ORANJESTAD(AAN): Dos miembro di Iglesia Sion Aruba, a perde nan bida Dialuna den un accident di trafico na Venezuela.
Un pareha di misionero recien yega Maracaibo y nan chauffeur, a fayece 5’or di dialuna atardi, despues cu nan a dal contra di un truck Ford Cisterna 750.
Segun autoridadnan di trafico na Venezuela, e accidente a tuma luga di forma frontal den e sector Macucutao di e municipio Guajira y e pareha di misionero a worde identifica como Angel Maria Fernandez Ruda di 55 aña y Ilse Beatriz Cegrera Cruz di 54 aña.
E chauffeur di e Chevrolet Caprice ta conoci como Otto.
E pareha tabata di nacionalidad Colombiano, y tabata biba na Aruba. Dialuna an a sali for di eynan pa Maiquetia, despues di a tuma un vuelo pa e aeropuerto di Chinita, cu destino final Santa Marta, Colombia unda cu nan a asisti na un velorio.
Esnan yega na e pareha a comenta, cu una bes cu nan a yega na e aeropuerto La Chinita, nan a tuma un taxi pa bay na e Plaza de Toros, y despues a subi den e auto Chevrolet Caprice, cu a hiba nan pa Maicao (Colombia).
Un ora despues, e accidente a tuma luga. Eynan tambe un dama cu tabata di pasahero a keda herida, pero ta desconoce su estado di salud.
E curpanan di Angel y Ilse a worde hiba na e morgue forense di Maracaibo, unda cu lo efectua un autopsia.
Mientras tanto na Aruba, e noticia aki a shock tur cu ta haci e trabao noble aki, specialmente esnan di Iglesia Sion Aruba, y demas miembronan di congregacion GSCC Aruba y Hulanda.
