Home Hudicial Mañan sentencia ta cay pa agente di Polis cu a dal mucha...

Mañan sentencia ta cay pa agente di Polis cu a dal mucha mata cu auto

76
0
SHARE
- Advertisement -

ORANJESTAD (AAN): Mañan Corte den Promer Instancia ta dicta sentencia den e caso penal cu Ministerio Publico a cuminsa contra e agente di Polis femenino, J.V., kende 13 di Maart 2015 a dal mata e mucha di 12 aña, Zinnia Croes, den Spaans Lagoenweg.

HOPI COS A BAY ROBEZ

Luna pasa tratamento di e caso a tuma lugar caminda Fiscal a bisa Hues cu a base di investigacion cu tabatin, Fiscal a dicidi di tuma over. Ora a sali na cla cu ta un agente di Polis, Fiscal a dicidi pa laga Landsrecherche haci investigacion y no pa Polis mes, pa evita cu despues tin coleganan ta haya rabia riba otro.

Fiscal a splica cu e traspaso a tuma lugar cu hopi dificultad. Departamento di Trafico di Polis, ta tira culpa riba Fiscal cu a pone presion riba nan pa e procesverbaal keda cla y door di esey tur cos a bruha. Fiscal a mustra cu inhustamente e ta wordo culpa pero e tabata kier pa Landsrecherche haci investigacion. Tin masha hopi fout cometi. Di loke tabatin no tabatin suficiente base pa cuminsa un caso. E mayornan a bay Hof y Hof a dicidi cu mester persigui J.V. E ora ey Ministerio Publico a bay studia e documentonan y a conclui cu J.V. a ocasiona morto di e mucha Zinnia Croes. Subsidiario el a trece seguridad di trafico den peliger y cu e tabata burachi coriendo auto.

CORE AUTO BOU INFLUENCIA

Fiscal a mustra cu e sospechoso a bebe 4 whisky coke cu un amiga na POVA. El a hiba e amiga cas y despues a bay su cas pa busca su yiu y otro muchanan pa bay un baile. E baile tabata 7.30 di anochi y J.V. a sali 7’or. Pues nan tabata laat caba. Mas o menos 7.15 el a dal e mucha cu auto. Esaki ta un delito y segun ley, tin un castigo di 2 aña di prison y aña pasa el a bira 4 aña di prison. Fiscal a bisa cu e pregunta ta si ta door di culpa J.V. a dal mucha mata. Fiscal ta conclui cu J.V. tabata core cu asina poco cuidao y atencion y a dal e mucha. E tabata core bou influencia di alcohol. Mirando e circumstancianan, e tabata core duro. E no a brake of no a brake na tempo. E tabata core cu glas getint y no tabatin bon bista riba caminda. E no tabatin suficiente atencion riba caminda ora e tabata core. Polis a yega y constata cu J.V. tabata hole alcohol. A lagu’e blaas y e aparato a registra 525 mcg di alcohol. A detene J.V. Segun J.V. a bisa cu e tabata core 70-80 km. El a bisa cu el a mira muchanan na banda di caminda y diripiente e victima a core cruza caminda. Despues di mas cu 1 ora cu e ta deteni, a bay haci e test. Segun ley, despues di 20 minuut cu detene mester haci test. Asina mes, el a supla mas cu 300 mcg. Ta asina cu J.V. a pidi pa haci un test di sanger pero aparentemente no a haci test di sanger pasobra no tabatin test. Despues ta resulta cu si tabatin test pero no a pidi. Fiscal a splica cu a base di ley, door cu a keda sin haci e contra test, no por usa e test di blaas como prueba.

A pidi NFI haci investigacion pa determina kico lo tabata e grado di alcohol den curpa di J.V. NFI a calcula cu e grado di alcohol den curpa di e sospechoso tabata entre 395 y 525 mcg. Fiscal a remarca cu e 525 mcg tabata exactamente loke a constata na promer momento cu Polis a laga J.V. supla. Fiscal a mustra cu consumo di alcohol ta afecta bo bista. J.V. a bisa cu el a mira 6 mucha siendo cu en realidad tabatin 3 mucha. Posiblemente el a mira double cu ta mustra efecto di alcohol. Alcohol ta afecta bo forma di reacciona.

CASTIGO

Fiscal a conclui cu J.V. ta culpable di a dal mata e mucha Zinnia Croes cu auto cu consecuencia cu e mucha a fayece y cu e tabata bou influencia di alcohol. Esaki ta un delito hopi serio. Fiscal a mustra cu J.V. a kita un bida hoben y e mayornan tin cu sigui biba cu e dolor inmenso aki. Ni cuanto castigo duna lo no drecha loke a pasa.

Fiscal a bisa cu e ta tuma J.V. na malo cu como Polis a kibra varios leynan. El a tene cuenta cu ta promer biaha cu J.V. ta cay den man di husticia. Tambe Fiscal a tene cuenta cu e caso ta bieu esta 3 aña y 3 luna mas bieu. El a bisa cu el a sinta delibera na Ministerio Publico teniendo cuenta cu tur circumstancianan. Fiscal a exigi trabou pa comunidad di 240 ora, mester sigui curso riba maneha auto bou influencia di 24 ora y 2 aña sin rijbewijs.

Mañan sentencia ta cay y DIARIO lo informa nos lectornan.

 

- Advertisement -

DUNA COMENTARIO

Please enter your comment!
Please enter your name here