Home Parlamento Parlamentario Endy Croes cu critica den direccion di Melvin Tromp

Parlamentario Endy Croes cu critica den direccion di Melvin Tromp

44
0
SHARE
- Advertisement -

“Labando cabez di burico bo ta gasta awa, gasta habon y perde bo tempo”

ORANJESTAD   (AAN):  Segun Parlamentario Endy Croes no ta cu tur cos bo mester perde bo tempo. Primordialmente ex politiconan cu a goza y cobra casi 2 MIYON den 8 aña sin cu nan a significa algo pa pais Aruba. Ainda despues cu nan gobierno a bay atras cu alrededor di 10 mil voto unda pueblo claramente a rechasa e gobernantenan y e Parlamentarionan di AVP pa e manera cu nan a maltrata y destrui nos Pais, e mesun persona aki cariñosamente conoci bao di e nomber di Donkey Tromp pa su trabaonan cu el a refleha den Parlamento a pidi BVVD despues di eleccion pa e keda cas y sigui cobra.

No obstante e “desaster financiero” cu su partido AVP a ocasiona Mike Eman aun saliendo for di gobierno contra tur regla y consehonan di Departamento di Recurso Humano (DRH) a basha firma den ministerraad november 2017 pa duna e “tipo” aki BVVD unda e por keda cas y cobra.

Kisas e palabra sinberguensa ta keda chikito pa personanan cu un mentalidad asina mezquino. Hustamente e personanan aki mester a traha riba leynan y  controla gobierno. Het kan verkeren!! Porfin nos a compronde di Minister di husticia sr. Andin Bikker cu ordo a bay pa e persona aki bay traha bek.  Nos lo keda monitor den e dianan nos dilanti y si pasa un siman mas cu e no raporta na trabao nos lo percura pa trece esaki den nos proximo conferencia di prensa pa pueblo por tuma nota di e grado di sinberguensanan aki. Fiesta a caba y banda a stop di toca, hendenan a bay cas pero tin algun cu no kier compronde y kier sigui goza y kier sigui baila riba custia di pueblo.

No obstante esaki por a tuma nota di un articulo cu Donkey Tromp a publica unda e kier spanta pueblo bisando textualmente “ta confirma cu tin mas medida na caminda” . Esaki e “tipo” aki a compronde for di un articulo cu el a lesa. Esaki corectamente ta mustra su grado di comprondemento ora e lesa un articulo.

Dicon e no ta splica pueblo cu el a grita “VOOR” pa tur cos aportando na e desaster cu nan a laga atras? Dicon e no ta papia cu AVP a redobla e debe nacional di 40 pa 90%? Palabranan di Raymond Knops staatssecretaris di Hulanda. Dicon e no ta splica pueblo cu den 2018 e gobierno aki meser paga 216 MIYON florin solamente na interes di placanan presta door di AVP sin paga riba e capital mes? Esaki ta igual na 600 mil florin pa cada dia, 365 dia den 2018.

Dicon e no ta splica pueblo cu el  a aproba tur e proyectonan PPP cual mester cuminsa paga e aña aki 80.7 MIYON pa aña pa 20 aña largo? Dicon e no ta splica pueblo pakico el a aproba y laga su idolo Mike Eman malgasta 89 MIYON na promotie en marketing pa amigonan manera Leoncita, Patrick Paskel, Oscar Fernandez pa nombra un par?

Dicon e no ta splica pueblo cu Mike Eman su lider a percura pa regala amigonan di AVP 212 MIYON florin di pueblo na “deskundig advies”? Dicon e no ta splica pueblo cu apesar cu Mike y AVP tabata tin 400 consehero y coordinador cu a costa pueblo miyones, banda di esaki nan a malgasta 212 MIYON na extra advies.

Bueno asina nos por sigui pero ta bon pa pueblo sa ki tipo di lider e tabata tin den Mike Eman. Un lider kende hunto cu su discipulonan a destrui nos nacion pa nos futuro generacion. Labando cabez di burico berdad bo ta gasta awa, gasta habon y perde bo tempo. Tiponan aki manera Mike Eman y su team cu a caba cu Aruba no mag di bolbe nunca pero nunca mas. Cu pasenshi nos lo saca Aruba for di e abismo cu AVP a hinca nos aden, Croes ta termina bisando.

- Advertisement -

DUNA COMENTARIO

Please enter your comment!
Please enter your name here