Home Naturaleza Mangel ta brinda beneficio pa nos como ser humano y animalnan

Mangel ta brinda beneficio pa nos como ser humano y animalnan

79
0
SHARE
- Advertisement -

Nos mangelnan mester worde considera como parti importante di Aruba

ORANJESTAD (AAN); Dia 26 di juli ta dia internacional di conservacion di mangelnan. Mundialmente mangelnan ta confrontando varios riesgo particularmente pa motibo di cu nan ta worde destrui.

Como naturalesa mangelnan e tin hopi balor ecologico, nan ta duna nos seguridad di cuminda como cu diferente pisca, shirmps of lobster ta nace den nan.

Nan ta brinda proteccion na nos costanan durante temporada di tormenta/ horcan. Nan ta produci oxigeno den un sistema unda cu tin relativamente tiki oxigeno y nos como ser humano ta inhala e oxigeno aki, conhuntamente cu otro bestianan. Pues tin diferente beneficio na e sistema di mangelnan.

Adicionalmente riba tera e parhanan y otro especie di animalnan tambe ta biba den e sistema aki, pesey e ta sumamente importante pa duna atencion na conservacion di mangelnan riba e dia aki, Director di Directie Natuur en Milieu (DNM) Gisbert Boekhoudt a splica DIARIO.

Manera indica anteriormente, mangelnan mundialmente ta bou di presion pa motibo di urbanisacion unda cu ta cap mangelnan pa traha espacio pa otro uzo. Tin diferentelugar cu a ripara cu unabes cu cap e mangelnan, e area ta bira mas vulnerabel pa entre otro ‘flooding’.

Tin diferente manera pa percura cu ta cuida nos mangelnan, principalmente nan mester worde considera como parti di Aruba, como un parti util y cu hopi balor. Unabes cu bo tine como algo util bo ta construi cu naturalesa y no contra naturalesa. Mester percura cu e ta parti di e diseño di un Aruba prospero y cu ta duna back na comunidad.

Hopi biaha hende ta wak e mangelnan como algo negativo pa motibo cu por ehempel den nan ta haya sangura cual por ta un molester y ta uza esaki como un motibo pa capnan, sr. Boekhoudt a splica.  Sinembargo riba un mensahe cu kier a trece na comunidad pa locual ta e dia internacional aki ta, cu nos mangelnan ta un bunita paisahe pa observa y alavez nan ta un simbolo di forsa y ta habitat pa diferente especie di animal.

Nan pianan ta para firme den nos teranan wantando hopi energia mientras cu nan ta proteha nos costanan ora cu tin tormenta. Pesey gosa di e paisahe bunita y natural di Aruba y percura pa semper cuida esakinan door di no susha of destrui nan.

- Advertisement -

DUNA COMENTARIO

Please enter your comment!
Please enter your name here