Home Actividad Especial Diadomingo awo Savaneta lo disfruta di tremendo evento Ban Cultiva Bario Fest...

Diadomingo awo Savaneta lo disfruta di tremendo evento Ban Cultiva Bario Fest Savaneta

129
0
SHARE
- Advertisement -

ORANJESTAD   (AAN):  Departamento di Cultura, como tambe miembronan di Centro di Bario Savaneta y Santa Rosa a organiza un tremendo evento pa bario di Savaneta.

Ban Cultiva “Bario Fest” Savaneta lo tuma lugar diadomingo 29 di Juli for di 11’or di mainta te cu 6’or di atardi na Centro di Bario Savaneta.

Segun Sr. Stanley Dabian di Departamento di Cultura, diadomingo ta un dia pa goza den famia, y nan ta tuma e oportunidad pa invita pueblo di Aruba, specialmente esnan di Savaneta pa bin disfruta di e actividad aki, caminda lo tin un mercado bon surti di Santa Rosa, un skina pa mucha, Dino jump y weganan di level 3, como tambe a baluartenan di Savaneta y varios nominado den diferente categoria.

E nominadonan pa baluarte di Savaneta ta Agripino Rolando Bisslik, conoci como Rolly Bisslik, pa su historia den deporte di natacion; dr. Jennifer Geermen-Tromp, pa su trabaonan boluntario den diferente instancianan y un hende hopi stima pa comunidad di Savaneta; Donald Cristians pa su labor y pilar den Iglesia Catolico na Savaneta y Aruba en general pa mas di 45 aña sirbiendo pueblo den area di Iglesia. Jaime Angela, kende a haya un nominacion postumo, kende a yuda lanta bario di Savaneta y un persona hopi conoci den area di politica. Otro nominado ta Jose Francisco Wever, conoci como Buchi Panama, kende a establece futbol di mucha di edad di 4 pa 17 aña cu ta e Liga Infantil di Futbol Aruba, conoci como LIFIDA. El a lanta e fundacion aki na 1986 y awe ta conta cu mas di 3 mil mucha. Reynaldo M. Kock, mihor conoci como Ronny Kock, pa su dedicacion na arte di musica; Chastity Kock-Hodge, cu ta trahando mas di 20 aña cu mucha y hoben den grupo Chaz modeling and talent school; Anna Leonor Kock-Herrera, otro nominado postumo, baluarte pa su logronan den arte, famia y pintura.  Y por ultimo, Adolf ‘Dufi’ Kock, kende a wordo nomina como prome baluarte ‘savanetero’ pa su bario di Savaneta, como historiador y escritor.

Organizadornan ta invita pueblo pa bin cera conoci cu Centro di Bario Savaneta hunto cu famia, pa pasa un atardi ameno y disfruta di mercado di Santa Rosa.

- Advertisement -

DUNA COMENTARIO

Please enter your comment!
Please enter your name here