Home Enseñanza Parlamentarionan semper tin e derecho pa haci pregunta encuanto e mocion contra...

Parlamentarionan semper tin e derecho pa haci pregunta encuanto e mocion contra intencion Minister Rudy Lampe

110
0
SHARE
- Advertisement -

Ady Thijsen:

ORANJESTAD(AAN): Presidente di Parlamento, Ady Thijsen tambe a reacciona riba balor di un mocion cu a worde presenta den parlamento, riba independisacion di schoolnan. Parce cu silenciosamente minister Rudy Lampe toch ta sigui cu esaki, mientras cu tin un mocion.

Segun Thijsen, tur parlamentario y fraccion den parlamento, si nan ta sinti cu tin cierto cosnan cu no ta bayendo bon, semper nan tin e derecho pa haci nan preguntanan. Nan tin derecho tambe pa manda un carta pa presidente y pidi un reunion. Den e caso specifico aki, nan no ta sinti nan bon pa loke ta trata un mocion cu a worde entrega y ora cu parlamento manda mocion, e no ta solamente un deseo. Pesey ta uza palabra “urgi gobierno”. Esey ta nifica cu kier tin movecion den esaki. Hasta na Hulanda un miembro di Tweede Kamer, a menciona cu esaki no ta solamente un wens, pero e ta un opdracht. Nan ta wak’e tin biaha hopi mas profundo.

Como presidente di parlamento e ta comenta cu tur ta colega, como tambe Ady Thijsen ta un parlamentario, pero como presidente, ta percura pa ora cu e parlamentario of fraccionnan tin cierto preocupacion, pa loke ta trata ministernan, ta normal pa yama ministernan aden pa puntra nan y mira kico ta pasando. Si nos ta biba den un democracia sano, no tin preocupacion den esaki, sr. Thijsen a splica. Un minister ta mester ta bon prepara pa por duna di nan banda pa duna un bon contesta. Pero presidente di parlamento lo bay wak kico sr. Sneek kiermen. E tin cu bay topa cu Thijsen back. E lo sa di combersa cun’e y lo mira kico lo bay pasa cu esey.

Si por mira bon, e pregunta ta keda si un mocion ta un obligacion of e ta un deseo. Ady Thijsen a splica cu ta depende den ki cultura politico ta biba aden. Nos ta biba den un cultura politico unda cu e democracia ta full otro. Hulanda ta mesun cos cu nos. Un pais democratico unda cu su democracia mester funciona. Bo tin gobierno, bo tin parlamentarionan, tin e parti hudicial. Den e caso aki, segun Thijsen, semper ta worde bisa cu e mocion ta un deseo, un wens. Pero na Hulanda por ehempel tin Tweede Kamer, unda cu parlamentarionan ta kere cu no ta solamente un deseo. E mester tambe ta un tipo di opdracht, cu ta un obligacion. E no ta ainda, pero e ta algo si cu por bisa cu bo por consider’e como un opdracht. Mester demostra cu un mocion tin peso. E presidente di parlamento ta kere cu ora e topa cu sr. Sneek, mester agenda esaki y wak kico lo pasa.

Thijsen tin cu check prome kico e fraccion di AVP kier, despues tin cu wak e otro fraccionnan. Hopi biaha nan tin reunion den e huishoudelijk commissie. Eynan ta caminda e lidernan di fraccion ta topa cu otro. E fraccion di AVP ta pidi pa un reunion. Tin biaha nan ta haci’e via comisionnan fiho tambe. Nan ta pidi e minister pa bin, pa duna cierto informacion, califica esaki, pero tin biaha ta yega asina leu cu un fraccion ta yega asina leu cu un minister. Un reunion publico. Semper ta evalu’e, depende tambe kico ta pasando. Esey semper por evalua. Un biaha mas, e presidente di parlamento ta pone enfasis riba e punto cu a bin cu un cambio den e parlamento nobo aki.

A bisa cu no kier worde mira como stempelparlament, manera cu tabata e caso pa 8 aña largo. Democracia mester funciona y e mester ta normal cu cierto reunionnan ta tuma luga. Papiando pa su mes, Thijsen a menciona cu si e un dia e mester bira minister, no mester ta un problema cu ora yam’e aden, mester por bin. Si bo ta sigur di bo trabao y kico bo ta haciendo, ta bon pa bin, pa pueblo sa kico ta kico.

E reunionnan aki ta worde haci pa pueblo, pa cualificacion riba desaroyonan cu ta importante pa bienestar di e pueblo.

- Advertisement -

DUNA COMENTARIO

Please enter your comment!
Please enter your name here