Home Hudicial Homber cu a mata e muchanan Eugene y Rishandroh condena na 15...

Homber cu a mata e muchanan Eugene y Rishandroh condena na 15 aña di prison

520
0
SHARE
- Advertisement -

Ademas di mester bay sigui tratamento obligatorio

ORANJESTAD (AAN): Diabierna mainta Hues di Corte den Promer Instancia a dicta sentencia contra e homber Gabriel M., kende a admiti di a maltrata y mata e muchanan Eugene di 3 aña y Rishandroh di 5 aña, entre September 2017 y November 2017. Ademas el a admiti di tabata maltrata e mama di e muchanan, Risheila F., severamente.
SOSPECHOSO NO A BAY CORTE:
Por a nota cu Gabriel M. no a presenta den Corte. Hues a bisa cu Gabriel M. a laga sa cu e no kier bay Corte pa scucha su sentencia.
Por a nota cu e tata biologico di e muchanan victima y e famia, no a presenta den sala di Corte. Hues a bisa cu Gabriel M. a coopera cu e investigacion den e lamentable caso di matamento di e dos muchanan. El a hasta mustra unda Eugene tabata dera.
Hues ta haya legalmente proba cu Gabriel M. a mata Eugene y Rishandroh y tambe a maltrata e muchanan severamente.
TRATAMENTO OBLIGATORIO:
Hues a splica cu mester busca un balance den castigo y e seguridad di comunidad. El a mustra cu a keda constata cu Gabriel M. ta sufri di problema mental serio. Ademas di tin e tendencia anti social, e ta sufri tambe di “schizophrenia”. Psychiater y psycologo ta considera cu Gabriel M. ta leve no-responsabel pa su actonan. Nan ta bisa tambe cu ta teme cu Gabriel M. lo por bolbe ripiti loke el a haci. Den pasado Gabriel M. no a tuma tratamento, ora el a wordo bisa pa haci esaki.
Psychiater y psycologo ta conseha cu mester obliga Gabriel M. pa haya tratamento. Nan ta recomenda pa pone Gabriel M. na disposicion di Gobierno (TBS), pa asina e haya tratamento obligatorio.
Hues ta haya cu mester haci esaki pa evita cu Gabriel M. den futuro lo bolbe haci algo lamentable asina.
Hues a splica cu segun ley, pa persona cu problema mental cu a mata hende, e TBS no conoce un periodo maximo di tratamento obligatorio. Esey ta nifica cu te ora cu expertonan constata cu e persona no ta causa un peliger pa comunidad, e lo por sali for di e instituto. Sino e lo keda interna den e instituto.
CASTIGO:
Teniendo tur ariba menciona na cuenta, Hues a bisa cu e ta haya parti di e exigencia di Fiscal na su lugar. Hues a condena Gabriel M. na 15 aña di prison. Hues no ta haya oportuno pa awor impone e castigo condicional riba e castigo aki.

Hues a mustra cu actualmente ni na Aruba, ni den Antiyas tin un clinica TBS. Ta buscando manera pa habri un clinica TBS na Curacao. Esey ta encera cu despues cu Gabriel M. sinta 10 aña di prison, e lo mester cuminsa cu e tratamento obligatorio den un clinica.
Hues a instrui cu si no tin un clinica den Antiyas, a base di ley, Gobierno lo mester busca un clinica na Hulanda pa Gabriel M. haya e tratamento obligatorio.

- Advertisement -

DUNA COMENTARIO

Please enter your comment!
Please enter your name here