Home Policial Homber sospecha di trafica 357 kilo di cocaina declara liber

Homber sospecha di trafica 357 kilo di cocaina declara liber

831
0
SHARE
- Advertisement -

Sla duro pa Fiscal cu a faya den investigacion

ORANJESTAD (AAN): — Diabierna mainta Hues a declara e homber Venezolano bibando na Aruba, R.S. liber di e acusacion di traficacion di 357 kilo di cocaine den dos container yena cu hero bieu. Esaki ta un sla duro pa Fiscal cu ta haya R.S. culpable y a exigi 12 aña di prison.

Trafica droga den bodypart di pickup:

Dia di tratamento di e caso Hues mustra cu CID a haya informacion cu tin un persona cu ta deal den cocaine ta preparando 300 kilo di cocaine pa hiba Belgica. Hues Comisario a duna permiso pa scucha cellular.

Ora a scucha ta R.S. e ta papia cu un K. cu tin un compania di transporta container. Esaki tabata na 5 December 2017 caminda lo tabata papia di 5 container. A papia cu Douane pa check si tin containernan cu lo bay Hulanda. A resulta cu ta asina y a confisca container cu heru bieu, partinan di auto, destina pa Hulanda y despues Antwerpen.

A detene K. y interoga. A haya 2 container cu 30 porta patras di porta di pick up den cual tabatin 258 bloki cu a pisa 357 kilo di cocaine.

A scucha Douane tambe pa haya sa kendenan tabata yena container. Cinco persona tabata yena esaki y R.S. tabata esun encarga cu e carga y e otronan ta e trahadornan.

   Droga den container seya:

Ta asina cu Douane a controla cu cacho anti droga tur carga promer cu hinca den container. Ademas a controla e containernan bashi . Esaki tabata 6 December 2017. Despues 11 December 2017 a haya droga den e containernan aki. A constata cu e cosnan cu a haya droga aden, no tabata den e container ora a controla esaki.

Douane ta sospecha cu despues di a seya e containernan, a habri esaki toch y hinca droga den e portanan di baki di pick up. Douane a reconoce R.S. como esun responsabel pa tur e cargamentonan. E tabata hinca e carga cu “fork lifter” den container.

Hues a puntra R.S. kico e tin di bisa di tur e acusacion aki. Segun R.S. nada cu e ta worde acusa no ta asina.

Segun R.S. tur e hero bieu ta di K. El a bisa cu su palabracion cu K. ta cu e lo yuda K. yena containernan cu hero bieu y cu R.S. lo manda partinan di auto pa Venezuela.

Segun R.S., ta K. ta esun cu ta cumpra e heronan bieu.

R.S. a bisa Hues cu varios biaha el a manda partinan di auto pa Venezuela.

El a bisa cu e tabata manda nan via un boto y nunca el a manda container.

Segun R.S. ta K. tabata dune placa pa paga riba containernan cu lo mester usa pa manda Hulanda.

Segun R.S., e no tabata paga K. pa e partinan di auto.

A palabra cu R.S. ta traha yena container y a cambio ta haya partinan di auto.

El a desmenti cu e tabata huur e tereno for di un tal B.

El a bisa cu ta K. tabata usa e tereno ey y cu K. tabatin un persona cu ta habri y sera porta di e tereno.

R.S. a sigura Hues cu ora a carga e container, no tabatin e tailgate (porta patras di pick up). Tabatin miembronan di Douane cu a mira tur cos promer cu a hinca den container.

Segun R.S., nan ta culp’e di algo cu e no tin nada di haci cu esaki. Hues a confronta R.S. cu potretnan y e ta desmenti di a carga e portanan aki den container. Hues a remarca cu hasta Douane ta bisa esaki. Con e portanan aki a yega den container?

Fiscal a puntra e sospechoso, con e por biba luhoso asina. Di unda a haya placa pa tin dos cas ta huur cu ta costa hopi placa y core autonan caro.   Aki R.S. a splica cu el a bende negoshi, autonan y su accionnan di un restaurant na Venezuela.

