Home General Recordando Ruben Trapenberg: Un persona cu tur hende tabata admira

Recordando Ruben Trapenberg: Un persona cu tur hende tabata admira

845
0
SHARE
• Ruben H. Trapenberg: 1962 - 2018
- Advertisement -

ORANJESTAD (AAN): Diamars mainta a habri, cu un shock pa miles di hende na Aruba y demas paisnan den vecindario.  Esey ta ora cu a drenta informacion, cu e conocido periodista, cantante, locutor, vocero, sacerdote ordenado, y anchorman Ruben Trapenberg a fayece.

— Hunto cu Richard Gere riba stage.

El a muri madruga den su soño debi na un atake di curazon.

Ruben Hipolito Trapenberg a nace riba un Diamars, dia 30 di Januari 1962 na Aruba.  Su tata Ben Trapenberg tabata conoci pa su trabao na Waf, atende freezernan riba botonan.  Su mama Angelica Franken a fayece na comienzo di decada 2000 debi na accident di auto.  Su tata a fayece na comienzo di decada 2010.
Di su famia y primonan, Ruben a haya e apodo “Bencho”, y for di trempan caba el a demostra su amor pa un genero di musica, y tambe tabata un bon persona.

Despues di scol, durante decada di 1980, el a drenta Servicio Militar Obligatorio na Marinierskazerne y e tabata bisa su amigonan, cu esaki ta e base cu a yude obtene su famoso disciplina pa cual el a bira conoci pe pa resto di su bida.

— Cantando durante Carnaval.

El a bay traha despues pa Aerolinea KLM, unda el a bira Steward abordo di avionnan.  Asina e tabata haci vuelonan regularmente entre Aruba y Europa, y rond mundo abordo di avionnan.  Despues el a regresa Aruba pa sigui traha aki.

   COMIENZO DEN PRENSA:
   Ruben Trapenberg a traha tambe cu DIARIO na final di decada di 1980, y tabata demostra su talento den tur asunto di propaganda.  Mesora el a cera amistad y un lazo aun existente cu su coleganan, y a traha pa mehora su trabao na un forma grandi.  E tabata conseha clientenan di DIARIO, riba asuntonan di crea propaganda, ponemento di nan advertisements, y coordina e presentacion y mucho mas.

Su voz a resona riba ondanan radial di 89.9 Mhz, ora cu el a tuma over e programa “Rockhouse” di 7 pm pa 9 pm na Canal 90 FM.  El a crea un rating asombroso pa e show, y el a bira e idolo di hopi hoben cu e decada ey tabata sigui musica di Rock y Heavy Metal di cerca.  Aki ta unda e nomber “Ruben Traxx” a bira famoso, y te dia di awe ta hopi hende ta simplemente yame “Traxx”.

— Un maestro di ceremonia respeta.

E tempo ey Aruba no tabatin Cable-TV.  Y e mes a dicidi na produci videonan VHS unda e ta anima un show di 2 ora, unda e ta presenta Videoclipnan cu e tabata graba di MTV.  E videonan aki cu musica Rock, a bira hopi popular e tempo ey.  Asina el a yuda hopi hende cu nunca a mira videoclip di nan grupo favorito, pa mire.  Esaki tambe tabata e prome biaha cu su cara a aparece dilanti camera.

Ruben Trapenberg ta un persona cu semper tabata multitalentoso, multifacetico, intelectual, y bon observador.  E ta un genio den planning di evento, negoshi, logistica, y continuidad.

Esey ta e motibo tambe pa cual el a progresa, y a traha pa TV, tambe pa agencianan di advertising, a fungi como Vocero di AAA NV (Aeropuerto), y hasta a bira Vocero di Gobierno Oduber di Aruba.  Su imagen a aparece algun biaha tambe den entrevista LIVE cu canalnan di TV Mericano cu tabata cubri e asunto di Natalee Holloway na 2005.

MUSICA ROCK:  E talento como musico tambe ta loke a pone Ruben Trapenberg den spotlight.  E tabata un pionero pa promove musica Rock tanto na radio, como riba escenario.  E tabatin su propio Rock Band tambe.

El a forma parti, y canta cu diferente banda di rock estableci na Aruba.  Ultimo ainda e tabata forma parti di e “Legend Band”, cu pa colmo dia 21 di Juli venidero cla pa haci un comeback.

— Durante Aruba Film Festival.

Tambe e tabata acudi na diferente concierto di Musica Rock den exterior, y sa viaha cu su grupo di amigonan conoci como “Kawara Metal Boys”.  E noticia di su fayecimento a laga e amigonan aki den shock tambe.  Nan ta hasta yama Ruben como e “Godfather of Heavy Music” na Aruba, y cu su cabey largo e tempo ey, e tabata algo cu a tipifica Ruben.

