Home Comercio No obstante tur bada bada tog Astec ta ganando extra-placa cu e...

No obstante tur bada bada tog Astec ta ganando extra-placa cu e delaynan

59
0
SHARE
- Advertisement -

Awor BGD a instala sensor di aire riba Waf di Barcadera

ORANJESTAD (AAN): E situacion na Waf di Barcadera ta keto bay mescos.  Ningun adelanto ainda, y e holor fuerte di e huma conteniendo grado halto di Sulfur, ta afectando trahadornan.

Tin biaha ora e ta hopi fuerte, e trahadornan ta djis stop di labora y bay den Cantina pa warda ki ora e holor pisa ta pasa.  Ora cu e mustra di bira menos, nan ta sali y resumi nan trabao.

Pero esaki hopi biaha ta trece tardanza pa descarga container di Barco.  Y ultimo simannan cada biaha no ta tur container ta wordo baha.  Barco e ora ta haye obliga na sali bay rumbo e.o. Curacao, y despues ta regresa tratando di haya chens di bolbe baha container.

Tur e tardanza aki ta costa placa pa e compania di barco, pa e importadornan, y pa tur hende.  Pesey ultimo simannan bo por nota cu algun prijs di producto ta bolbe subi den Supermarket.

No obstante esaki, e trahadornan di Waf di Barcadera no ta perde speranza.  Aunke nan ta disgusta con nan doño di trabao, esta Astec kier ta wrong y strong riba e asunto aki.  Tur cos a keda mescos.  Esey ta loke un fuente di Sindicato di UPA a revela na DIARIO.

 

   BGD A INSTALA SENSORS

Recientemente e trahadornan a nota con funcionarionan di BGD y SVb a yega na Waf di Barcadera, pa asina nan instala algun Air-Quality Sensors riba e tereno.  Esaki ta algo di aplaudi, pasobra porfin tin data cientifico di e huma.

Sinembargo, tin di mustra cu ora e funcionarionan aki a bin instala e machinenan aki di sensor, nan mes a sinti e huma fuerte!  “Nan a sinti e holor intenso di biaha,” un representante di UPA a indica na DIARIO.

E holor aki ta irita bo garganta y nanishi mesora.  Eynan mes, e funcionarionan a sacudi cabez y mustra den direccion cu hala rosea den e huma aki no ta bon.

Di tur esaki, trahadornan di Waf di Barcadera ta keda para ariba, cu ta e Director di Astec ta keda responsable (“aansprakkelijk”) pa e prome empleado cu diripiente haya cancer.

Sulfur ta trece hopi efecto pa e ser humano, tanto den su pulmon como riba su cuero.  Pueblo por corda claramente, con den pasado ora cu huma di Refineria Valero na San Nicolas cambia di direccion (debi na biento), con Departamento di Enseñanza ta manda e scolnan pa cera nan porta, y alumnonan por bay cas debi na e molester.

Tempo cu tabatin candela den un Dam na Tamarijn, Gobierno a manda muchanan di scolnan di Paradera tambe pa nan cas.

Y awor e empleadonan di Astec?  E biento ta 24/7 cu huma diki y sofocante riba nan.  “Ki mas prueba mester tin cu e huma ey ta dañino riba nos?” a ser puntra.

Sindictao UPA a yega di exigi investigacion, y prome cu e mudamento di Playa pa Barcadera, a sabiendas cu tin e huma aki, tog Astec a dicidi pa muda Waf, no obstante cu tin problema cu e huma cu contenido halto di Sulfur eyriba.

Cu tur e problemanan aki, unda ATIA tey awe pa defende trahadornan?  A scucha ATIA papia algun biaha, pero ya a keda keto.

Con por ta?  Siendo cu cada rato e trabao di descarga container ta wordo interumpi, y empleadonan tin di bay cera nan curpa den Cantina warda e nivel di huma penetrante baha poco.

Esey ta pone cu hopi barco ta bandona Aruba, sin cu a descarga tur cos.  Di con ATIA no ta cuestiona e cos aki?  Pasobra carga no ta ser baha, y e comerciante ta keda perhudica y pueblo consumidor lo carga e gasto extra aki.  Barconan cu no caba di descarga ta bay Curacao y bin bek pa descarga.

Segun UPA, tur e cosnan aki por a wordo premira di decada pasa caba!  For di ora cu tabata anuncia cu Waf di Carga lo bay Barcadera.  Di con ATIA no ta reclama esaki?  Of si acaso e tempo aya como miembro di ATIA, no tabata interesa den esaki.

TOG ASTEC CU EXTRA-INKOMEN:

No obstante tur e problema aki, e sorpresa di mas grandi ta cu Astec ta haciendo ganashi extra e dianan aki.

“Nos como empleado ta riesga nos salud, pero e doñonan di Astec ta haciendo ganashi,” a ser splica na DIARIO.

UPA ta para ariba cu e unico “hendenan cu ta ganado den e caso aki”, ta Astec mes.  E tardanza di baha y hisa container, ta pone cu Containernan ta keda atras.  Esaki no ta keda atras gratis, pasobra Astec ta cobra prijs di storage (liggeld) extra.  Containernan Frieu (Reefer) cu mester sali, cu no por sali debi n ahuma, ta keda extra dia usando coriente cu tin di paga na Astec.  Al final, danki na e huma aki Astec tin extra-inkomen, tanto na coriente, storage, y ta imposible cu ATIA ta keto y no ta sali na defensa di su miembronan cu ta perdiendo hopi placa.

Pa esnan di UPA, ta imposible pa pensa cu e Project Developer original pa e Waf di Barcadera, for di prome dia cu a cuminza construi/desaroya e waf, no a sinti e huma?  Anto awe e ta man drechi di Director, y consecuencia cu e Waf ta desastre, tanto den capacidad di mantene container, te cu empleado maneha machine pa load container, y hasta sufri di e huma.  Esaki ta un forma unsafe.

Nan a haya informacion di e Contratistanan cu a construi Waf di Barcadera, a revela cu e tempo aya nan tambe a sufri asina hopi, te cu na cierto momento nan tabata haya algo pa bebe (lechi) pa neutraliza e efecto di e holor den stoma, pero e pulmon ta haci nada.  Pesey di con nunca Astec no a tende di e situacion aki cu e Contratistanan?  Di con nunca Astec no a tende di e dolor di cabez di e Contratistanan cu a construi e Waf?

En general, e trahadornan disgusta cu e lema di director, cu “The Show Must Go On”.

Esaki ta sona den orea di Trahadornan, como sifuera cu e trabao ta bay dilanti,
No matter what, your health doesn’t count.”

- Advertisement -

DUNA COMENTARIO

Please enter your comment!
Please enter your name here