Home Gobierno Minister Dangui Oduber confrontando otro caso den corte

Minister Dangui Oduber confrontando otro caso den corte

344
0
SHARE
- Advertisement -

ORANJESTAD  (AAN): No sa exactamente ken ta consehando Minister Dangui Oduber, pero ta parce cu otro siman e lo ta den Corte atrobe. Abogado mr. David Kock a manda informa e mandatario cu atrobe e no ta cumpliendo cu sentencia di Hues. Ta evaluando un otro “ordemaatregel” posiblemente combina cu un “dwangsom” mirando cu Minister Dangui Oduber tin algo principal contra e Poder Hudicial di nos pais. Ta trata aki di e decision relaciona cu e caso sumario di drs. Jerry Staring di DVG contra Minister Dangui Oduber.

Minister di Salubridad Publico, Turismo y Deporte a prohibi e Director di Directie Vollsgezondheid pa drenta tur edificio di e departamento. Esaki pasobra el a cuminsa un investigacion basa riba kehonan cu un grupo di empleado a entrega. E nunca a informa e Director kico ta e kehonan pa e por defende su mes. Hues algun dia pasa a destrui e decision aki y a manda Staring bay traha bek den su funcion. Atrobe, mescos den otro casonan di Fundacion Lotto pa Deporte, e mandatario ni su famia no a keda contento cu e Hues y e biaha aki ni cu Omaira Lares di DRH tampoco.

Siman pasa Minister Dangui Oduber a manda informa Jerry Staring, cu aunke el a gana su caso den Corte, cu toch e no kier e bek den e funcion di Director di DVG por lo pronto. A instrui’e cu e por bin trabou bek, pero cu e lo funciona como “beleidsmedewerker” di e Minister, pues no por dicidi nada den DVG y no por sinta por lo pronto den e oficina di Director tampoco.

Asina por nota dialuna cu mas o menos 20 empleado a tene un walkout contra Jerry Staring. Entre nan tin empleado cu a haya castigo disciplinario pa motibo di corupcion. Ta bay Supermercadonan Chines y pidi cos pornada a cambio cu no ta bay controla pa higiena eyden. E tipo di empleadonan asina tin problema cu awor tin maneho den DVG. Nan ta mas o menos 20 trahado di 160 empleado den servicio di DVG.

Abogado mr. David Kock ta considera e decision di Minister pa schuif Staring di su funcion como un insulto, un forma di bahe di su funcion na un manera diferente. Den un carta el a mustra e Minister riba e consecuencianan di no cumpli cu un sentencia di Corte y cu e lo pidi un “ordemaatregel” pa obliga Minister Oduber pa respeta decisionnan di Corte.

Den e caso di Fundacion Lotto pa Deporte tambe Corte a tuma un decision pero e Minister no a respete. A bay Hues di nobo pa duna un “dwangsom” te cu 2.5 miyon florin riba cabes di Minister Oduber si atrobe e no respeta sentencia di Hues.

Un fecha pa e caso di Jerry Staring na DVG no ta conoci, pero ta imagina cu e lo sosode den e siguiente dianan mes.

- Advertisement -

DUNA COMENTARIO

Please enter your comment!
Please enter your name here