Tempo cu e tabata presenta un programa di rock music tur anochi na Canal 90, su base di fanaticonan a crece grandemente.  For di su hubentud caba, su amor pa musica rock tabata importante.  Y el a keda stima e genero di musica aki, y pesey hasta aña pasa el a acudi na e Chicago Open Air Concert di rock.

MUSICA CALYPSO:
E sorpresa di tur hende ta ora cu un dia el a anucia cu e tambe ta bay participa na Calypso & Roadmarch Contest durante Carnaval.  El a crea e nomber “Mighty Hippy” pa su mes, y a sa di bira ganador di Roadmarch cu e cancion “Wok”.  El a yega di sali runner-up cu “Tingeling Man”.

Tin algun cu hasta ta duna Mighty Hippy e credito cu el a yuda re-anima e interes den hobennan pa cu Calypso & Roadmarch Contest.  Y el a hasta crea un tipo di ‘following’, unda cada aña su fanaticonan tabata acudi na e evento Carnavalesco, djis pa mira y scucha loke e ta presenta riba escenario cune.

   ULTIMO DECADA:
E voz di Ruben a wordo usa pa diferente propaganda di radio y TV cu ainda por wordo scucha.  Su dominio di idioma Ingles cu pronunciacion perfecto, ta algo cu comerciantenan semper a gusta. El a traha ademas na Magic FM, y tambe a bira Anchorman di Noticia Awenochi na ATV.

— Cu hopi amor pa Carnaval.

E tabata haci ultimo tempo trabao di Anchorman pa Telenoticia di Telearuba, y tambe ta presenta e noticiero na Hits 100.9 FM.

Ademas di esaki, Ruben Trapenberg a bira un ‘ordained minister’, y e tabatin permiso pa efectua hopi acto ceremonial di boda, specialmente cerca turistanan cu kier a casa riba beach na Aruba.

El a ricibi aprecio, admiracion, y hopi comentario positivo pa su postura critico, pero corecto di e forma cu el a conduci e famoso Debate Politico organiza pa KvK na Juni 2017.

   MALESA A BATI PORTA:
   Tabata mey-mey di October 2017, cu un anochi banda di 10:00 pm inespera Ruben a sinti dolor acudo den area di su pecho pa stoma.  Dolor a keda henter madruga. Mainta el a acudi na su Docter, kende a consehe pa bay mesora na Servicio di Emergencia, unda mesora nan a haci test cune.  El a kere na prome instante cu ta su curazon, pero a check e.o. cu Echo y demas test.  El a keda interna na Hospital e dia ey.

Na final di October ey, el a revela cu e ta na cas bek, y a mustra cu e testnan a revela cu e tin un Non-Hodgkin Lymphoma.  A dicidi pa start cu tratamento contra e cancer na Aruba mes, y despues ta sigui mas avanza na Hulanda.

Na December 2017, el a mustra cu e ta cuminza cu Chemo #2, y el a perde tur su cabey e tempo ey caba.

Na luna di Januari 2018 el a bay pa Erasmus Medisch Center na Rotterdam, Hulanda, unda a sigui cu tratamento avanza contra e cancer.

Mei 2018 el a haya bon noticia, cu e por regresa Aruba!  El a haci esaki mesora, y a produci alegria pa tur su friends y famia.  Su cancer tabata ‘bao control’, indicativo cu e tratamento na Hulanda a bay bon.

Dialuna siman pasa, esta 25 di Juni, durante un Conferencia di Prensa di un partido politico, Ruben Trapenberg a sorprende tur hende ora el a yega eynan pa cubri esaki.  Tur periodista den sala a grita di alegria y dune aplauso.  El a revela cu el a cuminza traha pa mitar dia.

Ocho dia despues… un atake di curazon a pone un fin na su bida.  E ta algo cu ciencia na diferente ocasion a mustra, cu hopi hende cu a sobrevivi cancer di Non-Hodgkin Lymphoma, ta core riesgo halto di sufri fayo di curazon, compara cu poblacion en general.

Ruben a bay sosega cu apenas 56 aña di edad.  Un homber hopi stima pa su coleganan y pa tur hende!

Ruben a bay lagando su querida esposa Marian, y su dos yiu muhernan, Ann-Marie y Stacey-Ann.

Na su famia, amigonan, y conocir, DIARIO ta extende su mas profundo palabranan di condolencia.  Cu Todopoderoso tuma e ciudadano ehemplar aki den su Reino.  Danki pa e bunita amistad aki, Bencho!  Sosega na paz.

- Advertisement -

DUNA COMENTARIO

Please enter your comment!
Please enter your name here