Home Gobierno Minister a anuncia e tarifanan fiha pa paga servicio di Serlimar

Minister a anuncia e tarifanan fiha pa paga servicio di Serlimar

415
0
SHARE
- Advertisement -

Esnan cu schouder mas hancho lo genera 11 miyon florin

ORANJESTAD (AAN) – Minister di Infrastructura y Desaroyo di Medio Ambiente, den conferencia di prensa Diabierna mainta, a informa cual ta e tarifanan fiha pa comunidad, pa paga e servicionan di Serlimar, cada luna.

Manera ta conoci nan lo drenta den vigencia entrante 1 di Juli awor y ta keda asina te  aña 2020.

Personanan cu ta genera te 24.000 fls na entrada of menos, pa aña (un total di 5.897 cas) ta paga cero florin.

Cu entrada di 24.001 te 35.000 fls anual (3.506 cas) lo paga 15 florin.

Esnan cu entrada anual di entre 36.001 y 60.000 florin (5.917 cas) lo paga un suma di 20 florin pa luna.

Famianan cu un entrada di entre 60.001 florin te cu 96.000 florin (6.788 cas) lo paga 30 florin.

Esnan cu entrada di 96.001 florin te 120.000 fls (2.874 cas) lo paga 45 florin, y esnan riba 120.001 florin anual te cu 240.000 fls (5.020 cas) lo paga 65 florin.

Pa ultimo esnan cu ta genera mas cu 240.001 florin pa aña (1.025 cas) lo paga 90 florin pa luna.

Esaki ta nifica cu 31 mil cas na Aruba cu ta registra na Belasting lo haya e cobranza for di CIAD, na cual instancia Minister Oduber ta gradici, y el a indica cu e proceso ta inicia aworaki hunto cu Serlimar pa por yega na un acuerdo. El a gradici tambe Minister di Finanzas cu ayuda den e proceso aki pa evita cu e cobranza bay via WEB of ELMAR. Segun e minister no ta husto cu esnan den mas necesidad ta keda mara na WEB y Elmar y e cobranza via Serlimar ta bira mas dificil, mientras cu si ta via belasting ta bira mas efectivo.

E dignatario a agrega cu si tur cos bay bon manera mester ta e recogemento di sushi lo genera un suma anual di 11 miyon florin pa Serlimar. Esaki pasobra ainda mester bay papia cu e Plataforma di recogemento di sushi y e Waste Management, unda tin representante di comercio tambe, pasobra e ley ainda no ta papia cu dunadornan di trabao tambe tin cu contribui na un maneho nobo di desperdicio di sushi,  y nan tambe mester bay cubri un parti di esaki. E minister a bisa cu e ta contento cu nan ta di acuerdo tambe y ta bisa cu nan tin tambe e responsabilidad pa carga y proximamente nan lo bay atende cu e aspecto aki.

E mandatario a indica cu e tarifanan menciona lo keda vigente te aña 2020 y despues nan lo wordo revisa y mira con ta sigui padilanti.

E dignatario a splica, pa finaliza, cu aki ta trata di 31 mil cas cu te na e momentonan aki ta pagador di belasting pero tin casi nuebe mil cas, apartamento y condominium na Aruba, cu Serlimar lo tin e tarea pa bay haci nan investigacion y esfuerzo pa mira si nan lo bin na remarca pa cobra nan. Minister Otmar Oduber a remarca cu tin entre 18 mil pa 20 mil persona cu lo wordo cobra un tarifa substancialmente mas abao cu loke e tabata te awe, pasobra nan ta esnan di menos recurso den nos comunidad of cu tin menos forza y nan tarifa ta wordo pasa pa esnan cu mas ta genera y produci sushi, y ta yuda carga via e schouder hancho cu e grupo aki tin.

- Advertisement -

DUNA COMENTARIO

Please enter your comment!
Please enter your name here