Home Hudicial Sindicato di Elmar lo bay denuncia nan Director na Ministerio Publico pa...

Sindicato di Elmar lo bay denuncia nan Director na Ministerio Publico pa ‘secuestro’

231
0
SHARE
- Advertisement -

Raymond Maduro di ALVAST

ORANJESTAD (AAN): Directiva di Sindicato Alvast a reacciona riba declaracion di director di NV Elmar.  Nan ta bisa claramente cu loke el a bisa na prensa, no ta loke realmente a socede

“E no ta manera cu Sr. Henriquez a trece cos padilanti,” un informe di Raymond Maduro di Alvast ta mustra.  “Cosnan no a bay asina”.

Segun Maduro, loke cu a pasa e dos trahadornan di NV Elmar ta cu un di nan ta un persona di staf cu ta supervisor den Magazijn  y e otro ta un trahador cu ta afilia na e sindicato STA.

Ta asina cu Diahuebs mainta pa 8:00 am, a manda yama e trahador cu ta Supervisor pa papia cune, y ora cu el a yega ariba na e oficina di e Director, el a topa cu Sr. Henriquez  y dos persona mas cu ta traha  cu e compania Forensico aki  y nan a splike  pa e duna su cooperacion na e preguntanan cu nan lo bay hacie.

Den prome instante e trahador no a ripara of sinti cu lo ta trata  di un investigacion andando riba dje, pasobra nan a entrege un papel  cu algun pregunta  y pa e contesta nan.  Y riba e papel ta skirbi cu ta pa interview.

Pero mientras e tabata sigui yena e papel, el a cuminsa ripara a base di e preguntanan  ariba e papel  cu no tin nada cu ta indica of tin di haber  cu e preguntanan pa un interview riba e papel, of cu ora bo ta entrevista un hende.

Aki e trahador a bira puntra nan  e ora ey, pakico realmente el a wordo yama ariba.  Aki e señora cu ta traha cu e compania forensico a conteste cu nan trabao ta encera haci onderzoek na compania riba fraude, ladronicia y cu placa di compania nacional etc.

Esaki a impulsa e trahador pa bisa nan e ora ey, cu si ta asina e kier un abogado acerca, of un representante di sindicato Alvast.  Nan a conteste cu esey no por y cu e no por tin contacto cu ningun hende, y e no por haci uso di su celular pa yama.

Tambe nan a bisa e trahador, cu tanten cu e no caba di yena e formulario y firme, e no por bay for di e oficina.  Nan no a permitie di bay cas bay come merdia, y a sigui ‘hoor e’ te cu 7:30 pm, esta anochi.

Esaki ta na unda cu el a cuminza cansa y door di presion  y stress, a haye ta firma contra su boluntad pa asina e por a bay su cas.

Pa Directiva di Sindicato Alvast, nan no ta acepta e abuso autoritario aki di Sr. Henriquez, y pa Sindicato Alvast  e director aki ta hopi fout bezig, pasobra e mester a aserka HR (Human Resources) prome y laga nan papia cu e trahador prome, y mustre y hala su atencion riba loque cu nan ta sospecha di dje, y  nada di esey no a tuma lugar.

Pero gerencia a prefera di bypass nan Human Resources y bay busca e compania forensico aki.

E trahador aki tin 33 aña di servicio y Sr. Henriquez no sa trata su supervisornan,  y realmente mester ta su back-bone of su man drechi di cual cu nan no ta, y a dicidi di bay lanta un Sindicato cu ta Alvast pa asina e organizacion aki si sali na vanguardia  di miembronan.

Nan ta lamenta cu Director Sr. Henriquez no tin comunicacion at all na compania cu Sinidcatonan.

Sindicato Alvast a subraya, cu nan no ta  contra un investigacion, pero si  e mester conta pa tur hende di grandi te cu e trahador chiquito.

Pa directiva di Alvast, e sistema con Sr. Henriquez handle cu e investigacion ta laga hopi di desea.  Bo no por tene un trahador contra su boluntad pa bo laga  haci un investigacion!  Sr. Henriquez no por tuma husticia den  su man.

Pues cueste loke cueste, den wowo di Sindicato, loke a pasa aki ta un secuestro!  Y segun Raymond Maduro, president di Alvast, pesey nan lo bay haci un denuncia na Ministerio Publico tambe.

- Advertisement -

DUNA COMENTARIO

Please enter your comment!
Please enter your name here