   Exigencia di fiscal:

Fiscal a bisa cu e 30 portanan patras di pick up tabatin blokinan di cocaina cubri cu chumbo. E miembronan di Douane a bisa cu no a mira nada di esey.

A hiba containernan Savaneta Kamp. E portanan aki tabata bao un monton di heru bieu.

E seyonan di Douane a worde corta di dos container den presencia di Fiscal. Por bien ta cu e cachonan anti droga no a hole e droga. A haya recibo na cas di R.S. Ta un cantidad grandi di cocaine a haya. 357 kilo.

Esun responsabel di e container ta responsabel di e droga. E pregunta ta si ta R.S. of K.  Door di cuestiona e forma luhoso cu R.S. ta biba y cu e bendemento di hero bieu lo no yega na esaki, etc., Fiscal a exigi 12 aña di prison. El a pidi pa confisca e placanan, holoshi Rolex y documentonan cu a haya na cas.

   Sentencia:

Hues a bisa cu dia 6 December 2017, tres Douanero a controla 2 container. Promer 2 cacho a controla e containernan pa droga y no a haya nada. Durante cu tabata carga e container e miembronan di Douane tabata controla tambe. Despues a seya e containernan. Ademas a pone candal.

E containernan a keda riba tereno na Piedra Plat y 8 December 2017 a hiba nan Barcadera pa transporta. Fiscal a laga confisca esakinan y hiba nan Savanete Kamp caminda a bin haya 357 kilo cocaine scondi den 30 porta di baki di pick up. Douaneronan a bisa cu e portanan aki no a worde hinca durante controla. Conclui cu despues di seya containernan a habri esakinan atrobe y hinca esakinan. Douaneronan a reconoce R.S. cu tabata esun encarga pa yena e carganan den e containernan.

Fayo den investigacion:

Hues a bisa cu e pregunta ta si ta R.S. tabata esun cu a hinca e portanan di baki di pick up y si e tabata sa cu tabatin droga den nan. Hues a mustra cu durante tratamento di e caso, R.S. a admiti cu riba orden di K. a yena e containernan y e no tabata sa di portanan di pick up.

Hues ta haya cu for di e investigacion haci, no ta cla si e portnan a worde hinca dia 6 December 2018 of despues.

Tambe Hues a mustra cu no por saca afor si a kibra seyonan. No tin investigacion haci riba esaki. Hues a mustra cu e homber K. a bisa cu e heronan bieu ta di R.S. y e containernan ta di R.S. Na opinion di Hues esaki ta un declaracion su so, contra esun di R.S. Tin un persona ta bisa cu R.S. ta traha eynan y ta encarga cu heronan bieu.

Hues a señala cu e doño di e tereno no a worde scucha pa saca afor si di berdad R.S. a huur e tereno y cu e heronan ta di R.S.

Hues a sigui señala cu for di tapnan no por conclui cu R.S. lo tabata papia di droga.

E recibonan cu a haya di R.S. el a splica cu ta pa K. el a bay haci’e. Hues ta haya cu esaki por ta posibel.

Hues a mustra cu Fiscal a señala cu R.S. ta biba den luho y lo mester tin entradanan ilegal. Hues ta haya cu investigacion a mustra cu R.S. ta dispone di suficiente entrada.

   Declara liber:

Hues a conclui cu for di e investigacionnan haci, no por proba cu ta R.S. ta culpable y pesey e ta declara R.S. liber. Por a ripara cu R.S. a haci suspiro di satisfaccion.

Den e sentencia Hues ta mustra bon cla cu Fiscal a faya den haci mas investigacion pa saca afor si realmente ta R.S. ta culpable. Un di e pruebanan importante tabata e seyo di container cu no a haci ningun investigacion ariba. Mirando e sla duro pa Fiscal di Ministerio Publico, por spera cu Fiscal lo apela e sentencia aki y e ora ey Corte Superior cu tres Hues (Hof) lo bay trata e caso aki di nobo. Entretanto e homber R.S. ta den libertad.

- Advertisement -

DUNA COMENTARIO

Please enter your comment!
Please enter your name here