Home Economia Hulanda ta laga pa Aruba su parti di 4.9 miyon florin cu...

Hulanda ta laga pa Aruba su parti di 4.9 miyon florin cu a resta den FDA

166
0
SHARE
- Advertisement -

Minister Presidente contento:

ORANJESTAD (AAN) – Durante e conferencia di prensa di gobierno, Minister Presidente sra. mr. Evelyn Wever Croes, a elabora tambe tocante e bishita di Secretario di Estado sr. Raymond Knops na Aruba, diamars ultimo, unda a atende cu diferente tema.

E dignatario a duna di conoce cu e meta di e bishita di sr. Knops tabata pa elabora riba e Fondonan di Desaroyo Aruba (FDA) cu a yega su final.

Manera ta conoci FDA, durante e ultimo añanan, a percura pa hopi inversion na Aruba, y durante Gabinete Mike Eman II, nan a yega na palabracion cu Hulanda cu e fondo aki lo bay stop di existi.

“E fondo aki ta un fondo masha interesante pasobra Hulanda a pone placa aden y Aruba a pone placa aden y hunto lo tabata bisa ki proyecto lo wordo traha. Entre otro, e edificio di Corte a wordo traha cu e fondo aki y mas edificio. Aworaki e palabracion di gobierno anterior ta yegando su final, y nos a firma e protocol final. Si boso puntra mi mi lo a bisa ‘caramba, mara nos tabata tin e fondo aki ainda’, awor cu e situacion financiero ta dificil kiermen nos mester di ayudo y espacio pa nos por sigui inverti, pero nos ta obliga aworaki, mirando cu e palabracion a wordo haci caba, di continua sin e fondo”, e dignatario a expresa.

E dignatario a agrega cu bunita di esaki ta, cu na final, a resta 4.9 miyon florin den e fondo cu ta placa cu Hulanda a pone. Aruba tambe a resta fondo di loke e tabata tin na final, y e ultimo placa a wordo uza pa restaura Bestuurskantoor cu ta un monumento, pa asina nos mantene tambe e balor di e edificio.

E fondo cu a resta di loke Hulanda a aporta nan a dicidi, como cu nan tin confianza den gobierno y con e ta atendiendo e situacion financiero di Aruba, pa laga nan parti pa wordo inverti na Aruba.

Di esaki un miyon florin ta bay pa e Plan di Crisis Social, specialmente pa proteccion di e muchanan. E miyon florin aki Aruba lo haye entre e aña aki y otro aña, y 3.9 ta bay yuda pa combati criminalidad den nos pais.

“Mi ta hopi contento cu esaki pasobra nos por a keda sin haya nada tambe, y e ta demostra un biaha mas e confianza cu ta wordo restablece. No ta ainda unda mester ta pero e ta bayendo riba bon caminda” Minister Presidente sra. mr. Evelyn Wever- Croes a subraya.

- Advertisement -

DUNA COMENTARIO

Please enter your comment!
Please enter your name here