Home Gobierno Halto nivel di gobierno atendiendo e problema cu huma di WEB a...

Halto nivel di gobierno atendiendo e problema cu huma di WEB a crea na waf di Barcadera

27
0
SHARE
- Advertisement -

Minister Xiomara Ruiz-Maduro:

ORANJESTAD (AAN) – WEB Aruba NV, a convoca un conferencia di prensa, Diaranzon mainta, den cual a wordo elabora tocante e medidanan cu e compania lo tuma, pa soluciona e problema di huma na Barcadera.

A hiba palabra Minister mr. Xiomara Ruiz Maduro, representando Minister Presidente, mr. Evelyn Wever-Croes. sr. Luis Oduber, CEO di Web Aruba NV y Francis Ras, Sector Manager di e compania.

Minister Xiomara Ruiz-Maduro a menciona cu e dianan aki el a bin atende cu e problematica cu a surgi cu e huma di WEB ora cu e biento bira, cu ta causa molester den e waf na Barcadera.

E mandatario a indica cu door di esey accionnan a cuminza tuma lugar, unda cu e waf su operacion a wordo para totalmente, locual ta trece cune un presion pa loke ta concerni comercio y tambe pa Aruba en general, pa motibo cu ta 80% di los que nos tin pa consumi, ta wordo importa.

Esaki tin atencion di gobierno pasobra e aspecto mas importante ta salud di hende, y logicamente di e trahadornan, y nan a bin dilanti pone paro na trabao, y esnan cu ta yega na waf cu truck grandi, cu ta e promenan cu a cuminza cu accion.

Pa tal motibo e entrada principal di Barcadera a keda cera y cune, atencion di gobierno tabata directo y e dignatario a bay personalmente tuma nota di kico ta pasando.

E mandatario a indica cu asina por wak kico ta na e solucionnan practico cu mester yega, den e realidad existente na e momentonan aki.

E realidad ta cu WEB ta un compania vital pa Aruba como esun cu ta produci awa potable y coriente, y banda di dje e otro compania vital cu ta e waf di Barcadera, ambos de suma importancia pa nos pais, cu ta rekeri di atencion na e nivel di mas halto di gobierno y esaki ta wordo brinda aworaki.

Minister Ruiz-Maduro a menciona cu nan a sinta e siman aki hunto cu ehecutivonan di WEB, ATIA cu a mustra su preocupacion, y tambe cu ASTEC y APA cu ta esnan cu tin e parti di waf bao di nan responsabilidad.

Aki nan a yega na solucionnan practico, den sentido cu WEB ta indica kico nan ta bay haci di nan banda, kico por tecnicamente pa por atende cu e asunto aki y kico den corto, mediano y largo plazo kico nan ta haci pa resolve e situacion aki.

E mandatario a informa cu nan a haci un apelacion na ASTEC ya cu nan ta esnan encarga cu e waf. Pues un compania vital cual operacion mester sigui, y teniendo cuenta cu e salud di esnan cu ta traha por brinda nan e pañanan di seguridad pa e trahadornan por tin e trankilidad cu ta tene cuenta cu esaki. Ademas a pidi pa nan traha den shift pa asina no expone nan tanto na e huma aki. E partidonan a bin hunto y ASTEC a indica kico nan ta bay haci pa nan trahadornan y pa asegura e aspecto di operacion. A pidi Douane tambe nan cooperacion pa e parti di operacion keda asegura. E mandatario a subraya cu nan kier pa WEB tambe duna pueblo e seguridad cu nan tambe ta haciendo nan trabao riba e aspecto aki. Minister Ruiz-Maduro a expresa cu tin cierto decisionnan cu ta gobierno mes tin cu bay tuma, pero ta importante pa sa kico tecnicamente por wordo haci.

- Advertisement -

DUNA COMENTARIO

Please enter your comment!
Please enter your name here