Home Ciencia y Tecnologia Repsol a caba cu e prome fase di boramento di nos subsuelo

Repsol a caba cu e prome fase di boramento di nos subsuelo

156
0
SHARE
- Advertisement -

Minister Presidente:

Sin daño pa nos medio ambiente

ORANJESTAD (AAN) – Den cuadro di locual Prome Minister mr. Evelyn Wever-Croes a haci algun siman atras, cu den luna di Juli Repsol lo a haci un “boramento di prueba” pa test y tuma algun muestra, pa investiga kico tin den nos subsuelo, e dignatario a duna un update den conferencia di prensa Diahuebs.

Nos prome mandatario a informa cu e boramento aki a keda cla y tur cos a bay sin ningun particularidad.

“Tocante e boramento aki tabata tin hopi preocupacion na Aruba cu respecto na nos medio ambiente. Mi mester bisa cu tin tres ministerio pa atende riba e tema aki. Naturalmente mi ministerio bao cual Repsol ta resorta, tambe ministerio di infrastructura y medio ambiente y otro ministerio hopi importante den esaki, ta ministerio di transporte y comunicacion, mirando cu segun e palabracionnan y contrato cu Repsol, Directie Scheepvaart tin un trabao importante pa haci pa vigila y supervisa e trabao cu ta tuma lugar.

E dignatario a subraya cu no tabata daño na nos medio ambiente relaciona cu e boramento aki, y den e cuadro aki Gobierno a ricibi un carta di Partido Raiz cu pregunta al respecto, cu a wordo tuma na serio y contesta mesora cu den e informacion cu gobierno a haya no tabata tin ningun riesgo ni daño na nos medio ambiente.

Partido Raiz a referi na un investigacion cu si tabata tin, y gobierno a pidie pa comparti esaki cune, pasobra nan no ta na haltura cu un investigacion asina a wordo haci, y ta wardando riba esey.

Prome Minister a agrega cu no tin boramento ta tumando lugar mas, Repsol a bay caba mientras nan ta analiza e datonan cu nan por a acumula pa e ora ey informa gobierno con hopi nan ta kere cu tin gas of petroleo den nos awanan teritorial.

Prome Minister a indica cu ora Repsol bin cu e datonan aki, gobierno lo duna comunidad mas informacion.

Esaki ta riba e prome fase. Si acaso ta bin den e informacion cu tin hopi petroleo of gas cu ta hopi viable pa extrae y pa bay bende, naturalmente lo bay den un siguiente fase di contrato, y logicamente lo tin hopi mas bista y supervision pa ta sigur y si esaki ta sigui mes, lo bay tin hopi mas proteccion pa nos medio ambiente. Esey e dignatario ta garantiza na nos comunidad.

- Advertisement -

DUNA COMENTARIO

Please enter your comment!
Please enter your name here