Home Gobierno SADA ta yama reunion di urgencia pa awe mainta na Douane Hoofdkantoor

SADA ta yama reunion di urgencia pa awe mainta na Douane Hoofdkantoor

152
0
SHARE
- Advertisement -

Douaneronan kier atencion di Minister di Finanzas

ORANJESTAD    (AAN):   Sindicato SADA a yama un reunion extraordinario cu urgencia pa awe mainta. Riba esaki, Eduard Maduro di Sindicato di Aduana (SADA) a duna di conoce cu e reunion aki lo tuma lugar 10’or di mainta pa asina atende cu algun situacion cu ta pasando.

Di e forma aki lo haya sa di nan miembronan kico ta nan opinion. Un di e motibonan cu nan ta yama e reunion aki ta cu tin lunanan cu ta purbando di haya un reunion cu Minister di Finanzas y Prome Minister y no a logra.

“Esey ta pone cu nos tin cu yama un reunion pasobra tin deadlines cu a vence y no a haya update mas di kico ta pasando cu e acuerdo cu a wordo firma unda cu gobierno actual a bisa cu ta respeta esaki y nos a tende nada mas”, Maduro a señala.

Esnan di SADA ta lamenta e situacion aki ya cu nan ta trata tur manera pa sinta na mesa y purba resolve e problemanan, pero no tabata tin oido di Minister di Finanzas. E presion di e miembronan ta birando mas grandi y pesey SADA a haya su mes obliga di yama un reunion urgente pa awe mainta.

E reunion lo tuma lugar 10’or di mainta na e oficina principal di Aduana. Eynan lo haya sa kico lo ta e siguiente stapnan.

SADA tin nan proposicionnan y e miembronan ta  bay cu nan mesun ideanan y proposicionnan pa asina conhuntamente dicidi. Asina cu finaliza e reunion lo por tin un update riba e pasonan cu lo sigui, Eduard Maduro a indica.

El a agrega cu 15 di Maart tabata tin un ultimo reunion cu Minister di Finanzas unda cu a wordo palabra na mesa cu e minister cu unbes cu caba di atende cu presupuesto den luna di April e lo manda yama un reunion pa atende cu e puntonan cu ta pendiente.

Maduro a lamenta cu e minister no tin tempo aworaki pa atende cu e sindicato. Ta pesey a dicidi di yama e reunion aki cu caracter di urgencia.

 

- Advertisement -

DUNA COMENTARIO

Please enter your comment!
Please enter your name here