Home Salud Prostitutanan cu ta traha cu permiso ta bao di reglanan estricto di...

Prostitutanan cu ta traha cu permiso ta bao di reglanan estricto di control di DVG

100
1
SHARE
- Advertisement -

Sharline Koolman:

ORANJESTAD  (AAN): E tema di e muhernan cu ta prostitui na San Nicolas a capta basta atencion ultimo dianan despues di e accion di Guarda Nos Costa. Nan ta traha bou di reglanan estricto di control di Salubridad tambe. Durante entrevista cu Sharline Koolman di e departamento di malesanan contagioso el a splica un tiki mas di e proceso.

E ta conta cu DBZ tin e autoridad pa controla e muhernan aki, pa loke ley ta regla. E enfermeranan cu ta traha eynan ta e toezichthoudernan. Nan ta controla ora ta haya necesario riba e parti medico. Tambe nan por haci control den bar. Por ehempel pa e parti di higiena. Esey nan ta haci hunto cu Departamento di Higiena.

Hunto pa DVG nan por controla si e localidad y caminda cu nan ta hospeda y duna servicio si e localidad ta apto pa haci esey. Pero esey ta sali for di e landsverordening besmettelijke ziekte. E control cu nan ta haci, normalmente ta dos biaha pa aña, unda nan ta bay hunto. Normalmente ta bay hunto cu polis. Tin biaha ta pidi otro departamentonan. Den pasado brandweer a bay cu nan, otro departamento cu tambe ta haci nan control.

Si un departamento duna conseho riba un parti y e otro departamento tambe duna su conseho di biaha pa e localidad cumpli cu tur regla y e hendenan cu ta traha. Den e caso aki, prostitutanan cu ta traha, pa tur cumpli di biaha cu tur e puntonan cu nan a haya cu nan mester drecha. Pa e motibo ey e ta bon. Pero esey no ta kita afo, cu cada dienst, cada departamento tin e autoridad pa controla ora cu e haya un keho of ora cu cerca DBZ, un dama yega y duna un keho anonimo cu tal tal cos ta pasando, nan por bay y haci un control extra. Ta haciendo esaki dos biaha pa aña pa sa cu e luganan ta den un bon estado, e cuarto, e localidad cu ta wordo uza tambe ta cumpli cu regla. Pero banda di esey, e dienstnan tin e autoridad pa controla extra.

Segun Sharline Koolman un “animeermeisje” ta drenta normalmente riba diadomingo. E doño di bar ta haci un peticion na Dimas. Dimas ta mande un carta cu e persona por drenta Aruba cun’e, yama VTA. Cu e carta ey e persona ta haya invitacion pa drenta un solo biaha Aruba y cu e carta ey e ta presenta na DBZ dialuna mainta. Ley ta prescribi cu dentro di 24 ora cu drenta Aruba, E prome dia di trabou e dama mester presenta na Salubridad Publico. Si nan yega diadomingo, IASA tambe ta pasa un proceso pa stempel e entrada, esta e VTA. Cu e carta ey nan ta yega dialuna mainta na Salubridad publico y a base di esey ta cuminsa cu e testnan cu nan tin cu haci. Esey ta conta pa tur persona, tur “animeermeisje”, cu ta bin cu un permiso via Dimas pa traha na Aruba, segun Sharline Koolman. Na e momento cu nan bay eynan, nan ta coy sanger y otro testnan necesario.

Tambe e ta haya un peticion pa bay rontgen. Eynan e ta saca potret di pulmon. Esey ta pa e parti di TBC (tuberculosis). A base di e resultadonan ey, ya diaranson of diahuebs, tin e resultadonan di sanger y tur cos bek. Ya pa diahuebs atardi, nan sa si nan por keda Aruba of tin algo cu, a base di nan salud, nan no por keda.

A base di esey, ta manda riba diahuebs atardi y diabierna, nan ta bay controla na un dokter di cas cu ta haci e trabao eynan. E ta controla nan medicamente. Si mester haci algun otro testnan extra, e ta informa DVG y tambe a base di esey diabierna, Dimas ta haya e lista di e damanan, cu ta ok pa traha y esunnan cu no ta OK tambe.

Tin cu remarca cu casi nunca ta haya uno cu no ta bon, pasobra ta exigi tambe pa prome cu nan yega Aruba, nan haci nan testnan na Colombia caba.

Esey ta pa e persona mes, no yega Aruba y hay’e cu un extra gasto, pero, no kier core e riesgo cu e persona ta yega Aruba y e tabata tin tres of cuater dia wardando riba su permiso, cu e chens cu e por tabata tin relacion sexual caba cu otro hende na Aruba y cu tin cu bay yama tur esnan cu a tene relacion cun’e, pa haci tur test, etc. Pa evita esey ta pidi tur e testnan delanta for di Colombia. No ta acepta e testnan aki y kier pa haci nan di nobo, pasobra ta DVG mes ta priknan. Basa riba e VTA ta wak si ta e persona. Basa riba esey por deduci cu ta trata di sanger di e persona aki y cu e persona en cuestion ta OK.

- Advertisement -

1 COMMENT

  1. Awel dicon nan ta jega un diasabra o diadomingo anto e dono nan di bar ta pone nan traha di biaha e cobra huur……???
    Ta te ora nan haci nan test nan e hanja e resulta nan mag di traha pero no prome cu esey……!!!!!

DUNA COMENTARIO

Please enter your comment!
Please enter your name here