Home Economia Hellen van der Wal ta un profesional cu un curason grandi...

Hellen van der Wal ta un profesional cu un curason grandi pa e causa Arubiano

117
0
SHARE
- Advertisement -

Presidente Raymond Gradus:

ORANJESTAD   (AAN) – E secretario actual di Conseho Consultativo di Aruba, Señora Hellen van der Wal, lo tuma asiento den Colegio di supervision financiero di Aruba (CAft) entrante dia 1e di augustus 2018. El a keda postula pa Aruba y e lo ta sucesor di e actual miembro Señor Robert Croes. For di e momento ey Señora van der Wal lo renuncia su funcion di secretario di Conseho Consultativo. E ta trece cu ne su amplio experiencia den un contexto administrativo y su experticio huridico. Presidente Raymond Gradus: “Mi a siña conoce Señora Van der Wal como un profesional cu un curason grandi pa e causa Arubiano. Mi ta spera cu interes nos futuro colaboracion den CAft”.

Dia 6 di juli Conseho di Ministro di Reino a bay di acuerdo cu nombramento di Señora mr. dr. Hellen van der Wal den Colegio di supervision financiero di Aruba. Señora Van der Wal tin un amplio historial di servicio den aparato gubernamental di Aruba y den Conseho Consultativo di Aruba (RvA), di cual e ta secretario for di 2004. Prome cu esey el a desempeña varios otro funcion den aparato gubernamental di Aruba.

Den Conseho Consultativo el a carga coresponsabilidad pa e calificacion extensivo di constitucionalidad di e presupuesto di Pais Aruba cu Conseho ta efectua actualmente. Ponemento di e proceso presupuestario den un contexto constitucional ta su contribucion mas importante den e calificacion ey. Cu su trasfondo huridico y su conocemento di administracion y finansa publico di Aruba, e lo duna un contribucion valioso na CAft, cual den e temponan desafiante aki pa Aruba ta keda hunga un rol importante constantemente.

Señora Hellen van der Wal ta sucede Señor Robert Croes, kende for di dia 1e di augustus 2015 tabata miembro di CAft. Señor Croes tabata envolvi for di comienso den CAft y conhuntamente cu e otro miembronan el a dal e prome stapnan importante den supervision di finansa publico di Aruba. Riba e fundeshi aki por sigui construi awor. Presidente Gradus ta gradici Señor Croes pa su empeño y compromiso den CAft.

Entrante dia 1e di augustus 2018 CAft lo consisti di Señores Raymond Gradus (Presidente) y Henk Kamp (postula pa Hulanda) y Señora Van der Wal (postula pa Aruba).

- Advertisement -

DUNA COMENTARIO

Please enter your comment!
Please enter your name here