Home Enseñanza Minister Rudy Lampe a firma acuerdo di cooperacion cu Stichting Avondonderwijs Aruba

Minister Rudy Lampe a firma acuerdo di cooperacion cu Stichting Avondonderwijs Aruba

159
0
SHARE
- Advertisement -

ORANJESTAD (AAN)—Den conferencia di prensa di Gobierno, Dialuna mainta, Minister di Educacion y Desarollo Sostenible, sr. Rudy Lampe, a pone comunidad di Aruba na haltura cu Diabierna 6 di Juli awor el a firma un acuerdo di cooperacion (samenswerking- protocol) cu Stichting Avondonderwijs Aruba (SAA).

El a menciona cu e presidente di SAA ta sr. Frans van Drie, y seguidamente a splica kico e protocol aki ta encera.

Minister Lampe a indica cu pa hopi aña, e conseho di parti di Directie Onderwijs tabata pa loke ta Middag y Avond MAVO keda integra hunto cu Avond HAVO, como algo logico.

Esaki pasobra ambos tipo di educacion ta pertenece na otro, ya cu esnan cu ta haya nan diploma sea MAVO of HAVO ta stroom door pa Avond HAVO, y pesey nan a dicidi pa cuminza e proceso di separa e Middag HAVO-MAVO for di OAA.

OAA ta referi na tur e cursonan di ofishi cu ta wordo ofreci anochi, den e caso aki na EPB y nan tabata hunto cu e curso di Middag y Avond MAVO.

Pa e motibonan menciona, e dignatario a sigui bisa, a keda dicidi di kita e parti di Middag HAVO-MAVO for di OAA y pone bao di Stichting SAA, y esaki ta e acuerdo cu e mandatario a yega cu e Stichting Avondonderwijs Aruba.

Minister Lampe a sigui bisa cu esaki ta un situacion cu ta na bentaha di tur dos banda. E mandatario a splica cu di e forma aki lo inicia un proceso cu lo beneficia e calidad di enseñanza ya cu ambos ta nivelnan riba e mesun tipo di educacion y un tipo di cooperacion entre tur dos stichting lo beneficia ambos banda.

“Uni forza ta sumamente importante, y nos tur sa cu ora ta uni forza tin beneficio pa tur dos banda”, e mandatario a reitera.

E mandatario a agrega cu tin un noticia falso cu ta circula comosifuera cu el a retira e directora di OAA, locual absolutamente no ta berdad. Minister Rudy Lampe a subraya cu e directora aki ta keda cu su cargo y pa loke ta trata e siete empleadonan cu aworaki ta na servicio di Middag y Avond MAVO, nan lo wordo poni na SAA y si nan no ta desea esaki nan lo haya un funcion apropia dentro di DPS (Dienst Schoolnan Publico) unda nan ta resorta aworaki.

Kiermen, ningun empleado lo perde trabao ni mester ta preocupa pa nan posicion huridico, e dignatario a enfatiza.

Tocante e docentenan cu aworaki ta dunando les na Middag y Avond MAVO, nan tur ta dunando les a base di contrato pa ora, y e docentenan aki tampoco mester tin ningun preocupacion pasobra den e proximo temporada aki nos lo continua cu nan servicio.

Refiriendo na e studiantenan, e dignatario a expresa cu tampoco tin motibo pa preocupa pasobra e oferta educativo Middag-Avond MAVO aki, lo continua den e aña escolar nobo.

Minister Lampe a haci un yamada na studiantenan cu ainda no a inscribi, ya cu ta bay amplia e periodo di inscripcion te cu 18 di Juli. Kiermen, esnan cu tin interes pa Middag MAVO of Avond MAVO, y no a inscribi ainda por acudi. Lo uza e mesun formulario y a amplia e periodo te 18 di Juli awor, pa asina por cuminza e estudio den e aña escolar 2018-2019.

- Advertisement -

DUNA COMENTARIO

Please enter your comment!
Please enter your name here