Home Comercio KvK ta sostene y aplaudi idea di minister pa usa espacio bashi...

KvK ta sostene y aplaudi idea di minister pa usa espacio bashi na waf chikito pa construccion di cas

62
0
SHARE
- Advertisement -

ORANJESTAD (AAN)—E Economista di Camara di Comercio y Industria drs. Randall Croes, a expresa cu algun cos a destaca den e ultimo temponan aki, relaciona cu gobernacion, y den e caso aki e parti di infrastructura.

El a referi na un pensamento di Minister di Infrastructura sr. Otmar Oduber, riba uso di e espacio cu a keda liber na waf chikito (Oranjestad) ora cu e waf di container a muda pa Barcadera.

E idea cu KvK ta sostene ta cu e mandatario a indica cu e tereno aki lo bira disponible pa construccion di cas mas halto, den edificio.

El a subraya cu pa tur hende lo bira agradable biba den un edificio cu bista na lama. Pero e balor agrega ta cada apartamento cu wordo traha riba otro, ta un tereno menos pa  rosamento.

KvK ta pro pa un maneho di “carrying capacity” (capacidad di carga) unda cu naturaleza ta haya su espacio, y nan ta aplaudi e cambio di idea aki, na e proyecto aki.

Croes a agrega cu na lugar di traha otro proyecto turistico cu ta bay importa otro cantidad di miles di trahador di construccion, for di exterior, pasobra nos no tin, ya cu nos mes hendenan kier traha den otro terenonan mas no den construccion.

Segun e Economista, nos ta soluciona otro problema cu ta scarcedad di tereno, y tampoco tin nodi importa trahador di afo, trahando estructuranan unda hendenan ta bay biba na un nivel di bida halto.

Sr. Randall Croes a subraya cu e casnan aki tin un bon balor comercial, nan ta bay haya financiamento na largo plazo, y tin inversionistanan, banconan di inversion local, fondonan di pension local, dispuesto pa inverti, traha e edificionan aki, y bende nan den e mercado.

El a acentua tambe cu na Aruba nos tin un scarcedad di cas enorme, y terenonan erfpacht ta bay caba pronto den e generacion aki y ta bay yega na e punto cu no tin ni un mas.

Mientras tanto tin otro idea cu KvK ta sostene, cu ta relaciona cu terenonan eigendom (propio), unda tin miles di meter cuadra cu no ta wordo verkavel entre e herederonan, pasobra nan mester di un par di miyon florin pa traha caminda, acera, y nunca den nan bida nan lo yega na dje.

E terenonan aki nunca lo wordo desaroya a menos cu miyonarionan di afo bin hacie y gana placa bay cune.

Economista Randall Croes a expresa cu e idea cu a bin dilanti y cu KvK ta sostene y cu pa hopi tempo ta den discusion, ta pa bin cu un ley di crisis, unda pa cinco aña di crisis construccion haya bida, hendenan local haya trabao pasobra e refineria ta cera, suspende e exigencianan pa verkavel, traha camindanan di granit, pone e banchinan di acera, y laga WEB y ELMAR instala e infrastructura, mescos y cu trato igual cu ora tereno di gobierno haya reparticion den verkavelings plan.

Ora e cas ta construi e ta paga invoerrechten, belasting, y e placa aki ta wordo uza pa traha caminda. KvK ta hopi contento cu e idea aki.

Esaki ta un sugerencia cu e minister a haya y el a reacciona riba dje den un entrevista na radio, sr. Randall Croes a splica, y KvK ta sostene pasobra e tabata asina den pasado.

El a keda suspendi algun aña pasa y a surgi scarcedad di tereno creando e crisis cu nos tin awor.

KvK ta pro pa habri e terenonan aki y wak cualnan ta den areanan proteha y cualnan no. Esakinan parti nan den parcela y reparti nan un pa un.

- Advertisement -

DUNA COMENTARIO

Please enter your comment!
Please enter your name here