Home Comercio Hulanda ta bay otorga Aruba 1 miyon florin di locual a resta...

Hulanda ta bay otorga Aruba 1 miyon florin di locual a resta di Fondo Desaroyo Arubano

486
0
SHARE
- Advertisement -

Secretario di Estado Knops hopi satisfecho riba con e cooperacion a bay durante e añanan cu a pasa

ORANJESTAD  (AAN): Secretario di Estado Hulandes di Asuntonan Interno y Relacionnan di Reino Raymond Knops ta na Aruba pa un bishita y Diamars el a reuni cu entre otro Prome Minister Evelyn Wever Croes y Minister di Husticia Andin Bikker den e edificio di Corte di Husticia.

Eynan el a haya un tour di e edificio y un splicacion riba funcionamento di e diferente partinan di e edificio.

Despues e mandatario Hulandes y Prome Minister Croes a hiba palabra, unda cu nan a papia riba acuerdo di Fondo Desaroyo Arubano (FDA) entre Hulanda y Aruba, cu a yega su final.

Knops durante un conferencia di prensa cortico a indica cu esaki ta trata di un momento special, unda cu na un banda Hulanda y Aruba a traha hunto na un manera hopi bunita y hopi a wordo inverti den pais Aruba.

“Esaki ta finalizacion di un trayecto cu tabata hopi exitoso y pesey mester duna un elogio sigur na FDA y tambe AIB”.

“Nos ta constata cu e placa a wordo inverti na bon manera y esey a wordo constata pa e accountant tambe”, segun Knops.

Prome Minister Croes tambe a hiba palabra y a indica cu awor a yega na final di e proyecto di cooperacion entre Hulanda y Aruba, unda cu hopi proyecto grandi importante a wordo realiza pa pais Aruba, incluyendo e restauracion di e edificio di corte.

Tambe construccion di e oficina di Gobierno, esta Cocolishi.

E mandatario a indica cu na final di e trabaonan a resta un suma di placa y e palabracion ta cu Aruba ta determina na kico e ta bay destina e placa aki.

Banda di esaki, Hulanda tambe ta determina kico e ta bay hasi cu e suma cu e a resta.

Aruba ta bay uza e fondo pa restaura e parti bieu di Bestuurskantoor cu ta un monumento y asina e por wordo conserva pa futuro generacionnan.

“Hulanda di su banda a dicidi cu e placa cu ta toca Hulanda, e ta pase pa Aruba”.

“Hulanda por a hasi algo diferente, pero el a dicidi cu e ta pase pa Aruba, pa proyectonan di Aruba”.

“Asina a destina 1 miyon florin pa e Crisis Plan Social, specificamente pa loke ta trata proteccion di muchanan, Kinderbescherming, segun un proyecto di UNICEF”.

Esaki segun e Prome Minister, kende a sigui bisa cu e restante lo wordo destina pa fortifica seguridad y husticia di Aruba.

Despues di e conferencia di prensa, Knops y Wever Croes a firma un protocol relaciona cu esaki.

- Advertisement -

DUNA COMENTARIO

Please enter your comment!
Please enter your name here