Home Hudicial Mester pone fin na e proyecto hotelero na costa di Savaneta

Mester pone fin na e proyecto hotelero na costa di Savaneta

476
0
SHARE
- Advertisement -

ORANJESTAD(AAN)– E proyecto riba lama na Savaneta a cuminsa haya mas y mas atencion. Aruba Birdlife Conservation den hopi ocasion a sa di denuncia e operacionnan aki, pero ta lamenta cu mucho no a wordo haci al respecto. E area na Savaneta, ademas, ta un di e 16 areanan na Aruba cu mester wordo protehi pa conserva su matanan mangel.

Sr. Greg Peterson ta mustra cu e proyecto en cuestion ta uno completamente ilegal y cu no tin ningun permiso pa realisa e operacionnan aki. Departamentonan concerni den 2016 a mustra cu no ta aceptabel pa traha den e area aki. Pero den 2017, Aruba Birdlife Conservation a ser notifica cu tin trabounan ilegal andando riba lama. Nan a tuma prueba fotografico y haci denuncia inmediatamente na e departamentonan den April di 2017 pa para e proyecto aki. Pero despues di mas o menos tres luna, e proyecto aki a continua durante despues di oranan di atardi pa anochi y den weekend, cual claramente ta mustra cu no control rib’e situacion di parti di esnan concerni.

Segun Sr. Peterson, e proyecto ta uno di mala fe di parti di esnan cu ta haya ta bon pa kita un parti natural di pueblo sin permiso pa nan propio ganashi. Ademas, e area en cuestion ta parti di un di e 16 areanan cu mester wordo protehi. E decision aki a wordo tuma den Parlamento. Un di e tanto promesanan haci durante campana electoral ultimo tabata cu lo haci e area aki parti di Parke Nacional, cual te e dia di awe nunca a wordo haci.

Pa Sr. Peterson, e proyecto aki mester wordo kita completamente y asina evita manda e mensahe robes cu ta aproba pa ken cu ta bin haci proyectonan ilicito na Aruba. E ta sinti cu si e Minister concerni no haci nada al respecto, e caso lo mester haya atencion di Husticia y cu e ora lo mester bin cu investigacionnan pa saca afo dicon nada ta wordo haci pa para e proyecto aki definitivamente.

Sr. Peterson ta mustra cu si dicho proyecto wordo realisa na Savaneta, poco poco e propio Arubianonan (kendenan mester haya prioridad) no lo por ocupa nan propio beachnan mas y e naturalesa di Savaneta lo wordo destrui. Ademas, e ta haya cu e departamentonan mester por sa di actua mas independientemente y profesionalmente sin tin mester laga situacionnan asina bay for di man. Awor lo mester wak kico ta e siguiente paso di parti di Gobierno pa loke ta e situacion controversial aki, sr. Peterson ta conclui.

- Advertisement -

DUNA COMENTARIO

Please enter your comment!
Please enter your name here