cu e nivel nobo aki di Sulfur, awor envez di duna nos cancer den 5 aña, e lo bay duna nos cancer den 8 aña.  Pasobra apenas a baha e sulfur di 1.7% pa 1.5%.”

Pa colmo, WEB ta bay paga mas hopi pa e fuel oil aki, cu tur consecuencia cu aumento di costo di bida, pasobra na final pueblo lo bay carga tur esaki riba nan schouder, esta pa e aumento di prijs di fuel oil, y aumento di prijs pa carga, etc.

 RAPPORT EXIGI DI 2013:

Tur esaki ta socede aworaki, siendo cu desde aña 2013 caba, durante cu un negociacion entre UPA cu Astec den presencia di Mediador Anselmo Pontilius, a haci un exigencia di e compania pa traha un rapport riba efecto di huma di WEB riba Waf di Barcadera.

E exigencia aki a tuma lugar durante un reunion na 2013 na Dr. Edward Cheung Center for Innovation riba Sasakiweg.  Mediador Pontilius e tempo ey a haya e peticion aki valido, y a pone den protocol cu Astec tin di haci un investigacion y traha un rapport riba e efecto di Huma di WEB riba e trahadornan.

Pues, aki por mira cu 2 aña prome cu Waf di Carga a muda, ya caba tabatin preocupacion.  Esaki a bin debi cu atravez di añanan, varios trabao di chikito a wordo haci door di trahadornan di Astec riba Barcadera.  E poco oranan cu nan tabata keda eyriba tabata suficiente pa nan keha di e huma.

Pues desde 2013 caba UPA a ring e bel.  Sinembargo nan no tabata haya ningun reaccion di Astec.  Cada biaha nan tabata recorda Director di Astec riba e rapport di huma, pero nada.  Asina 2014 a bin te bay.  Nan tabata pidi e Director pa respeta e protocol y presenta cu e rapport, pero nada.  Y finalmente 2015 a drenta y ainda nada di rapport.  Nunca e Director a haci caso di nan, ni responde nan peticion.

Mey-mey di luna di Februari 2015, Waf di Carga a muda di Playa pa Barcadera.  Y e cambio a dal e trahadornan duro!  Den apenas 2 siman, nan tur tabata pasa den malestar cu wowonan ta pica, garganta doloroso, y mucho mas debi na e huma.

E ora numa, durante un reunion na final di Februari 2015, ata e Director di Astec a presenta cu e rapport di huma, traha pa e compania ‘Arbo Unie’ di Hulanda.

E rapport ta cuminza cu relatonan bunita na fabor di Astec, pero na final e rapport ta manera laba man pa cualkier cos den Corte, y ta finaliza cu un advertencia serio.

E rapport di Arbo Unie ta adverti tur trahador di Astec riba Waf di Barcadera, cu si diripiente bo sinti hopi malestar di e huma, ta urgi cada trahador, pa e momento cu bo sinti cualkier sintoma di e huma, ta bo DEBER di bandona pia di trabao.

E tempo ey e rapport a dal duro!  Pasobra e trahadornan kier sa, con e Director di Astec por a tog aproba e mudamento di Playa pa Barcadera, siendo cu e rapport di Arbo Unie ta adverti esaki?

UPA e tempo ey a mustra cu den e protocol tabata poni tambe, cu nan como Sindicato mester wordo inclui den tur plan di Astec pa e mudamento di Playa pa Barcadera.  Mediador Pontilius ta hasta na altura di e dos puntonan aki.

Pesey awor ta hopi comico, pa mira con e Director ta ‘play di ta victima’, siendo cu e tabata bon na altura di e rapport di Arbo Unie cu a adverti e asunto di huma.  E cu su team ta culpable di e salud cu ta bayendo atras.

Trahadornan cu ta opera Trekkernan, esta conoci como “Haulers”, tambe cu tin éénmanszaak ta sufriendo di e consecuencia di e mudamento desastroso.  Nan ta haya kimamento di wowo, dolor di garganta.

UPA TAMBE CU ESTUDIO:

DIARIO a haya sa, cu Sindicato UPA tambe riba su mes a haci un estudio na 2015, riba e efectonan di huma di gas, conteniendo sulfur, riba trahadornan cu ta inhala esaki 8 ora pa dia of mas.

E rapport aki, formula pa Specialistanan Medico na Ft. Lauderdale, Florida, a adverti cla y raspa, cu esnan cu ta inhala huma cu contenido halto di sulfur, lo por bay sufri muy pronto di Cancer.

Tur esaki por a wordo evita si e Director tabatin oido pa e e protocol y e advertencianan cu UPA cada rato ta manda recorde di dje!  Si acaso esakinan a sali publico, kizas Gobierno mes lo a cancela e mudamento di Waf pa Barcadera.

Pero di con a keda keto?  Di con a mantene e rapport secreto y tog laga Waf muda pa Barcadera?

Algun miembro di Sindicato UPA ta hayando impresion, cu ta parce mas bien cu gerencia di Astec kier pa trahadornan existente muri, pa pone uno mas ‘barata’ na su lugar.  Kizas pesey nan kier a haya cheap-labour, siendo gerencia sa drommels-goed di e situacion peligroso.

- Advertisement -

DUNA COMENTARIO

Please enter your comment!
Please enter your name here